បទយកការណ៍ / បទសម្ភាសន៍
ថ្ងៃទី២១ ធ្នូ ជាពេលវេលាដែលយប់វែងជាងថ្ងៃជិតមួយម៉ោង
× ការរកឃើញរបស់ក្រុមតារាសាស្ត្របានបង្ហាញថា នៅថ្ងៃទី២១ ធ្នូនេះ ដំណើរគោចររបស់ថ្ងៃ មានតិចជាងពេលយប់ដល់ទៅជិតមួយម៉ោង ឫយប់វែងជាងពេលថ្ងៃដល់ទៅជិតមួយម៉ោង។ បញ្ហានេះត្រូវបានបកស្រាយ និងពន្យល់ដោយ លោក អ៊ឹម សុខរិទ្ធី អ្នកស្រាវជ្រាវមួយរូបដ៏ល្បីឈ្មោះនៅកម្ពុជា។ លោក សុខរិទ្ធី ពន្យល់ថា សំណង់ប្រាសាទអង្គរវត្ត និងតារាសាស្ត្រ ពិតជាមានទំនាក់ទំនងគ្នា ហើយការសង់អង្គរបែរមុខទៅទិសខាងលិច ក៏មិនមែនជារឿងចៃដន្យនោះដែរ គឺមានការសិក្សាច្បាស់លាស់ពីវិស័យតារាសាស្ត្រ។
នៅថ្ងៃទី២១ ធ្នូនេះ ដំណើរគោចរពេលថ្ងៃមានត្រឹម១១ម៉ោង និង១៩នាទីប៉ុណ្ណោះ។ លោក អ៊ឹម សុខរិទ្ធី ពន្យល់ថា គេអាចមើលដំណើរគោចររវាងថ្ងៃទាំងនេះច្បាស់ ដោយយកកំពូលប្រាសាទអង្គរជាគោលដៅ។
ព្រឹត្តិការណ៍ធំៗចំនួនពីរដែលបានកើតឡើង រវាងតារាសាស្ត្រ និងសំណង់ប្រាសាទអង្គរវត្ត។ ព្រឹត្តិការណ៍ទីមួយ គឺថ្ងៃនិងយប់មានរយៈពេលស្មើគ្នា ហើយវាតែងកើតឡើងរាល់២លើកក្នុងមួយឆ្នាំ គឺអំឡុងខែមីនា និងខែកក្កដា។ ដំណើរគោចររបស់ព្រះអាទិត្យនឹងរះចំកំពូលកណ្តាលនៃប្រាសាទអង្គរវត្ត ហើយរយៈពេលនេះ គឺពេលថ្ងៃនិងយប់មានរយៈពេល១២ម៉ោងស្មើគ្នា។ ចំណែកព្រឹត្តិការណ៍ទីពីរ គឺយប់វែងជាងថ្ងៃ និងថ្ងៃវែងជាងយប់។ ពេលវេលាយប់វែងជាងថ្ងៃ តែងកើតឡើងនៅថ្ងៃទី២១ ធ្នូ ហើយថ្ងៃវែងជាងយប់កើតឡើងនៅថ្ងៃទី២១ មិថុនា។
ព្រឹត្តិការណ៍ដ៏អច្ឆរិយៈនេះ អាចធ្វើឲ្យគេទាញសេចក្តីសន្និដ្ឋានបានយ៉ាងច្បាស់ថា ការសាងសង់សំណង់អង្គរវត្ត ពិតជាបានសិក្សាស៊ីជម្រៅនឹងវិស័យតារាសាស្ត្រ ឫអាចថា ដូនតាអ្នកសង់អង្គរ ពិតជាមានចំណេះដឹងខាងតារាសាស្ត្រជ្រៅជ្រះបំផុត។ លោក អ៊ឹម សុខរិទ្ធី សង្កត់ធ្ងន់ថា៖« ភស្តុតាងនៃសិលាចារិកអ្វីក៏ដោយ យើងសង្កេតដំបូងបំផុត គឺទាក់ទងនឹងតារាសាស្ត្រ គេគិតគួរពេលវេលា ពេលវេលាណាមានជ័យ ពេលវេលាណាល្អឫអាក្រក់ ទើបបានគេសាងសង់ ចឹងតារាសាស្ត្រពីបុរាណបានយល់ច្បាស់ពីរឿងហ្នឹង ចឹងបានយល់ច្បាស់ថា ពេលមួយ កាលមួយ និងកាលមួយនោះ គន្លងមួយហ្នឹងត្រូវចំនឹងកន្លែងហ្នឹង (កំពូងកណ្តាលអង្គរវត្ត) ហើយវាពាក់ព័ន្ធនឹងដំណើររះគោចររបស់ព្រះអាទិត្យ...»។
នេះជាភស្តុតាងមួយទៀតដែលយកមកបញ្ជាក់ពីមួលហេតុដែលប្រាសាទអង្គរវត្តសង់បែរមុខទៅទិសខាងលិច។ លោក សុខរិទ្ធី ពន្យល់ថា គេមិនអាចឃើញព្រឹត្តិការណ៍ខាងលើនោះទេ ប្រសិនបើអង្គរសង់បែរទៅខាងកើត។
ដើម្បីជ្រាបច្បាស់ពីបញ្ហាទាំងនេះ សូមស្តាប់បទសម្ភាសរវាងអ្នកសារព័ត៌មានថ្មីៗប្រចាំខេត្តសៀមរាប និងលោក អ៊ឹម សុខរិទ្ធី អនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរ នៃអាជ្ញាធរជាតិអប្សរា ដូចតទៅ សូមអញ្ជើញស្តាប់
Tag:
តារាសាស្ត្រ និងអង្គរវត្ត
អ៊ឹម សុខរិទ្ធី
អង្គរវត្ត
© រក្សាសិទ្ធិដោយ thmeythmey.com