ពលករខ្មែររៀបរាប់ពីបទពិសោធន៍ដ៏ជូរចត់ក្រោមក្រញាំដៃចោរសមុទ្រនៅសូម៉ាលី

ជាតិ

ពលករខ្មែររៀបរាប់ពីបទពិសោធន៍ដ៏ជូរចត់ក្រោមក្រញាំដៃចោរសមុទ្រនៅសូម៉ាលី

02, Nov 2016 , 11:12 am

រូបភាព

ដោយ:

ភ្នំពេញ៖ ពលករ ៤រូប បានវិលត្រឡប់ពីប្រទេសសូម៉ាលីចូលស្រុកខ្មែរវិញទាំងទឹកភ្នែក ក្រោយពីក្រុមចោរសមុទ្រសូម៉ាលីចាប់បង្ខំធ្វើការនេសាទជាង ៥ឆ្នាំ លើសមុទ្រ។ អង្គការក្រៅរដ្ឋាភិបាល Caritas សហការជាមួយអង្គការទេសន្តរប្រវេសន៍អន្តរជាតិ IOM ជួយឲ្យពួកគេបានត្រឡប់មកដល់កម្ពុជា កាលពីថ្ងៃទី៣០ ខែតុលា ឆ្នាំ២០១៦។

ជនរងគ្រោះទាំង ៤នាក់ រួមមាន ឃន វណ្ណធី ពីខេត្តកំពង់ចាម គីម គឹមហេង ពីខេត្តក្រចេះ ញ៉ែម សុខសាន្ត និងញ៉ែម សុខសាន្ត និងឯម ភូម៉ានី ពីខេត្តកំពង់ឆ្នាំង។ លោក ញ៉ែម សុខសាន្ត ជាពលករនេសាទកម្ពុជាម្នាក់ចំណោមបួននាក់ត្រូវបានចោរសមុទ្រចាប់ជាចំណាប់ខ្មាំង កាលពីបួនឆ្នាំកន្លះមុន។

បុរសវ័យជាង ៣០ឆ្នាំរូបនេះ ចាត់ទុកការដោះលែងនេះ ជាការគេចផុតពីសេចក្តីស្លាប់។ បុរសរូបនេះ បានថ្លែងរៀបរាប់អំពីទុក្ខសោកវេទនា ក្នុងរយៈពេលនៃការចាប់ឃុំខ្លួនពីសំណាក់ក្រុមចោរសមុទ្រសូម៉ាលី ដូច្នេះថា៖«ចោរសមុទ្របង្ខំពួកខ្ញុំធ្វើការកណ្តាលសមុទ្រត្រជាក់ណាស់ហើយ ពួកគេមិនផ្តល់អាហារគ្រប់គ្រាន់ឡើយ គឺពួកគេឲ្យតែទឹកមួយលីត្រ និងបបរមួយចាន ខ្លះចាប់សត្វកណ្តុរ ចាបហូបក៏មានដែរ»។

បុរសដែលត្រូវក្រុមចោរសមុទ្របង្ខំឲ្យធ្វើការនេសាទរូបនេះ បានប្រៀបធៀបការធ្វើទុក្ខបុកម្នេញលើរូបលោកពីសំណាក់ក្រុមចោរសមុទ្រសូម៉ាលីនៅថ្ងៃទី០១ ខែវិច្ឆិកា ឆ្នាំ២០១៦នេះក្នុងទីស្នាក់ការអង្គការ Caritas ថា វាធ្វើទារុណកម្មលោក និងជនជាតិដទៃដូចរបបខ្មែរក្រហម។

«ពេលនោះ ខ្ញុំ និងជនជាតិចិន តៃវ៉ាន់ ហ្វីលីពីន ឥណ្ឌូនេស៊ី និងវៀតណាមដទៃ កំពុងធ្វើការ នៅលើកប៉ាល់សមុទ្ររបស់ក្រុមហ៊ុនស្របច្បាប់ ស្រាប់តែពួកក្រុមចោរសូម៉ាលីបាញ់កាំភ្លើងរះលើកប៉ាលយើងរួច ពួកគេចាប់យើងបិទភ្នែកហើយបង្ខំឲ្យពួកខ្ញុំចូលកប៉ាលពួកគេទៅ»។ បុរសដែលធ្លាប់ជាកម្មករសំណង់នៅកម្ពុជា រៀបរាប់ពីទុក្ខលំបាក ពេលចោរសមុទ្រចាប់ខ្លួនឲ្យធ្វើការលើដែនទឹក។

បុរសរូបនេះ រៀងចាលនឹងការចំណាកស្រុកហើយ ទោះបីចំណាកស្រប ឬខុសច្បាប់ក្តី។ លោកស្បថទាំងភ្នែកគ្រលេងគ្រលោងដូច្នេះថា៖«ខ្ញុំឈប់ចំណាកស្រុកទៀតហើយ ទោះបីលំបាក ឬស្រួល។ ខ្ញុំសុខចិត្តនៅក្នុងស្រុក ផ្ទះយើងមានការពារត្រឹមត្រូវវិញ»។

មិនសុខគ្នាដែរ លោក ឯម ភូម៉ានី បានអះអាងថា ក្រុមចោរសូម៉ាលីបានចាប់ជំរិតទារប្រាក់ ពួកគេ ជាថ្នូរនឹងការដោះលែងឲ្យមានសេរីភាពវិញ។ បុរសខ្មៅស្រអែមវ័យប្រមាណ ២៥ឆ្នាំ អះអាងពីទុក្ខលំបាកដូចបុរសពលករខាងលើដែរ។ លោកប្រាប់ទាំងអួលដើមកយ៉ាងដូច្នេះ៖«ក្រុមចោរបានយកពួកខ្ញុំជាចំណាប់ខ្មាំងក្នុងចំណោម ចំណាប់ខ្មាំង២៩នាក់ នោះមាន៣នាក់ស្លាប់ ដោយសារធ្លាក់ខ្លួនឈឺ។ ខ្ញុំគ្មានសង្ឃឹមរស់ទេ ព្រោះពួកគេឲ្យពួកខ្ញុំផឹកទឹក តែមួយលីត្រ និងបាយមួយចានប៉ុណ្ណោះក្នុងមួយថ្ងៃៗ»។

ដោយឡែក លោក ឃន វណ្ណធី រស់នៅស្រុកស្ទឹងត្រង់ ខេត្តកំពង់ចាម ក៏ត្រូវបានក្រុមចោរសមុទ្រចាប់បង្ខំផងដែរ។ លោកនិយាយរម្លឹករឿងរស់នៅលើកប៉ាលកណ្តាលសមុទ្រជាង ៤ឆ្នាំនោះ ដូចរស់នៅក្នុងឋានរកដែរ ព្រោះលោកគ្មានទំនាក់ទំនងជាមួយមនុស្ស គ្មានសេរីភាពដូចរស់នៅលើគោកទេ។ បុរសវ័យជាង ៣០ឆ្នាំនេះ តែងបន់ព្រះជួយឲ្យលោក បានឡើងដីគោកវិញ។

រីឯ លោក គីម គឹមហេង បានស្បថថា លោកលែងចំណាកស្រុកហើយ ដោយលោកអះអាងថា វាលំបាកវេទនាគ្រប់គ្រាន់ហើយ។ បុរសដែលពុំធ្លាប់ឆ្លងកាត់ការបណ្តុះបណ្តាលជំនាញវិជ្ជាជីវៈរូបនេះ នឹងប្រកបរបរកសិកម្ម ឬកម្មករសំណង់ក្នុងស្រុកខ្មែរវិញ។

គួរជម្រាបផងដែរ ក្រុមចោរសមុទ្របានដោះលែងពួកគាត់ កាលពីថ្ងៃទី២២ ខែតុលា ឆ្នាំ២០១៦រួច ពួកគេត្រូវបានអង្គការមិនមែនរដ្ឋាភិបាលបញ្ជូនមកកាន់ ប្រទេសហ្វីលីពីន មុនពេលគេមកដល់ប្រទេសកម្ពុជាវិញ៕