អន្តរជាតិ
អគ្គលេខាធិការ UN ថ្មី ស្បថចូលកាន់តំណែង ហើយសន្យានាំការផ្លាស់ប្ដូរ អគ្គលេខាធិការជ្រើសតាំង António Guterres ស្បថចូលកាន់តំណែង (រូបភាព UN)
× អគ្គលេខាធិការថ្មីអង្គការសហប្រជាជាតិលោក António Guterres បានស្បថចូលកាន់តំណែងហើយនៅថ្ងៃទី១២ ខែធ្នូ ដើម្បីជំនួសលោក បាន គីមូន ដែលចប់អាណត្តិ។ លោកសន្យាផ្លាស់ប្ដូរអង្គការអន្តររដ្ឋាភិបាលមួយនេះ ដើម្បីដោះស្រាយបញ្ហាប្រឈមដែលសហគមន៍អន្តរជាតិកំពុងជួបប្រទះនាពេលបច្ចុប្បន្នរាប់ទាំងជម្លោះនៅស៊ីរី វិបត្តិជនភៀសខ្លួន និងបម្រែបម្រួលអាកាសធាតុ។
អតីតនាយករដ្ឋមន្ត្រីព័រទុយហ្កាល់ António Guterres បានស្បថចូលកាន់តំណែងជាអគ្គលេខាធិការទី៩ របស់អង្គការសហប្រជាតិ ហើយអាណត្តិ៥ឆ្នាំរបស់លោកនឹងចាប់ផ្ដើមនៅថ្ងៃទី១ ខែមករា ឆ្នាំ២០១៧ ។ លោកត្រូវចូលជំនួសអគ្គលេខាធិការចាស់ បាន គីមូន ដែលនឹងចប់អាណត្តិនៅដំណាច់ឆ្នាំ២០១៦ ។ ការងារជាច្រើនកំពុងរង់ចាំអគ្គលេខាធិការថ្មី ហើយវាក៏ចំពេលដែលអាមេរិកត្រៀមផ្លាស់ប្ដូរមេដឹកនាំផងដែរ។
ថ្លែងក្នុងពិធីដែលធ្វើឡើងនៅមហាសន្និបាតនៅថ្ងៃទី១២ ខែធ្នូ លោក António Guterres និយាយថា អង្គការសហប្រជាជាតិ ត្រូវតែរហ័សរហួន និងមានសមត្ថភាពបំពេញការងារប្រកបដោយប្រសិទ្ធភាព។ លោកបន្តថា អង្គការពិភពលោកនេះ ក៏ត្រូវតែផ្ដោតឲ្យច្រើនលើការបែងចែកការងារ និងធនធានមនុស្ស តែមិនត្រូវផ្ដោតខ្លាំងលើដំណើរការសាំញ៉ាំ និងការិយាធិបតេយ្យឡើយ។
អគ្គលេខាធិការថ្មីរូបនេះ ក៏មិនភ្លេចលើកសរសើរលោក បាន គីមូន ចំពោះកិច្ចការដែលលោកបំពេញនាពេល១០ឆ្នាំមកនេះ។ លោក António Guterres អះអាងថា ការដឹកនាំប្រកបដោយសីលធម៌របស់លោក បាន គីមូន បានជួយតម្រង់អនាគតរបស់អង្គការសហប្រជាជាតិ តាមរយៈការដាក់ចេញរបៀបវារៈឆ្នាំ២០៣០ សម្រាប់ការអភិវឌ្ឍដោយចីរភាព, ការតាំងចិត្តសម្រាប់សន្តិភាពនិងស្ថិរភាព ក៏ដូចជាគំនិតផ្ដួចផ្ដើមដែលទុកប្រជាជនជារឿងសំខាន់នៅក្នុងការងាររបស់អង្គការសហប្រជាជាតិ។
ជាមួយនឹងការស្បថចូលកាន់តំណែងនេះ ប្រមុខថ្មីរបស់អង្គការសហប្រជាជាតិ បានដាក់ចេញចំណុចយុទ្ធសាស្ត្រអាទិភាពបីដូចជា ការងារសន្តិភាព ការគាំទ្រការអភិវឌ្ឍចីរភាព និងកំណែទម្រង់ផ្ទៃក្នុងរបស់អង្គការនេះផ្ទាល់។ ទាក់ទិននឹងបញ្ហាសន្តិភាពនេះ លោក Guterres កត់សម្គាល់ថា អង្គការសហប្រជាជាតិ បំពេញការងាររក្សាសន្តិភាពនៅកន្លែងដែលគ្មានសន្តិភាព។ ដូច្នេះការកែទម្រង់គឺជារឿងចាំបាច់។
ការងារសំខាន់មួយទៀត គឺការកែទម្រង់របៀបធ្វើការរបស់អង្គការសហប្រជាជាតិ ដែលរងការរិះគន់ខ្លាំង។ លោកបានគូសបញ្ជាក់ពីភាពចាំបាច់ក្នុងការកែទម្រង់អ្វីដែលបានធ្វើរួចហើយ និងបន្តអនុវត្តគំនិតផ្ដួចផ្ដើមនៃការកែទម្រង់ដែលមានស្រាប់។ លោកបន្ថែមថា យើងត្រូវការកំណែទម្រង់មួយដែលមានចីរភាពសម្រាប់យុទ្ធសាស្ត្រទំនាក់ទំនង កែប្រែរបៀបរបបការងារដើម្បីជួយដល់ប្រជាជនលើពិភពលោក៕
© រក្សាសិទ្ធិដោយ thmeythmey.com