ជាតិ
ពីនេះ ពីនោះ
សង្គមជាតិ
ការសិក្សាបង្ហាញថា បុគ្គលិកធ្វើការនៅក្រុមហ៊ុនតូច សប្បាយចិត្តជាងអ្នកនៅក្រុមហ៊ុនធំ
× វិទ្យាស្ថាន The Happiness Research Institute របស់ដាណឺម៉ាក បានផ្សព្វផ្សាយរបាយការណ៍មួយស្តីពី Job Satisfaction Index 2016 ដែលបង្ហាញឲ្យឃើញថា បុគ្គលិកដែលធ្វើការនៅក្រុមហ៊ុនតូចតាច តែងតែមានភាពសប្បាយរីករាយជាងបុគ្គលិកដែលធ្វើការនៅក្រុមហ៊ុនធំៗ។
ការសិក្សាដែលធ្វើឡើងនៅដាណឺម៉ាក ដែលត្រូវបានគេទទួលស្គាល់ថា ជាប្រទេសមានភាពរីករាយជាងគេលើពិភពលោក បានផ្តោតលើចំណុចសំខាន់ៗមួយចំនួន រួមមាន ប្រាក់បៀវត្សរ៍ ការជះឥទ្ធិពល មិត្តរួមការងារ សមិទ្ធផល ការដឹកនាំ ជំនាញ ការតាំងចិត្ត និងតុល្យភាពនៃអាជីព និងជីវិតរស់នៅ។
លទ្ធផលបានបង្ហាញថា មនុស្សជាច្រើនរីករាយជាមួយបរិយាកាសការងារ ជាជាងបង្ហាញអារម្មណ៍រំភើបជាមួយប្រាក់បៀវត្សរ៍។ អ្នកជំនាញបានលើកឡើងថា បរិយាកាសការងារនៅក្រុមហ៊ុនតូចៗ មានសភាពល្អច្រើនជាងកន្លែងការងារធំៗ ។
សញ្ញាដែលទាក់ទាញបុគ្គលិកនៅក្រុមហ៊ុនតូចៗបំផុតនោះ គឺ មោទកភាពចំពោះការងារខ្លួន ការទទួលបានបទពិសោធន៍លើវិជ្ជាជីវៈ មានការសម្រេចដើម្បីភាពរីកចម្រើនរបស់ស្ថាប័ន ការនិងការមានអារម្មណ៍លើការអភិវឌ្ឍន៍សមត្ថភាពផ្ទាល់ខ្លួន ជាដើម។
ទាក់ទងនឹងការតាំងចិត្តក្នុងការបំពេញការងារ កន្លែងដែលមានបុគ្គលិកតិចជាង១០នាក់ មានលក្ខណៈល្អប្រសើរជាងកន្លែងដែលមានបុគ្គលិកចាប់ពី១០នាក់ ទៅ៩៩នាក់។ រីឯកន្លែងដែលមានបុគ្គលិកពី១០០ ទៅប្រមាណ៥០០នាក់នោះ អារម្មណ៍ល្អរបស់បុគ្គលិកមានការធ្លាក់ចុះជាលំដាប់។
របាយការណ៍ Job Satisfaction 2016 បានបង្ហាញឲ្យឃើញថា បុគ្គលិកនៅក្រុមហ៊ុនតូចៗ យល់ថា ពួកគេជាផ្នែកមួយពិតប្រាកដរបស់ក្រុមហ៊ុន និងជាអ្នកដែលមានឥទ្ធិពលលើការរីកចម្រើននានា។ ករណីនេះ ខុសពីក្រុមហ៊ុនធំៗ ដែលគម្លាតរវាងបុគ្គលិក និងថ្នាក់ដឹកនាំហាក់ដូចជានៅឆ្ងាយ៕
© រក្សាសិទ្ធិដោយ thmeythmey.com