ជាតិ
បទយកការណ៍ / បទសម្ភាសន៍
យើងគួនាំគ្នាប្រើប្រាស់បណ្តាញសង្គមនៅកម្ពុជាប្រកបដោយប្រយោជន៌ និងសេចក្តីថ្លៃថ្នូរ
× លិខិតមិត្តអ្នកអាន
សព្វថ្ងៃនេះ បណ្តាញសង្គមហ្វេសប៊ុក (Facebook)គឺជាទីពេញនិយមរបស់ប្រជាជនកម្ពុជា និងនៅលើពិភពលោក។ ការប្រើប្រាស់បណ្តាញសង្គមមួយនេះនៅកម្ពុជា ភាគច្រើនគឺអ្នកប្រើប្រាស់ក្នុងគោលបំណងស្វែងរកមិត្ត បង្ហោះរូបភាព និងវីដេអូ ជជែកកំសាន្ត ផ្សព្វផ្សាយពាណិជ្ជកម្ម ការចែករំលែកព័ត៌មាន និងដំណឹងទាន់ហេតុការណ៍ជាតិ និងអន្តរជាតិ។ល។
ការផ្សព្វផ្សាយតាមបណ្តាញសង្គមហ្វេសប៊ុកភាគច្រើន គឺជាដំណឹងដែលអាចមានផលពីរគឺវិជ្ជមាន និងអវិជ្ជមាន។ វិជ្ជមានគឺអាស្រ័យដោយអ្នកសរសេរព័ត៌មាន និងផ្សព្វផ្សាយជាដំណឹងនោះ ជាអ្នកមានក្រមសីលធម៌ និងវិជ្ជាជីវៈសារព័ត៌មាន ហើយអវិជ្ជមានគឺកើតឡើងដោយអ្នកសរសេរជាប្រជាពលរដ្ឋ មិនមានវិជ្ជាជីវៈសារព័ត៌មានត្រឹមត្រូវ។ បច្ចុប្បន្ននេះ បណ្តាញសង្គមមួយនេះ បានក្លាយទៅជាទីផ្សព្វផ្សាយដំណឹងយ៉ាងរហ័សបំផុត ហើយគ្រប់ដំណឹងទាំងអស់គឺមិនអាចទទួលយកបានទាំងអស់នោះទេ ពោលគឺអ្នកប្រើហ្វេសប៊ុកដែលនិយមតាមដានព្រឹត្តិការណ៍នានា ចាំបាច់ត្រូវចេះពិចារណាឲ្យបានល្អិតល្អន់ មុននឹងសម្រេចចិត្តទទួលយកដំណឹងនោះ។ អ្នកប្រើប្រាស់ហ្វេកប៊ុក គឺមិនមែនជាអ្នកអនក្ខរកម្ម ឬមិនចេះអ្វីនោះទេ យ៉ាងហោចណាស់ក៏មានការយល់ដឹងក្នុងការប្រើប្រាស់ស្មាតហ្វូន ឬកុំព្យូទ័រដែរ ដូច្នេះអ្នកប្រើប្រាស់ត្រូវចេះពិចារណា វិភាគថាតើដំណឹងនោះអាចទទួលយកជាការបានឬទេ ឬជាការផ្សាយធ្វើឲ្យសង្គមមានចលាចល និងមានភាពវឹកវរ។
ជាក់ស្តែង នាពេលថ្មីៗនេះ មានការចែកចាយតគ្នា និងមានការជជែកវែកញែកជាច្រើនលើបណ្តាញសង្គមហ្វេសប៊ុកស្តីពីបញ្ហាអង្ករប្លាស្ទិក។ ដំណឹងចចាមអារាមនេះ បានធ្វើឲ្យមានការយល់ច្រឡំនៅក្នុងស្រទាប់អ្នកប្រើប្រាស់បណ្តាញសង្គមហ្វេសប៊ុកពាក់ព័ន្ធនឹងអង្ករនៅកម្ពុជា ប៉ុន្តែការពិតនោះ គឺមិនមានអង្ករប្រភេទនេះទេ។ អ្នកប្រើប្រាស់ហ្វេសប៊ុកត្រូវតែពិចារណា និងចេះវិភាគថាតើសីតុណ្ហភាពដាំបាយអាចរំលាយបា្លស្ទិចបានដែរឬទេ? ប្លាស្ទិចមិនស្អិតជាប់គ្នាដូចអង្ករ ហើយមិនងាយរលាយនោះទេ។ អ្នកជំនាញគីមីចំណីអាហារ ក៏បានបញ្ជាក់ដែរថាគ្មានអង្គរប្លាស្ទិចទេ តែមានអង្ករសិប្បនិម្មិត ដែលជាប្រភេទអង្ករផលិតចេញពីអង្ករលាយជាមួយម្សៅ ពោត ដំឡូង ដែលមានលក្ខណៈងាយស្រួលក្រោយពេលដាំឆ្អិន។ ភាគច្រើននៃយុវវ័យដែលកំពុងប្រើប្រាស់ហ្វេសប៊ុក ក៏ជាសិស្សនិស្សិតដែលបានឆ្លងកាត់ការសិក្សាយ៉ាងហោចណាស់ក៏បញ្ចប់ត្រឹមថ្នាក់មធ្យមសិក្សាទុតិយភូមិដែរហើយពួកគេសុទ្ធតែបានរៀនសូត្រមុខវិជ្ជាគីមីវិទ្យាហេតុអ្វី យុវវ័យយើងមិនពិចារណា និងវិភាគអំពីបញ្ហានេះឲ្យបានល្អិតល្អន់ បែរជាបន្តបំផុសដំណឹងមិនពិតប្រាកដនេះឲ្យបំពុលសង្គមទៅវិញ។
ថ្មីៗនេះដែរ កាលពីថ្ងៃទីពីរនៃព្រះរាជពិធីបុណ្យអំទូក បណ្តែតប្រទីប អកអំបុក និងសំពះព្រះខែក៏មានផ្ទុះការរិះគន់ដល់សមត្ថកិច្ចក្នុងបណ្តាញសង្គមពីសំណាក់អ្នកប្រើប្រាស់ចំពោះករណីសមត្ថកិច្ចបានឃាត់ខ្លួនលោកតាចាស់ម្នាក់ ដើរលក់ចំពាមកៅស៊ូ កាំបិត ពូថៅ រណារ នៅក្នុងព្រះរាជពិធីអ៊ុំទូក នៅរាជធានី ភ្នំពេញ។ ហេតុអ្វី អ្នកប្រើហ្វេសប៊ុករិះគន់ដល់សមត្ថកិច្ច មិនពិចារណាអំពីផលប៉ះពាល់របស់វាសិន មុននឹងនាំគ្នាបញ្ចេញមតិបន្ទោសសមត្ថកិច្ចដែលអនុវត្តន៍តាមតួនាទី។ លោកតាម្នាក់នោះ នឹងមិនខុសទេ បើសិនជាគាត់លក់ចំពាមខុសពីថ្ងៃប្រារព្ធពិធីបុណ្យរបស់ជាតិ ឬក៏ថ្ងៃធម្មតា ក៏ប៉ុន្តែគាត់បានដើរលក់នៅក្នុងពេលវេលាមួយដែលមានមនុស្សច្រើនកុះករដើរកំសាន្ត វាអាចនឹងមានផលវិបាកបើសិនជាមានជនខិលខូចទិញចំពាម ឬវត្ថុផ្សេងៗដែលគាត់លក់នោះទៅប្រព្រឹត្តអំពើណាមួយបង្កភាពចលាចលក្នុងព្រះរាជពិធី និងនាំឲ្យមានការផ្អើលឆោឡោបង្កជាសោកនាដកម្មផ្សេងៗ។ ម្យ៉ាងទៀត សមត្ថកិច្ចគ្រាន់តែរឹបអូសសម្ភារៈ និងឃាត់ខ្លួនសួរនាំ អប់រំហើយបានដោះលែង និងប្រគល់សម្ភារៈជូនលោកតានោះវិញផងដែរ។
ហេតុដូច្នេះ អ្នកប្រើប្រាស់បណ្តាញសង្គមគ្រប់វ័យ ត្រូវតែបើកខួរក្បាល ពិចារណាឲ្យបានល្អិតល្អន់ មុននឹងទទួលយកដំណឹងដែលផ្សព្វផ្សាយតាមបណ្តាញសង្គមហ្វេសប៊ុក ឬក៏បញ្ចេញមតិ ប្រតិកម្មទៅលើអ្វីមួយដោយមិនសមហេតុផល។ ហើយចំពោះសេរីភាពការបញ្ចេញមតិ នៅប្រទេសណាក៏ដូចជាប្រទេសណាដែរ គឺគ្រប់ដណ្តប់ដោយច្បាប់របស់ប្រទេសនោះ បើយើងសម្តែងឡើងលើសដែនកំណត់បង្កបញ្ហាដល់អ្នកដទៃ បង្កភាពវឹកវរក្នុងសង្គម បំផ្លាញទ្រព្យសម្បត្តិរដ្ឋ និងឯកជន នោះអ្នកនឹងមានទោសទៅតាមច្បាប់។ ជាងនេះទៅទៀតយុវវ័យដែលនិយមប្រើប្រាស់ហ្វេសប៊ុក គួរតែចូលរួមប្រតិកម្ម និងបញ្ចេញមតិឲ្យបានច្រើនទៅលើអ្វីដែលជាប្រយោជន៍ដល់សង្គមដូចជាបញ្ហាបរិស្ថានជាដើម។
© រក្សាសិទ្ធិដោយ thmeythmey.com