ជាតិ
នយោបាយជាតិ
លោក អេង ឆៃអ៊ាង គ្រោងកោះហៅសម្ដេច ស ខេង សួរនាំរឿងស៊ើបអង្កេតករណីលោក កែម ឡី
×
ភ្នំពេញ៖ គណៈកម្មការទី១រដ្ឋសភា គ្រោងកោះហៅរដ្ឋមន្ត្រីក្រសួងមហាផ្ទៃ សម្ដេច ស ខេង មកសួរនាំដំណើរការស៊ើបអង្កេតករណីឃាតកម្មលើលោក កែម ឡី នៅខែវិច្ឆិកានេះ ដើម្បីជំរុញឲ្យមានការដោះស្រាយរកយុត្តិធម៌ជូនគ្រួសារសពលោក កែម ឡី។
អ្នកនាំពាក្យគណបក្សសង្គ្រោះជាតិលោក យឹម សុវណ្ណ បានបញ្ជាក់ថា គណបក្សលោកនឹងបន្តយុទ្ធនាការជួយរកយុត្តិធម៌ជូនលោក កែម ឡី ដែលត្រូវបានឃាតករបាញ់សម្លាប់កាលពីថ្ងៃទី១០ កក្កដាកន្លងមក។ តាមរយៈសកម្មភាពជួយរកយុត្តិធម៌ជូនគ្រួសារសពលោក កែម ឡី នេះលោក យឹម សុវណ្ណ បានឲ្យដឹងថា គណៈកម្មការទី១នៃរដ្ឋសភា ដែលដឹកនាំដោយលោក អេង ឆៃអ៊ាង តំណាងរាស្ត្រគណបក្សសង្គ្រោះជាតិ នឹងកោះហៅរដ្ឋមន្ត្រីក្រសួងមហាផ្ទៃ សម្ដេច ស ខេង មកសួរនាំពីដំណើរការស៊ើបអង្កេតអ្នកនៅពីក្រោយខ្នងលើករណីបាញ់សម្លាប់លោក កែម ឡី ដើម្បីលុបបំបាត់ការសម្លាប់អ្នកគ្មានទោសពៃរ៍ ដោយសារការបញ្ចេញមតិនៅក្នុងសង្គម។
ថ្លែងក្នុងសន្និសីទព័ត៌មាននៅមុខទីស្នាក់ការបក្ស កាលពីល្ងាចថ្ងៃទី១ វិច្ឆិកា អ្នកនាំពាក្យគណបក្សសង្គ្រោះជាតិរូបនេះ បានបញ្ជាក់ថា៖«យើងមិនទាន់ឃើញមានដំណើរការរកយុត្តិធម៌ជូនគ្រួសារគាត់(កែមឡី) នៅឡើយទេ ខាងរដ្ឋាភិបាលហាក់បីដូចជាស្ងប់ស្ងៀមចំពោះបញ្ហានេះ។ ដូច្នេះតំណាងរាស្ត្រគណបក្សសង្គ្រោះជាតិមិនអាចឈឱបដៃនៅស្ងៀមទេ គណកម្មការទី១រដ្ឋសភា គ្រប់គ្រងដោយគណបក្សសង្គ្រោះជាតិ ជំរុញឲ្យមានការរកយុត្តិធម៌ជូនគ្រួសារសពលោក កែម ឡី…។ គណកម្មការទី១ នឹងអញ្ជើញរដ្ឋមន្ត្រីក្រសួងមហាផ្ទៃមកសួរនាំអំពីដំណើរការស៊ើបអង្កេតឃាតកម្មលើលោក កែម ឡី ក្នុងពេលឆាប់ៗខាងមុខ ក្នុងខែវិច្ឆិកានេះ»។
សារព័ត៌មានថ្មីៗ បានទាក់ទងសុំការអត្ថាធិប្បាយបន្ថែមពីអ្នកនាំពាក្យក្រសួងមហាផ្ទៃលោក ខៀវ សុភ័គ ជុំវិញដំណើរការស៊ើបអង្កេតរកតម្រុយពីក្រោយខ្នងលើករណីឃាតកម្មលោក កែម ឡី នេះ ។ តែលោក ខៀវ សុភ័គ បានបញ្ជាក់យ៉ាងខ្លីមុនបិទទូរសព្ទថា «សំណុំឯកសារស៊ើបអង្កេតបានបញ្ជូនទៅតុលាការអស់ហើយ»។
សូមបញ្ជាក់ថា លោក កែម ឡី ដែលជាអ្នកស្រាវជ្រាវ និងបញ្ចេញមតិដោះស្រាយលើបញ្ហាសង្គម ត្រូវបានឃាតកបាញ់សម្លាប់ នៅក្នុងស្តាម៉ាតមួយ ដែលស្ថិតនៅម្តុំស្តុបបូកគោ កាលពីព្រឹកថ្ងៃទី១០ ខែកក្កដា ឆ្នាំ២០១៦។ សមត្ថកិច្ចបានចាប់ខ្លួនឃាតករភ្លាមៗ ដោយអះអាងថា ឈ្មោះ ជួប សម្លាប់។ គិតរហូតមកដល់ថ្ងៃនេះ ឃាតកម្មលើលោក កែម ឡី មានរយៈពេលជិត៤ខែហើយ៕
© រក្សាសិទ្ធិដោយ thmeythmey.com