បក្សប្រឆាំង ជ្រើសរើសតំណាងរាស្ត្រថ្មី ជំនួសលោក ប៉ែន សុវណ្ណ

ជាតិ

នយោបាយជាតិ

បក្សប្រឆាំង ជ្រើសរើសតំណាងរាស្ត្រថ្មី ជំនួសលោក ប៉ែន សុវណ្ណ

11, Nov 2016 , 8:19 am

រូបភាព

ដោយ: ម៉ៅ សុផា

ភ្នំពេញ៖ គណបក្សសង្គ្រោះជាតិ សម្រេចដាក់លោក សួន រីដា ជាបេក្ខជនតំណាងរាស្ត្រថ្មី ជំនួសលោក ប៉ែន សុវណ្ណ ដែលទើបតែទទួលមរណភាព។ ការសម្រេចនេះ ធ្វើឡើងបន្ទាប់ពីសពលោក ប៉ែន សុវណ្ណ ត្រូវបានបូជារួចរាល់ កាលពីប៉ុន្មានថ្ងៃមុន។

គណបក្សសង្គ្រោះជាតិ បានបញ្ជូនឈ្មោះលោក សួន រីដា បេក្ខជនតំណាងរាស្ត្រថ្មី ជំនួសលោក ប៉ែន សុវណ្ណ ទៅកាន់គណៈកម្មាធិការជាតិរៀបចំការបោះឆ្នោត (គ.ជ.ប) រួចហើយ។ បន្ទាប់មក គ.ជ.ប នឹងបន្តបញ្ជូនឈ្មោះលោក សួន រីដា ទៅកាន់រដ្ឋសភា ដើម្បីសម្រេចជាផ្លូវការ។ នេះជានីតិវិធីក្នុងការដាក់បេក្ខជនតំណាងរាស្ត្រថ្មី ដែលលោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិ ប្រាប់សារព័ត៌មានថ្មីៗតាមទូរសព្ទនៅថ្ងៃព្រហស្បតិ៍នេះ។

លោក យឹម សុវណ្ណ ប្រាប់ពីមូលហេតុថា ការជ្រើសរើសលោក សួន រីដា ជាបេក្ខជនតំណាងរាស្ត្រថ្មី ប្រចាំខេត្តកំពង់ស្ពឺ ជំនួសលោក ប៉ែន សុវណ្ណ គឺដោយសារតែ លោក សួន រីដា គឺជាបេក្ខជនទី៤ ដែលឈរឈ្មោះជាតំណាងរាស្ត្រ នៅខេត្តកំពង់ស្ពឺ។ អ្នកនាំពាក្យបក្សប្រឆាំងរូបនេះ បានបញ្ជាក់បែបនេះថា៖«តាមគោលការណ៍ យើងត្រូវតែដាក់គាត់ (លោក សួន រីដា) ជំនួសឯកឧត្តម ប៉ែន សុវណ្ណ។ វា ជារឿងធម្មតាទេ ដែលយើងដាក់គាត់ ព្រោះគាត់ជាបេក្ខជនទី៤»។

ទាក់ទងនឹងបញ្ហាខាងលើ លោក ហង្ស ពុទ្ធា អ្នកនាំពាក្យរបស់គ.ជ.ប បានអះអាងថា គ.ជ.ប នឹងបើកកិច្ចប្រជុំមួយ ដើម្បីផ្ទៀងផ្ទាត់ពីលក្ខខណ្ឌផ្សេងៗ មុននឹងបញ្ជូនឈ្មោះលោក សួន រីដា ទៅឲ្យរដ្ឋសភាអនុម័ត។ ប៉ុន្តែ លោក ហង្ស ពុទ្ធា មិនទាន់បញ្ជាក់បានទេ ថាគ.ជ.ប នឹងបើកកិច្ចប្រជុំពីបញ្ហានេះ នៅពេលណា។ លោក លើកឡើងថា៖«ឥឡូវហ្នឹង លិខិតរបស់គណបក្សសង្គ្រោះជាតិ មិនទាន់មកដល់ដៃខ្ញុំទេ ប្រហែលជានៅនាយកដ្ឋានផ្នែករដ្ឋបាល ហើយមើលទៅ។ ទាល់តែលិខិតហ្នឹង មកដល់ខ្ញុំសិន ទើបយើងដឹងថា ពិភាក្សាគ្នានៅពេលណា»។

តំណាងរាស្ត្របីរូប ពីគណបក្សសង្គ្រោះជាតិ ដែលជាប់ឆ្នោតនៅខេត្តកំពង់ស្ពឺ គឺលោក ប៉ែន សុវណ្ណ លោក សុខ អ៊ុំស៊ា និង នុត រំដួល។ ចំណែកឯ លោក សួន រីដា ជាបេក្ខជនទី៤ ដែលឈរឈ្មោះជាតំណាងរាស្ត្រនៅខេត្ត កំពង់ស្ពឺផងដែរ។ ដូច្នេះ លោក សួន រីដា ត្រូវតែជាបុគ្គលដែលមានអាទិ៍ភាពមុនគេ ដើម្បីក្លាយជាបេក្ខជនតំណាងរាស្ត្រថ្មី ជំនួសលោក ប៉ែន សុវណ្ណ។

សូមរម្លឹកថា លោក ប៉ែន សុវណ្ណ តំណាងរាស្ត្រពីគណបក្សសង្គ្រោះជាតិ ហើយក៏ជាអតីតនាយករដ្ឋមន្ត្រីក្នុងសម័យសាធារណរដ្ឋប្រជាមានិតកម្ពុជាផងនោះ បានទទួលមរណភាព ក្នុងជន្មាយុ៨០ឆ្នាំ ដោយរោគាពាធ កាលពីថ្ងៃទី២៩ ខែតុលា ឆ្នាំ២០១៦។ នៅថ្ងៃទី២ ខែវិច្ឆិកា ឆ្នាំ២០១៦ គណបក្សសង្គ្រោះជាតិ រួមទាំងគ្រួសារ បានសម្រេចដង្ហែសពលោក ប៉ែន សុវណ្ណ ពីខេត្តតាកែវ មកតម្កល់ទុកក្នុងវត្តនួនមណីរាម ហៅវត្តថាន់ ស្ថិតក្នុងរាជធានីភ្នំពេញ។ រហូតដល់ថ្ងៃទី៦ ខែវិច្ឆិកា ឆ្នាំ២០១៦ សពលោក ប៉ែន សុវណ្ណ ក៏ត្រូវបានដង្ហែចេញពីវត្តថាន់ ទៅបូជានៅវត្តឫស្សីសាញ់ ដែលស្ថិតក្នុងសង្កាត់ព្រៃស ខណ្ឌដង្កោ រាជធានីភ្នំពេញ៕