ក្រសួងការបរទេសអាមេរិកនៅថ្ងៃទី០៣ ខែវិច្ឆិកា បានរៀបចំពិធីផ្ទេរ និងស្បថចូលកាន់តំណែងដល់អគ្គរដ្ឋទូតអាមេរិកថ្មីប្រចាំក្រុងម៉ានីលនៃប្រទេសហ្វីលីពីន បន្ទាប់អគ្គរដ្ឋចាស់ បានបញ្ចប់អាណត្តិរបស់ខ្លួន ក្រោយអធិបតីភាពរបស់លោករដ្ឋមន្ត្រីការបរទេសអាមេរិក លោក Jonh Kerry។ ខណៈស្ថានភាពទ្វេភាគីជាមួយហ្វីលីពីនមិនសូវជាល្អប៉ុន្មាននោះ លោក Jonh Kerry មានទំនុកចិត្តខ្ពស់ ថា ប្រធានបេកសកម្មរបស់ខ្លួនថ្មីប្រចាំក្រុងម៉ានីលអាចបំពេញតួនាទីបានល្អប្រសើរ។
លោក Sung Kim ដែលមានសញ្ជាតិដើមកូរ៉េខាងត្បូង បានចូលស្បថកាន់តំណែងជាអគ្គរដ្ឋទូតអាមេរិកប្រចាំក្រុងម៉ានីលថ្មីជំនួសលោកអតីតអគ្គរដ្ឋទូត Philip S. Goldberg ដែលទើបតែបានបញ្ចប់អាណត្តិបីឆ្នាំរបស់ខ្លួន។ លោកអគ្គរដ្ឋទូត Sung Kim អាចនឹងត្រូវប្រឈមរឿងរ៉ាវច្រើនក្នុងការកាន់តំណែងជាអគ្គរដ្ឋទូតអាមេរិកប្រចាំហ្វីលីពីន ដ្បិត ទំនាក់ទំនងប្រទេសទាំងពីរ កំពុងតែឆ្លងកាត់ស្ថានភាពមួយដែលប្រៀបដូចនឹងការបក់បោកព្យុះភ្លៀង ក្រោយហ្វីលីពីន ផ្លាស់ប្តូររដ្ឋបាលថ្មីដែលមិនមាននិន្នាការទៅរកអាមេរិកនោះ។
នាពិធីស្បថកាន់តំណែងនោះ លោករដ្ឋមន្ត្រីការបរទេស Jonh Kerry ក៏បានបញ្ជាក់ពីការផ្តល់ទំនុកចិត្តរបស់អាមេរិក ក៏ដូចជាលើកឡើងពីសមិទ្ធផលសំខាន់ៗរបស់លោក Sung Kim ដែលបង្ហាញថា លោក Sung ពិតជាសក្តិសមក្នុងការកាន់តំណែងនេះ។ លោក Kerry បាននិយាយយ៉ាងដូច្នេះថា «ខ្ញុំ ពិតជាមានទំនុកចិត្ត ពីព្រោះយើងមាន Sung ជាមន្ត្រីការទូតដ៏អស្ចារ្យតំណាងឲ្យយើងនៅក្រុងម៉ានីល, ជាអ្នកបន្តវេនរបស់អគ្គរដ្ឋទូត Goldberg ដ៏សក្តិសម និងជាបុគ្គលម្នាក់ដែលមានភាពអស្ចារ្យទាំងទេពកោសល្យ និងបែបផែនផ្ទាល់ខ្លួន»។
លោក Kerry បានបន្ថែមថា «គ្មាននរណាដែលមានលក្ខណៈពិសេសជាងលោក Sung ក្នុងការតំណាងអាមេរិក និងជាអគ្គរដ្ឋប្រចាំហ្វីលីពីននៅក្នុងពេលវេលានេះឡើយ»។
បើតាមការបញ្ជាក់របស់ប្រមុខការទូតអាមេរិករូបនោះ លោក Sung Kim ក៏ធ្លាប់ជាអគ្គរដ្ឋអាមរិកប្រចាំកូរ៉េខាងត្បូងផងដែរ។ ហើយក្នុងពេល ដែលលោក Sung បំពេញមុខងារជាបេសកជនពិសេសរបស់អាមេរិកប្រចាំកូរ៉េខាងត្បូងនោះ លោក បានឆ្លងកាត់ស្ថានភាព និងផលលំបាកការទូតច្រើន ដ្បិត លោក ត្រូវតំណាងអាមេរិកក្នុងការចេញមុខ និយាយចរចា និងតតាំងច្រើនពីបញ្ហាឧបទ្វីបកូរ៉េជាមួយនឹងកូរ៉េខាងជើងដើម្បីធានាពីការគ្មានអាវុធនុយក្លេអ៊ែរនោះ។
តបនឹងការផ្តល់ទំនុកចិត្តពីប្រមុខការទូត Kerry លោក Sung បានបញ្ជាក់ថា លោក ពិតជាមោទភាពដែលលោក ត្រូវបានតែងតាំងជាតំណាងរដ្ឋាភិបាលទាំងនៅកូរ៉េខាងត្បូង និងហ្វីលីពីននោះ។ លោក Sung ក៏បានឲ្យដឹងថាតាំងពីលោក បានទៅដល់អាមេរិកនៅអាយុ១៣ឆ្នាំ លោក មិនដែលហ៊ានសូម្បីតែស្រម៉ៃថា អាចក្លាយជាអ្នកតំណាងឲ្យរដ្ឋាភិបាលអាមេរិកឡើយ។
លោកអគ្គរដ្ឋទូត Sung ក៏បាននិយាយទាំងមុតមាំថា អាមេរិក និងហ្វីលីពីន នឹងបន្តជា«មិត្តភក្តិ ដៃគូ និងសម្ព័ន្ធមិត្តជិតស្និទ្ធ» ហើយ លោក ក៏កំពុងតែទន្ទឹងរង់ចាំក្នុងការបន្តជំរុញការផ្សារភ្ជាប់សេដ្ឋកិច្ច និងកិច្ចការល្អជាមួយនឹងហ្វីលីពីននាពេលឆាប់ៗនេះផងដែរ។
សូមជម្រាបផងដែរថា អាមេរិក និងហ្វីលីពីន បានចាប់ផ្តើមទំនាក់ទំនងការទូតជាមួយគ្នាតាំងពីពេលដែលហ្វីលីពីនទទួលបានឯករាជ្យ ពោលគឺចាប់ពីថ្ងៃទី០៤ ខែកក្កដាឆ្នាំ១៩៤៦មកម្ល៉េះ។ បន្ទាប់មកនៅឆ្នាំ១៩៥១ រដ្ឋាភិបាលនៃប្រទេសទាំងពីរ បានបន្តវិវត្តកិច្ចសហប្រតិបត្តិការរហូតសម្រេចបានកិច្ចព្រមព្រៀងការពារជាតិកំពូលទ្វេភាគីមួយ ដែលមានឈ្មោះ «សន្ធិសញ្ញាការពារជាតិរួម (Mutual Defense Treaty)»។ តាមរយៈសន្ធិសញ្ញានេះ ភាគីទាំងពីរអាចមានលទ្ធភាពក្នុងការអន្តរាគមន៍លើកិច្ចការពារជាតិរវាងគ្នាទៅវិញទៅមកបានដោយស្របច្បាប់ នៅពេលដែលមានប្រទេសណាមួយប្រឈមបញ្ហាសន្តិសុខ ជាពិសេសនោះ មានការឈ្លានពានជាដើម។
ភាគីទាំងពីរ បានរក្សាកិច្ចសហប្រតិបត្តិការជិតស្និទ្ធរវាងគ្នារហូតមក។ តែក្រោយលោកប្រធានាធិបតី រ៉ូឌ្រីហ្គូ ឌើទើតេ ឡើងកាន់តំណែងមក ទំនាក់ទំនងរវាងប្រទេសទាំងពីរ ហាក់ដូចជាធា្លក់ចុះខ្លាំង។ លោក ឌើទើតេ តាំងពីមុន និងក្រោយក្លាយជាប្រធានាធិបតីហ្វីលីពីន មិនដែលនិយាយអ្វីល្អឡើយពីអាមេរិក។ លោក តែងតែនិយាយរិះគន់ និងថែមទាំងជេរប្រមាថលោកប្រធានាធិបតីអាមេរិក បារ៉ាក់ អូបាម៉ាជាច្រើនលើកទៀតផង។ អ្វីគួរកត់សម្គាល់នោះ សូម្បីតែអគ្គរដ្ឋអាមេរិកប្រចាំហ្វីលីពីនលោក Philip S. Goldberg ក៏ធា្លប់ត្រូវបានលោក ឌើទើតេ និយាយបញ្ចើចបញ្ចើ និងដៀលថាជា «ខ្ទើយ»ទៀតផងនោះ៕