កីឡាជាតិ
កីឡាជាតិ៖ ក្រុមបាល់ទះខេត្តកំពតឡើងទៅដណ្តើមមេដាយមាសទាំងបុរស និងនារី
×
ក្រោយការប្រកួតប្រជែងអស់រយៈពេលជាងមួយសប្តាហ៍កន្លងមក ខេត្តកំពតបានបង្ហាញភាពខ្លាំងរបស់ខ្លួនលើប្រភេទកីឡាបាល់ទះក្នុងព្រឹត្តិការណ៍កីឡាជាតិលើកទី១ ដោយទាំងក្រុមបុរស និងនារី សុទ្ធតែឡើងទៅកាន់វគ្គផ្តាច់ព្រ័ត្រ នាព្រឹកថ្ងៃសុក្រ ទី៤ ខែវិច្ឆិកា នៅពហុកីឡដ្ឋានជាតិអូឡាំពិក។ សម្រាប់វគ្គផ្តាច់ព្រ័ត្រ ក្រុមបាល់ទះបុរសកំពតត្រូវប៉ះជាមួយក្រុមខេត្តព្រះវិហារ ខណៈក្រុមនារីនៃខេត្តតំបន់សមុទ្រមួយនេះ ត្រូវតទល់ជាមួយក្រុមនារីខេត្តពោធិ៍សាត់។
ក្រុមកីឡាបាល់ទះបុរសមកពីខេត្តកំពតដែលមានគ្រូបង្វឹកជាជនជាតិថៃនោះ បានឈានទៅដល់វគ្គផ្តាច់ព្រ័ត្រដើម្បីប្រកួតដណ្តើមមេដាយមាសជាមួយក្រុមបាល់ទះកមពីខេត្តព្រះវិហារ ក្នុងព្រឹត្តិការណ៍កីឡាជាតិលើកទី១ នាថ្ងៃសុក្រ ទី៤ ខែវិច្ឆិកា បន្ទាប់ពីពួកគេបានយកឈ្នះ ក្រុមបាល់ទះមកពីក្រសួងមហាផ្ទៃនៅវគ្គពាក់កណ្តាលផ្តាច់ព្រ័ត្រ ក្នុងលទ្ធផល៣សិតទល់នឹង១សិត ក្នុងលទ្ធផលពិន្ទុ (២៥-១៩, ២៥-១៤, ៩-២៥, ២៩-២៧)។ រីឯក្រុមខេត្តព្រះវិហារ ក៏បានយកឈ្នះក្រុមកីឡាបាល់ទះរបស់ខេត្តកំពង់ចាមក្នុងលទ្ធផលប្រផិតប្រផើយ ៣សិត ទល់ ២សិតផងដែរ ក្នុងលទ្ធផលពិន្ទុ (២៥-១៩, ២២-២៥, ២៧-២៥, ២៣-២៥, ១៥-១២) ។
នៅមុនជំនួបដណ្តើមមេដាយមាសរវាងក្រុមខេត្តកំពត និងព្រះវិហារ នាវេលាម៉ោង១០ និង៣០នាទីព្រឹក ក្រុមខេត្តកំពង់ចាម ត្រូវដណ្តើមមេដាយសំរឹទ្ធជាមួយក្រុមក្រសួងមហាផ្ទៃនៅលើទីលានតែមួយ។
វិញ្ញាសាកីឡាបាល់ទះបុរសសម្រាប់ព្រឹត្តិការណ៍កីឡាជាតិលើកទី១នេះ មាន១៩រាជធានីខេត្តចូលរួម ដោយចែកចេញជា៤ពូល ក្នុងនោះពូល A មានខេត្តព្រៃវែង ព្រះសីហនុ កំពង់ធំ រតនគិរី និងក្រសួងមហាផ្ទៃ ពូល B មានខេត្ត កំពង់ចាម មណ្ឌលគិរី កំពត ពោធិ៍សាត់, និងរាជធានីភ្នំពេញ ពូល C មានខេត្តកោះកុង កែប ត្បូងឃ្មុំ ព្រះវិហារ និងកណ្តាល និងចុងក្រោយពូល D មាន បាត់ដំបង ឧត្តរមានជ័យ ប៉ៃលិន និងកំពង់ស្ពឺ។
សម្រាប់វិញ្ញាសារបាល់ទះនារីវិញ ក្រុមមកពីខេត្តកំពតនឹងប្រកួតដណ្តើមមេដាយមាសជាមួយក្រុមបាល់ទះនារីមកពីខេត្តពោធិ៍សាត់នាព្រឹកថ្ងៃសុក្រផងដែរ បន្ទាប់ពីខេត្តកណ្តាលដណ្តើមបានមេដាយសំរឹទ្ធ ក្រោយឈ្នះក្រុមមកពីខេត្តបន្ទាយមានជ័យក្នុងលទ្ធផល៣សិតជាប់គ្នា ក្នុងលទ្ធផលពិន្ទុ (២៥-២៣, ២៥-១១, ២៥-៩)។
វិញ្ញាសាបាល់ទះនារីក្នុងព្រឹត្តិការណ៍កីឡាជាតិលើកទី១នេះ មានក្រុមមកពីខេត្តចំនួន៩ចូលរួម ដោយចែកចេញជា២ពូល ក្នុងនោះពូល A មានខេត្ត ព្រះវិហារ កណ្តាល បន្ទាយមានជ័យ ក្រចេះ និងខេត្តកោះកុង និងពូល B មានខេត្ត កំពត ពោធិ៍សាត់ ត្បូងឃ្មុំ និងខេត្តតាកែវ៕
© រក្សាសិទ្ធិដោយ thmeythmey.com