ជាតិ
សេដ្ឋកិច្ច
សន្លឹកថ្នាំជក់ស្ងួត ដែលនាំចេញទៅវៀតណាម ទទួលបានការអនុគ្រោះពន្ធ ០%
× ភ្នំពេញ៖ ក្រសួងពាណិជ្ជកម្មនៅថ្ងៃទី២៨ ខែតុលា បានជូនដំណឹងដល់បណ្ដាផលិតករ ឬអ្នកនាំចេញទាំងអស់ ស្ដីពីការអនុគ្រោះពន្ធ ០% នូវមុខទំនិញចំនួន ៣៩បន្ទាត់ពន្ធ ពីប្រទេសវៀតណាមក្នុងឆ្នាំ២០១៦។ ក្នុងចំណោមទំនិញចំនួន ៣៩បន្ទាត់ពន្ធ សន្លឹកថ្នាំជក់ស្ងួត ក៏បានអនុគ្រោះពន្ធនាំចេញសូន្យភាគរយ (០%) ផងដែរ។ នេះបើផ្អែកតាមសេចក្ដីជូនដំណឹងរបស់ក្រសួងពាណិជ្ជកម្ម។
បើតាមសេចក្ដីជូនដំណឹងរបស់ក្រសួងពាណិជ្ជកម្ម បានឲ្យដឹងថា ក្រោមកិច្ចសម្របសម្រួលជំរុញពាណិជ្ជកម្មទ្វេភាគីរវាងរាជរដ្ឋាភិបាលកម្ពុជា និងរដ្ឋាភិបាលវៀតណាម ប្រទេសកម្ពុជាទទួកបានការអនុគ្រោះពន្ធសូន្យភាគរយ (០%) នូវមុខទំនិញចំនួន ៣៩បន្ទាត់ពន្ធ ពីប្រទេសវៀតណាមសម្រាប់អនុវត្តន៍ក្នុងឆ្នាំ ២០១៦។ ជាមួយគ្នានេះ បណ្តាផលិតករ ឬអ្នកនាំចេញ ដែលកំពុងប្រកបអាជីវកម្មទាក់ទងសន្លឹកថ្នាំជក់ស្ងួត នឹងទទួលបានការនាំចេញទៅប្រទេសវៀតណាម ដោយមិនគិតពន្ធ សូន្យភាគរយ (០%)។
ក្រសួងអំពាវនាវ ដល់បណ្ដាផលិតករ ឬអ្នកនាំចេញ ដែលចុះបញ្ជីក្នុងប្រព័ន្ធអនុគ្រោះពាណិជ្ជកម្ម និងបំពេញកាតព្វកិច្ចពន្ធដារឆ្នាំ២០១៦រួច មានបំណងធ្វើការនាំចេញសន្លឹកថ្នាំជក់ស្ងួតទៅវៀតណាមដោយរួចពន្ធ រួសរាន់ដាក់ពាក្យស្នើសុំមកកាន់ក្រសួងពាណិជ្ជកម្ម។
សម្រាប់បណ្ដាផលិតករ ឬអ្នកនាំចេញ អាចដាក់ពាក្យស្នើសុំទៅកាន់ក្រសួងនៅនាយកដ្ឋាននាំចេញ-នាំចូល នៃក្រសួងពាណិជ្ជកម្ម រៀងរាល់ម៉ោងធ្វើការ ចាប់ពីថ្ងៃជូនដំណឹងនេះ រហូតដល់ថ្ងៃទី១១ ខែវិច្ឆិកា ឆ្នាំ២០១៦៕
© រក្សាសិទ្ធិដោយ thmeythmey.com