ជាតិ
សង្គមជាតិ
លោក ម៉ម ប៊ុនហេង ត្រូវចូលខ្លួនបំភ្លឺបញ្ហាសុខាភិបាលនៅសភា មុនដំណាច់ឆ្នាំនេះ
×![]()
ភ្នំពេញ៖ គណៈកម្មាធិការអចិន្ត្រៃយ៍រដ្ឋសភាបានកំណត់ឲ្យលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ចូលខ្លួនបំភ្លឺជុំវិញបញ្ហាសុខាភិបាល នាសម័យប្រជុំពេញអង្គសភា ថ្ងៃទី២៩ ខែធ្នូ ឆ្នាំ២០១៦ខាងមុខ។
គណៈកម្មាធិការអចិន្ត្រៃយ៍សភាបានសម្រេចឲ្យលោក ម៉ម ប៊ុនហេង ចូលបំភ្លឺផ្ទាល់មាត់ តាមការកោះអញ្ជើញរបស់តំណាងរាស្ត្រគណបក្សសង្គ្រោះជាតិ (CNRP)។
លោក យ៉ែម បុញ្ញឫទ្ធិ ប្រធានគណៈកម្មការទី៧នៃរដ្ឋសភា គឺគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ បានប្រាប់អ្នកសារព័ត៌មានក្រោយបញ្ចប់កិច្ចប្រជុំអចិន្ត្រៃយ៍រដ្ឋសភា នៅថ្ងៃ១៦ ខែធ្នូនេះថា លោក ម៉ម ប៊ុនហេង នឹងឆ្លើយបំភ្លឺសំណួរចំនួន ១០ ដែលអ្នកតំណាងរាស្ត្រគណបក្សសង្គ្រោះជាតិបានស្នើ កន្លងទៅ។
សំណួរទាំង១០ ដែលលោក ម៉ម ប៊ុនហេង ត្រូវចូលខ្លួនបំភ្លឺនោះ រួមមាន ១, ភាពមិនប្រក្រតីក្រោមការទទួលខុសត្រូវរបស់ក្រសួងមានដូចជា ការបាត់ប្រាក់ជំនួយរបស់ Global Fund ទិញមុងការពារជំងឺគ្រុនចាញ់ ការលក់មន្ទីរពេទ្យ និងមន្ទីរពេទ្យបង្អែកមួយចំនួននៅក្នុងរាជធានីភ្នំពេញ និងក្នុងខេត្តមួយចំនួន និងការទិញគ្រឿងបរិក្ខា និងថ្នាំពេទ្យ-ល- ។ ២, ការផ្តល់សេវាមិនត្រឹមត្រូវនៅតាមមន្ទីរពេទ្យរដ្ឋ និងឯកជន។ ៣, វិធានការក្រសួង ក្នុងការពង្រឹងគុណភាពជំនាញពេទ្យ និងការអនុវត្តក្របសីលធម៌។ ៤, ការចែកចាយ និងគ្រប់គ្រងសម្ភារពេទ្យ និងថ្នាំពេទ្យ។ ៥, ការគ្រប់គ្រងមន្ទីរពេទ្យឯកជន និងរថយន្តសង្គ្រោះបន្ទាន់។ ៦, ផែនការធានាបន្តនិរន្តរភាពមន្ទីរពេទ្យគន្ធបុប្ផា។ ៧, កិច្ចគាំពារជនរងគ្រោះពីកំហុសគ្រូពេទ្យ និងការកេងប្រវ័ញ្ច។ ៨, វិធានការរបស់ក្រសួង ក្នុងការផ្តល់សេវាសុខភាពដល់ពលរដ្ឋក្រីក្រឲ្យមានប្រសិទ្ធភាព។ ៩, ការគ្រប់គ្រងការផលិត និងនាំចូលថ្នាំពេទ្យ និងចំណុចទី១០, ការគ្រប់គ្រងឱសថស្ថាន ថ្នាំពេទ្យក្លែងក្លាយ និងថ្នាំពេទ្យខូចគុណភាព៕
Tag:
ម៉ម ប៊ុនហេង
សុខាភិបាល
© រក្សាសិទ្ធិដោយ thmeythmey.com
