ជាតិ
នយោបាយជាតិ
លោក អេង ឆៃអ៊ាង នឹងកោះហៅសម្ដេច ស ខេង សាកសួរករណីលោក កែម ឡី ក្រោយចូលបំពេញការងាររដ្ឋសភាវិញ
× ភ្នំពេញ៖ ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេតទំនាក់ទំនងរដ្ឋសភា ព្រឹទ្ធសភា លោក អេង ឆៃអ៊ាង នឹងកោះហៅរដ្ឋមន្ត្រីក្រសួងមហាផ្ទៃសម្ដេច ស ខេង សាកសួរព័ត៌មានបន្ថែមជុំវិញករណីឃាតកម្មលើលោក កែម ឡី។ លោក អេង ឆៃអ៊ាង នឹងសាកសួរសម្ដេច ស ខេង ក្រោយចូលបំពេញការងាររដ្ឋសភាវិញ។
គណបក្សសង្គ្រោះជាតិនៅតែរក្សាជំហបន្តយុទ្ធនាការជួយរកយុត្តិធម៌ជូនលោក កែម ឡី ដែលត្រូវបានឃាតករបាញ់សម្លាប់កាលពីថ្ងៃទី១០ កក្កដាកន្លងមក។ មន្ត្រីជាន់ខ្ពស់គណបក្សសង្គ្រោះជាតិលោក អេង ឆៃអ៊ាង អះអាងថា លោកនឹងកោះអញ្ជើញរដ្ឋមន្ត្រីក្រសួងមហាផ្ទៃសម្ដេច ស ខេង មកសួរនាំពីដំណើរការស៊ើបអង្កេតអ្នកនៅពីក្រោយខ្នងលើករណីបាញ់សម្លាប់លោក កែម ឡី ដើម្បីលុបបំបាត់ការសម្លាប់អ្នកគ្មានទោសពៃរ៍ ដោយសារការបញ្ចេញមតិនៅក្នុងសង្គម។ បើតាមលោក អេង ឆៃអ៊ាង ការកោះហៅសម្ដេច ស ខេង នេះនឹងត្រូវធ្វើឡើងបន្ទាប់ពីរូបលោកនិងតំណាងរាស្ត្រគណបក្សសង្គ្រោះជាតិ ចូលបម្រើការងារនៅក្នុងរដ្ឋសភាវិញ។
ថ្លែងប្រាប់សារព័ត៌មានថ្មីៗ មន្ត្រីជាន់ខ្ពស់គណបក្សសង្គ្រោះជាតិរូបនេះ បានបញ្ជាក់ថា៖«ក្នុងនាមជាគណកម្មការទី១ ដែលធ្វើការងារពាក់ព័ន្ធនឹងសិទ្ធិមនុស្ស យើងនឹងកោះហៅរដ្ឋមន្ត្រីមកសាកសួរ។ ដូចករណីលោក កែម ឡី នេះគឺជារឿងប៉ះពាល់ដល់សិទ្ធិមនុស្សធ្ងន់ធ្ងរដូចនេះយើងនឹងកោះហៅរដ្ឋមន្ត្រីក្រសួងមហាផ្ទៃ មកសាកសួរ តែមិនអាចទាន់ធ្វើនៅពេលនេះទេ ទាល់តែតំណាងរាស្ត្រយើងចូលបំពេញការងាររដ្ឋសភាវិញ»។
បន្ថែមពីលើនេះលោក អេង ឆៃអ៊ាង បញ្ជាក់ថា គណបក្សលោកនឹងប្រជុំគ្នានៅរសៀលថ្ងៃទី១៨ វិច្ឆិកា មុនសម្រេចចូលបំពេញការងារនៅក្នុងរដ្ឋសភាវិញ ។
ជុំវិញករណីឃាតកម្មលើលោក កែម ឡី នេះ អ្នកនាំពាក្យក្រសួងមហាផ្ទៃលោក ខៀវ សុភ័គ បានបញ្ជាក់ប្រាប់សារព័ត៌មានថ្មីៗកន្លងមកថា «សំណុំឯកសារស៊ើបអង្កេតបានបញ្ជូនទៅតុលាការអស់ហើយ»។
សូមបញ្ជាក់ថា លោក កែម ឡី ដែលជាអ្នកស្រាវជ្រាវ និងបញ្ចេញមតិដោះស្រាយលើបញ្ហាសង្គម ត្រូវបានឃាតកបាញ់សម្លាប់ នៅក្នុងស្តាម៉ាតមួយ ដែលស្ថិតនៅម្តុំស្តុបបូកគោ កាលពីព្រឹកថ្ងៃទី១០ ខែកក្កដា ឆ្នាំ២០១៦។ សមត្ថកិច្ចបានចាប់ខ្លួនឃាតករភ្លាមៗ ដោយអះអាងថា ឈ្មោះ ជួប សម្លាប់។ គិតរហូតមកដល់ថ្ងៃនេះ ឃាតកម្មលើលោក កែម ឡី មានរយៈពេលជាង៤ខែហើយ៕
Tag:
អេង ឆៃអ៊ាង
ស ខេង
កែម ឡី
© រក្សាសិទ្ធិដោយ thmeythmey.com