អន្តរជាតិ
នយោបាយអន្តរជាតិ
លោក វីដូដូ ផ្អាកទស្សនកិច្ចទៅអូស្រា្តលី ព្រោះបាតុកម្មក្នុងស្រុកឈានដល់អំពើហិង្សា
×
ប្រធានាធិបតីឥណ្ឌូណេស៊ី លោក ចូកូ វីដូដូ នៅថ្ងៃទី៥ ខែវិច្ឆិកា បានសម្រេចពន្យារពេលទៅទស្សនកិច្ចនៅអូស្ត្រាលីហើយ។ លោក វីដូដូ សម្រេចចិត្តដូចនេះ ខណៈដែលបាតុកម្មទាមទារទម្លាក់អភិបាលក្រុងហ្សារកាតា ឈានដល់ការប្រើអំពើហិង្សារវាងបាតុករ និងក្រុមប៉ូលិស ហើយលោកផ្ទាល់ត្រូវស្ថិតក្នុងប្រទេស ដើម្បីគ្រប់គ្រងស្ថានការណ៍កុំឲ្យរាលដាលកាន់តែខ្លាំង។
បាតុកម្មអហិង្សាកណ្ដាលក្រុងហ្សារកាតាទាមទារឲ្យមានការកាត់ទោសចៅហ្វាយក្រុង លោក Basuki “Ahok” Thahaja Purnama ប្រែក្លាយជាបាតុកម្មហិង្សា ដោយមានមនុស្សស្លាប់ និងអ្នករបួសជាច្រើន។ ដោយសារតែស្ថានភាពប្រែប្រួលដូចនេះ លោកប្រធានាធិបតី ចូកូ វីដូដូ ក៏បានពន្យារពេលទស្សនកិច្ចផ្លូវរដ្ឋរបស់លោកទៅកាន់អូស្ត្រាលី ដើម្បីបន្តនៅក្នុងប្រទេសសិន។
ប្រធានផ្នែកព័ត៌មានលេខាធិការដ្ឋានប្រធានាធិបតី លោក Bey Machmudin បាននិយាយនៅថ្ងៃទី៥ ខែវិច្ឆិកា ថា ស្ថានការណ៍នៅក្នុងប្រទេសបច្ចុប្បន្ននេះ តម្រូវឲ្យមានវត្តមានលោកប្រធានាធិបតី វីដូដូ ហើយលោកក៏បានសម្រេចពន្យារពេលទស្សនកិច្ចតែម្ដង។ ហើយវត្តមានរបស់ប្រធានាធិបតី គឺជារឿងចាំបាច់ក្នុងកាលៈទេសៈបែបនេះ។
សារព័ត៌មានសិង្ហបុរី Channel NewsAsia ផ្សាយថា លោកប្រធានាធិបតី វីដូដូ គ្រោងនឹងចាកចេញទៅកាន់អូស្ត្រាលីសម្រាប់ទស្សនកិច្ចផ្លូវរដ្ឋរបស់លោកនៅថ្ងៃទី៥ ខែវិច្ឆិកា និងត្រឡប់មកវិញនៅថ្ងៃទី៨ ខែដដែល។ យ៉ាងណាក្ដី លោក វីដូដូ ក៏បានប្រាប់នាយករដ្ឋមន្ត្រីអូស្ត្រាលី លោក Malcolm Turnbull រួចរាល់ដែរហើយពីការពន្យារពេលទស្សនកិច្ចនេះ។
ប្រភពព័ត៌មានដដែលបន្តថា ប្រធានាធិបតីឥណ្ឌូណេស៊ី ក៏បានប្រាប់ឲ្យរដ្ឋមន្ត្រីការបរទេស លោកស្រី Retno Marsudi ពិភាក្សាជាមួយសមភាគីអូស្ត្រាលី លោកស្រី Julia Bishop ដើម្បីរៀបចំពេលវេលានៃដំណើរទស្សនកិច្ចថ្មី។ ទស្សនកិច្ចលើកនេះ គឺជាការធ្វើឲ្យប្រសើរឡើងវិញទំនាក់ទំនងប្រទេសទាំងពីរ ដែលធ្លាប់ធ្លាក់ចុះដោយសារជនចំណាកស្រុក។
សូមរម្លឹកថា នៅថ្ងៃទី៤ ខែវិច្ឆិកា ក្រុមបាតុករជ្រុលនិយមរាប់ពាន់នាក់ បានមកប្រមូលផ្ដុំគ្នានៅកណ្ដាលក្រុងហ្សារកាតា ដើម្បីទាមទារឲ្យអភិបាលក្រុង លោក Ahok លាលែងពីតំណែង ដោយបានចោទប្រកាន់ថា បានមើលងាយគម្ពីរកូរ៉ានរបស់សាសនាឥស្លាម។ បាតុកម្មនេះ ក៏ឈានដល់ការប្រើអំពើហិង្សារវាងបាតុករជ្រុលនិយម និងក្រុមមន្ត្រីប៉ូលិស ដែលបានធ្វើឲ្យមនុស្សម្នាក់ស្លាប់ និង១២នាក់ទៀតរងរបួស។
ប្រធានាធិបតី ចូកូ វីដូដូ ក៏បានចោទប្រកាន់អ្នកនយោបាយថា នៅពីក្រោយបាតុកម្មនេះ និងទញយកផលប្រយោជន៍ពីក្រុមបាតុករ។ អាគារប្រធានាធិបតី អាគាររដ្ឋសភា និងទីតាំងក្បែរផ្ទះលោក Ahok សុទ្ធតែឡោមព័ទ្ធដោយក្រុមបាតុករ ខណៈបាតុករខ្លាំងថែមទាំងគំរាមសម្លាប់អភិបាលក្រុងររូបនេះផងដែរ៕
Tag:
ឥណ្ឌូណេស៊ី
អូស្ត្រាលី
© រក្សាសិទ្ធិដោយ thmeythmey.com