ជាតិ
សង្គមជាតិ
ក្រសួងសុខាភិបាល ហាមមិនឲ្យគ្រូពេទ្យព្យួរសេរ៉ូមអ្នកជំងឺពេលដឹកតាមម៉ូតូ
លោក ម៉ម ប៊ុនហេង រដ្ឋមន្រ្តីក្រសួងសុខាភិបាល
×![]()
ដោយ: ថ្មីៗ
ក្រសួងសុខាភិបាល បានចេញសារាចរណែនាំ បង្គាប់ឲ្យគ្រូពេទ្យទាំងអស់ ត្រូវគោរពវិជ្ជាជីវៈរបស់ខ្លួនឲ្យបានល្អ ។ សារាចរនោះ បានបញ្ជាក់ថា កន្លងមកមានគ្រូពេទ្យខ្លះព្យួរសេរ៉ូមដល់អ្នកជំងឺ ហើយឲ្យអ្នកជំងឺជិះម៉ូតូនៅតាមដងផ្លូវសាធារណៈ ដែលខុសនឹងវិជ្ជាជីវៈ។ 
សារាចរណែនាំរបស់ក្រសួងសុខាភិបាល កាលពីថ្ងៃទី ៧ ខែធ្នូ ស្តីពីការមិនអនុញ្ញាតឲ្យប្រើប្រាស់ការព្យួរសេរ៉ូមដោយជិះម៉ូតូតាមដងផ្លូវសាធារណៈ បានលើកឡើងថា កន្លងមកមានអ្នកប្រកបវិជ្ជាជីវៈសុខាភិបាលខ្លះ មិនទាន់អនុវត្តតាមសារាចរណែនាំរបស់ក្រសួងត្រឹមត្រូវឡើយ ដូចជា ការព្យាបាលអ្នកជំងឺដោយដាក់សេរ៉ូមធ្វើដំណើរពីមន្ទីរពេទ្យ ឬគ្លីនិចផ្ទះពេទ្យ ទៅកាន់ផ្ទះរបស់អ្នកជំងឺ។ ក្រសួងចាត់ទុកទង្វើនេះថា ជាការប្រាសចាកពីក្រមសីលធម៌ វិជ្ជាជីវៈពេទ្យ។
ចំណុចទី ១ នៃសារាចរនោះ បានបញ្ជាក់យ៉ាងនេះថា៖«រាល់គ្រប់សេវាព្យាលបាលថែទាំទាំងអស់ ទាំងសេវាសាធារណ និងឯកជន ត្រូវបញ្ឈប់ការដាក់សេរ៉ូម ព្យួរតាមដងផ្លូវសាធារណៈ លើកលែងតែគ្រូពេទ្យព្យាបាល យល់ថា នេះជាករណីសង្គ្រោះបន្ទាន់ ក្នុងការបញ្ជូនអ្នកជំងឺ ទៅកាន់មន្ទីរពេទ្យដោយមានរថយន្តសង្គ្រោះត្រឹមត្រូវ»។ ជាមួយគ្នានេះ ក្រសួងក៏ណែនាំដល់គ្រូពេទ្យ អនុវត្តឲ្យបានខ្ជាប់ខ្ជួន និងត្រឹមត្រូវ ចំពោះការពិនិត្យព្យាបាលជំងឺ ដោយគោរពតាមនិយាមវិជ្ជាជីវៈបច្ចេកទេសសុខាភិបាល និងយកចិត្តទុកដាក់ចំពោះអ្នកជំងឺ ក្នុងការជួយសង្គ្រោះជីវិតឲ្យបានទាន់ពេល។
បន្ថែមពីលើនេះ សារាចររបស់ក្រសួង ក៏ប្រាប់អ្នកប្រកបវិជ្ជាជីវៈពេទ្យនេះ ពោលគឺពេទ្យត្រូវធ្វើការពន្យល់ បកស្រាយ ឆ្លើយតប រាល់សំណូមពរទាំងឡាយ ពីប្រជាពលរដ្ឋ ដែលជាអ្នកជំងឺនូវស្ថានភាពជំងឺ សារៈសំខាន់ និងផលវិបាកនៃការវះកាត់ ព្រមទាំងការប្រើប្រាសឱសថ ក្នុងនោះមានសេរ៉ូមដែលមិនមានការចាំបាច់ផងដែរ។
Tag:
ម៉ម ប៊ុនហេង
© រក្សាសិទ្ធិដោយ thmeythmey.com
