ជាតិ
រដ្ឋាភិបាល ឲ្យក្រសួងមហាផ្ទៃបង្កើតនាយកដ្ឋានថ្មីពីរបន្ថែមទៀត
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានសម្រេចឲ្យក្រសួងមហាផ្ទៃបង្កើតនាយកដ្ឋាន ថ្មីពីរទៀត គឺ នាយកដ្ឋានគ្រប់គ្រងសន្តិសុខឯកជន និងនាយកដ្ឋានប្រឆាំងបទល្មើសល្បែងពាណិជ្ជកម្ម តបតាមការស្នើរបស់សម្តេច ស ខេង រដ្ឋមន្ត្រីក្រសួងមហាផ្ទៃ។
នាយកដ្ឋានគ្រប់គ្រងសន្តិសុខឯកជន និងនាយកដ្ឋានប្រឆាំងបទល្មើសល្បែងពាណិជ្ជកម្មទាំងពីរនេះ មានតួនាទីត្រួតពិនិត្យគ្រប់គ្រងអាជីវកម្ម និងការជ្រើសរើសភ្នាក់ងារសន្តិសុខតាមក្រុមហ៊ុនឯកជន និងប្រយុទ្ធប្រឆាំងបទល្មើសល្បែងពាណិជ្ជកម្មគ្រប់ប្រភេទ។ នេះបើតាមអនុក្រឹត្យចុះថ្ងៃទី២៨ ខែវិច្ឆិកា ឆ្នាំ២០១៦ កន្លងទៅ។
ជាមួយគ្នានេះ អនុក្រឹត្យដដែលខាងលើ បញ្ជាក់ថា នាយកដ្ឋានថ្មីទាំងពីរនេះ គឺជាសេនាធិការរបស់នាយកដ្ឋានកណ្តាលសន្តិសុខនៃអគ្គស្នងការដ្ឋាននគរបាលជាតិ និងក្រសួងមហាផ្ទៃហើយត្រូវប្រមូលព័ត៌មាន និងធ្វើរបាយការណ៍អំពីសភាពការណ៍ និងហេតុការណ៍ផ្សេងៗ តាមឋានានុក្រមកំណត់។
នាយកដ្ឋាននីមួយៗមានប្រធានមួយរូប និងអនុប្រធានមួយចំនួន ជាជំនួយការ។ នេះបើតាមអនុក្រឹត្យដែលធ្វើឡើងក្រោយពីអគ្គស្នងការដ្ឋាននគរបាលជាតិចង់បង្កើតនាយកដ្ឋានបង្ក្រាបល្បែងស៊ីសង កាលពីជាង ១ខែ កន្លងទៅ ដើម្បីបង្កើនប្រសិទ្ធភាពទប់ស្កាត់បទល្មើសលួចលាក់ខ្លាំង។
តាមអនុក្រឹត្យដែលចុះហត្ថលេខាសម្តេចនាយករដ្ឋមន្ត្រី ហ៊ុន សែន និងសម្តេច ស ខេង រដ្ឋមន្ត្រីក្រសួងមហាផ្ទៃនោះ នាយកដ្ឋានគ្រប់គ្រងសន្តិសុខឯកជន និងនាយកដ្ឋានប្រឆាំង បទល្មើសល្បែងពាណិជ្ជកម្ម អាចបង្កើតការិយាល័យចំណុះមួយចំនួន តាមប្រកាសក្រសួងមហាផ្ទៃ។
បើតាមរបាយការណ៍នគរបាលក្នុងពិធីបើកកិច្ចប្រជុំផ្សព្វផ្សាយសេចក្ដីណែនាំស្ដីពីការអនុវត្តវិធានការបង្ក្រាបល្បែងស៊ីសងខុសច្បាប់ កន្លងទៅ រដ្ឋាភិបាលបានអនុញ្ញាតឲ្យបើកកន្លែងល្បែងស៊ីសងបាន នៅបណ្តាខេត្តឆ្ងាយពីរាជធានីភ្នំពេញលើកលែងតែកាស៊ីណូ ណាហ្គាវើល តែប៉ុណ្ណោះក្រោយពីកម្ពុជាបង្កើតច្បាប់ស្តីពីការបង្ក្រាបល្បែងស៊ីសង ឆ្នាំ១៩៩៦ មក។ គិតត្រឹមត្រីមាសទី៣ ឆ្នាំ២០១៦នេះរដ្ឋាភិបាលបានអនុញ្ញាតឲ្យក្រុមហ៊ុនកាស៊ីណូចំនួន ១៦៨ ក្នុងនោះ ៦៥តាមអនឡាញ ធ្វើអាជីវកម្ម និងបង់ពន្ធស្របច្បាប់នៅកម្ពុជា៕
Tag:
ហ៊ុន សែន
ស ខេង
ក្រសួងមហាផ្ទៃ
© រក្សាសិទ្ធិដោយ thmeythmey.com