ខេត្តសៀមរាបឈរលេខ ១ ផ្នែកគុនល្បុក្កតោ ដោយកីឡាករម្នាក់ៗឈ្នះមេដាយលើសពីពីរ

កីឡាជាតិ

ជាតិ

ខេត្តសៀមរាបឈរលេខ ១ ផ្នែកគុនល្បុក្កតោ ដោយកីឡាករម្នាក់ៗឈ្នះមេដាយលើសពីពីរ

05, Nov 2016 , 2:39 pm

រូបភាព

ដោយ:

ក្រោយពីប្រកួតអស់រយៈពេល៤ថ្ងៃនៅលើទីលានក្នុងអគារដំបូលទូកនៃពហុកីឡដ្ឋានជាតិតាំងពីថ្ងៃទី១ ខែវិច្ឆិកា ការប្រកួតកីឡាគុនល្បុក្កតោក្នុងព្រឹត្តិការណ៍កីឡាជាតិលើកទី១ បានបញ្ចប់យ៉ាងជោគជ័យកាលពីល្ងាចថ្ងៃទី៤ ខែវិច្ឆិកា។ ក្នុងចំណោម៥ខេត្ត-រាជធានី និងក្រសួងដែលចូលរួមប្រកួត ខេត្តសៀមរាប បានឈរលំដាប់ទី១ ខណៈរាជធានីភ្នំពេញឈរលំដាប់ទី២ រីឯខេត្តកំពង់ឆ្នាំង, ក្រសួងមហាផ្ទៃ និងខេត្តកំពតឈរលំដាប់បន្តបន្ទាប់។

ខេត្តសៀមរាបបានឈរលំដាប់លេខ១ ក្នុងតារាងមេដាយលើប្រភេទកីឡាគុនល្បុក្កតោ នាព្រឹត្តិការណ៍កីឡាជាតិលើកទី១ បន្ទាប់ពីខេត្តនេះ បានឈ្នះមេដាយមាសចំនួន៧, ប្រាក់៤ និងសំរឹទ្ធ៤ ដោយ សៀមរាប បានឈរលើខេត្ត-រាជធានី និងក្រសួងចំនួន៤ផ្សេងទៀត។ ជាមួយគ្នានេះ បើគិតជារួមលើគ្រប់ប្រភេទវិញ្ញាសាខេត្តសៀមរាបឈរលំដាប់លេខរៀងទី៥ បន្ទាប់ពីរាជធានីភ្នំពេញ ក្រសួងមហាផ្ទៃ ក្រសួងការពារជាតិ និងខេត្តកណ្តាល។

មេដាយមាសទាំង៧របស់ខេត្តសៀមរាបដណ្តើមបានដោយកីឡាករ អ៊ែរ សំអុន និងកីឡាការិនី ស៊ិន សៀវសៀនលើវិញ្ញាសាទ្វារមេគុនខែលល្បុក្កតោបុរស-នារីចំនួន២, កីឡាការិនី ស៊ិន សៀវសៀន លើវិញ្ញាសាទ្វារមេគុនដាវទោល ឬភ្លោះចំនួន១, នី ឈៀងអេង លើវិញ្ញាសាទ្វារមេគុនដំបងវែងនារីចំនួន១, កីឡាករ អ៊ែរ សំអុន និងកីឡាការិនី នី ឈៀងអេង ម្នាក់១លើវិញ្ញាសាទ្វារមេគុនដៃបុរស-នារី ខណៈ១ទៀតដណ្តើមបានលើវិញ្ញាសាសមយុទ្ធ២នាក់បុរស-នារីដោយកីឡាករ សាត សុវណ្ណភូម៉ា និងកីឡាការិនី សាំ ស្រីនាង។

រីឯមេដាយប្រាក់ដណ្តើមបានលើវិញ្ញាសាទ្វារមេគុនខែលល្បុក្កតោនារីចំនួន១ដោយកីឡាការិនី នី ឈៀវអេង, វិញ្ញាសាទ្វារមេគុនដាវទោល ឬភ្លោះបុរសចំនួន១ ដោយកីឡាករ សាត សុវណ្ណភូម៉ា, វិញ្ញាសាទ្វារមេគុនដំបងវែងនារីចំនួន១ដោយកីឡាការិនី នី ឈៀងអេង និងវិញ្ញាសាទ្វារមេគុនដៃចំនួន១ដោយកីឡាករ សាត សុវណ្ណភូម៉ា។

ចំណែកមេដាយសំរឹទ្ធដណ្តើមបានលើវិញ្ញាសាទ្វារមេគុនដាវទោលឬភ្លោះនារីចំនួន១ដោយកីឡាការិនី ខុម ស្រីតូច, វិញ្ញាសាទ្វារមេគុនដំបងវែងបុរសចំនួន១ដោយកីឡាករ ស៊ុយ ស្យា, វិញ្ញាសាទ្វារមេគុនដៃចំនួន១ដោយកីឡាករ សេរី សាន់ និងវិញ្ញាសាប្រយុទ្ធបុរសទម្ងន់៥៦-៦០គីឡូក្រាមចំនួន១ ដោយកីឡាករ ផា យ៉ា។

ក្រោយពីឆ្លងកាត់ការប្រកួតអស់រយៈពេល៤ថ្ងៃក្នុងចំណោមកីឡាករកីឡាការិនីទាំងអស់មានកីឡាករ៣រូបដែលទទួលបានមេដាយលើសពីពីរ ក្នុងនោះកីឡាការិនី នី ឈៀងអេង ទទួលបានមេដាយមាស២ និងប្រាក់១ រីឯកីឡាការិនី ស៊ិន សៀវសៀន មាស២ និងប្រាក់១ ខណៈកីឡាករ សាត សុវណ្ណភូម៉ា ទទួលបានមេដាយមាស១ និងប្រាក់២។

ការប្រកួតដែលបានបញ្ចប់កាលពីល្ងាចថ្ងៃទី៤ ខែវិច្ឆិកា នៅអគារដំបូលទូកក្នុងពហុកីឡដ្ឋានជាតិ ក្រុមកីឡាករមកពីរាជធានីភ្នំពេញបានឈរលំដាប់ទី២ ដោយឈ្នះមេដាយមាស៥, ប្រាក់៣ និងសំរឹទ្ធ៣ ខណៈខេត្តកំពង់ឆ្នាំងឈរលំដាប់ជាបន្តក្រោយទទួលបានមេដាយមាស៣, ប្រាក់២ និងសំរឹទ្ធ៣។ ចំណែកក្រសួងមហាផ្ទៃ និងខេត្តកំពតឈរក្នុងលំដាប់បន្តបន្ទាប់ក្នុងនោះក្រសួងមហាផ្ទៃដណ្តើមបានមេដាយមាស២ ប្រាក់៥ និងសំរឹទ្ធ៤ ខណៈខេត្តកំពតទទួលបានមេដាយមាស១ ប្រាក់៤ និងសំរឹទ្ធ៥៕