ភ្នំពេញ៖ ប្រធានគណបក្សប្រឆាំង ឯកឧត្តម សម រង្ស៊ី បាននិយាយថា គាត់ រួមជាមួយជនកម្ពុជាមួយក្រុមទៀត បានដាក់លិខិតទៅតុលាការអាមេរិក ដើម្បីស្នើឲ្យក្រុមហ៊ុន Chevron ដែលជាម្ចាស់កម្មសិទ្ធិប្រេងសាំងម៉ាក Caltex បញ្ចេញវីដេអូដែលបានថតពីកាមេរ៉ាសុវត្ថិភាពពាក់ព័ន្ធឃាតកម្មលើលោក កែម ឡី នៅស្ថានីយ៍ Caltex ក្នុងទីក្រុងភ្នំពេញ កាលពីខែកក្កដាកន្លងទៅ។
ការដាក់សំណើនេះឯកឧត្តម សម រង្ស៊ី និយាយថា គឺមានគោលបំណងជួយរកយុត្តិធម៌ជូនលោក កែម ឡី ផង និងយកមកធ្វើភស្តុតាងសម្រាប់តទល់រឿងក្តីរបស់លោក ដែលត្រូវបានមេធាវីសម្ដេច ហ៊ុន សែន ប្ដឹងពីបទបរិហាកេរ្តិ៍ ពាក់ព័ន្ធនឹងករណីលោក កែម ឡី នេះផងដែរ។
នៅក្នុងសំណេរអមជាមួយភាសាអង់គ្លេស ដែលបានចុះផ្សាយលើទំព័រហ្វេសប៊ុកខ្លួននោះ ឯកឧត្តម សម រង្ស៊ីបាន និយាយដូច្នេះថា៖ «ប្រធានគណបក្សប្រឆាំងលោក សម រង្ស៊ី ដែលកំពុងប្រឈមមុខនឹងការបង្ខូចកេរ្តិ៍ឈ្មោះ និងត្រូវទទួលខុសត្រូវលើការអត្ថាធិប្បាយខ្លួនលើហ្វេសប៊ុក ដែលភ្ជាប់ករណីឃាតកម្មលើលោក កែម ឡី ទៅជាមួយរដ្ឋាភិបាលនោះ បានស្នើសុំវីដេអូ និងឯកសារពាក់ព័ន្ធផ្សេងទៀត ដើម្បីយកមកការពារក្តីប្រឆាំងនឹងការចោទប្រកាន់ខ្លួន»។
អ្នកស្រាវជ្រាវ និងជាអ្នកវិភាគ លោក កែម ឡី ត្រូវបានឃាតករបាញ់សម្លាប់កាលពីថ្ងៃទី១០ កក្កដា ឆ្នាំ២០១៦ នៅក្នុងស្តាម៉ាតមួយ នាស្ថានីយ៍សាំងកាល់តិច Caltex ក្បែរស្តុបបូកគោ ក្នុងរាជធានីភ្នំពេញ។ Caltex ជាម៉ាកពាណិជ្ជកម្មប្រេងសាំងរបស់ក្រុមហ៊ុន Chevron Corporation ដែលគេប្រើនៅក្នុងជាង ៦០ប្រទេសក្នុងតំបន់អាស៊ីប៉ាស៊ីហ្វ៊ិក មជ្ឈិមបូព៌ា និងអាហ្វ្រ៊ិកខាងត្បូង។
មេធាវីការពារក្តីសម្ដេច ហ៊ុន សែន លោក គី តិច បានដាក់ពាក្យប្ដឹងឯកឧត្តម សម រង្ស៊ី ពីបទបរិហារកេរ្តិ៍ជាសាធារណៈ និងញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»។ សំណុំរឿងរបស់ឯកឧត្តម សម រង្ស៊ី ដែលបង្ហោះសារនៅលើទំព័រហ្វេសប៊ុក ដោយចោទរដ្ឋាភិបាលថា នៅពីក្រោយខ្នងនៃអំពើឃាតកម្មលើលោក កែម ឡី ក៏ត្រូវបានបញ្ជូនទៅជំនុំជម្រះរួចហើយ។ ប៉ុន្តែ ចៅក្រមជំនុំជម្រះ មិនទាន់បានកំណត់កាលបរិច្ឆេទនៃការបើកសវនាការ លើសំណុំរឿងរបស់ឯកឧត្តម សម រង្ស៊ី នោះទេ។
បើតាមសំណេរលើហ្វេសប៊ុកឯកឧត្តម សម រង្ស៊ី ដដែលនោះ ប្រជាជនកម្ពុជាដទៃផ្សេងទៀត ក៏បានដាក់លិខិតទៅតុលាការរដ្ឋកាលីហ្វ័រញ៉ា, សហរដ្ឋអាមេរិក ដើម្បីសហប្រតិបត្តិការជាមួយក្រុមហ៊ុន Chevron ស្នើសុំឲ្យបង្ហាញវីដេអូបាញ់សម្លាប់លោក កែម ឡី នេះដែរ។ ប្រជាជនខ្មែរទាំងនោះ គឺជាអ្នកដែលបានដាក់ពាក្យប្ដឹងរដ្ឋាភិបាលទៅតុលាការអន្តរជាតិICCថា រដ្ឋាភិបាល មានជាប់ពាក់ព័ន្ធនឹងការធ្វើទុកបុកម្នេញទៅលើអ្នករិះគន់ប្រព័ន្ធនយោបាយកម្ពុជា។
ភ្លាមៗក្រោយឃាតកម្មទៅលើលោក កែម ឡី សមត្ថកិច្ចបានចាប់ខ្លួនឃាតករ ដែលបានអះអាងថាឈ្មោះ ជួប សម្លាប់។ ប៉ុន្តែ ជាង៥ខែហើយ ដែលគ្រួសារសពលោក កែម ឡី នៅតែទាមទាឲ្យសមត្ថកិច្ចជួយរកយុត្តិធម៌ជូន លោក កែម ឡី ព្រមទាំងបញ្ចេញវីដេអូពីកាមេរ៉ាសន្តិសុខរបស់ហាងសាំងកាល់តិចនោះផង។
ថ្លែងប្រាប់សារព័ត៌មានថ្មីៗ អ្នកនាំពាក្យក្រសួងមហាផ្ទៃ លោក ខៀវ សុភ័គ បានបញ្ជាក់ថា សំណុំរឿងបាញ់សម្លាប់លោក កែម ឡី នេះ បានបញ្ជូនទៅតុលាការអស់ហើយ ។ លោក ខៀវ សុភ័គ និយាយថា៖ «ជនជាប់ចោទបានសារភាពហើយ សមត្ថកិច្ចបានបន្តស្រាវជ្រាវបន្ថែមទៀត តែគ្មានពន្លឺអ្វីទេ។ ចំណែកភស្តុតាង និងវីដេអូ យើងក៏បានបញ្ជូនទៅតុលាការដែរ តែយើងមិនអាចបង្ហាញជាសាធារណៈបានទេ។ តែបើចង់បញ្ចាំងវីដេអូឃាតកម្មជាសាធារណៈនោះ ទាល់តែគ្រួសារជនរងគ្រោះយល់ព្រម។ ហើយបើសិនជាគ្រួសារជនរងគ្រោះមិនអស់ចិត្ត ពួកគេអាចទៅជាមួយមេធាវីពួកគេ សុំមើលវីដេអូឃាតកម្មនោះ នៅក្នុងតុលាការបាន»៕