ខុសពីមេដឹកនាំទូទៅដែលតែងតែព្យាយាមលាក់បាំងពីកំហុស ឬការប្រព្រឹត្តបទល្មើសរបស់ខ្លួន លោកប្រធានាធិបតីហ្វីលីពីនដែលគេតែងប្រៀបធៀបដូចតារារ៉ក់ បែរជាសារភាពថា ធ្លាប់សម្លាប់ឈ្មួញគ្រឿងញៀន និងជនសង្ស័យពាក់ព័ន្ធគ្រឿងញៀនដោយផ្ទាល់ទៀតផង។ លោក ថែមទាំងបង្ហើបពីលក្ខណៈពិសេសរបស់លោក នៅពេលលោក កាន់អំណាចជាអភិបាលក្រុង ដោយលោក អះអាងចូលចិត្តជិះម៉ូតូដើម្បីត្រួតមើលប៉ូលិសធ្វើការ ហើយបើជួបជនសង្ស័យនោះ លោក នឹងសម្លាប់តែម្តង។
ថ្លែងនៅចំមុខក្រុមអ្នកជំនួញក្នុងវិមានប្រធានាធិបតី លោកប្រធានធិបតី រ៉ូឌ្រីហ្គូ ឌើទើតេ (Rodrigo Duterte) នាសប្តាហ៍មុននេះ បាននិយាយថា លោក បានសម្លាប់ជនសង្ស័យពាក់ព័ន្ធការជួញដូរគ្រឿងញៀនដោយផ្ទាល់ នៅពេលដែលលោក ធ្វើជាអភិបាលក្រុងដាវ៉ាវនោះ។ លោក ថ្លែងបែបនេះ ដើម្បីពន្យល់ទាំងក្រុមអ្នកជំនួញ ក៏ដូចជាសាធារណជនឲ្យបានដឹងថា លោក ធា្លប់មានបទពិសោធន៍ក្នុងការធ្វើការបោសសម្អាតគ្រឿងញៀន ដែលជាពិសេសនោះ លោក ប្រែក្លាយក្រុងដាវ៉ាវដែលសម្បូរដោយបទល្មើសក្លាយជាក្រុងឆើតឆាយ និងសន្តិភាពរបស់ហ្វីលីពីននោះ។
សូមជម្រាបផងដែរថា គិតចាប់ពីឡើងកាន់អំណាចជាផ្លូវការជាប្រធានាធិបតីហ្វីលីពីននៅថ្ងៃទី៣០ មិថុនាកន្លងទៅ មានជនសង្ស័យ និងឈ្មួញគ្រឿងញៀនមិនតិចជាង៣០០០នាក់នោះទេត្រូវបានសម្លាប់ក្នុងប្រតិបត្តិការ«សង្គ្រាមប្រឆាំងគ្រឿងញៀន»របស់លោក ឌើទើតេនោះ។ ទោះចំនួនការស្លាប់ដ៏ច្រើន ត្រូវបានរដ្ឋបាលលោកឌើទើតេ អះអាងថាក្នុងប្រតិបត្តិការរបស់ប៉ូលិសដោយស្របច្បាប់ក៏ដោយ ទាំងអង្គការសហប្រជាជាតិ សហភាពអឺរ៉ុប និងអង្គការសិទ្ធិមនុស្សជាច្រើន បានព្រួយបារម្ភ និងទទូចឲ្យហ្វីលីពីនគោរពសិទ្ធិមនុស្ស និងនីតិរដ្ឋ។
ជំនួសដោយការមិនខ្វល់ពីការអំពាវនាវរបស់ស្ថាប័នសិទ្ធិមនុស្ស លោកប្រធានាធិបតី បានប្តេជា្ញបន្តប្រតិបត្តិការបង្ក្រាបនេះ និងថែមទាំងជំរុញទឹកចិត្តប៉ូលិសដោយមិនឲ្យមានការរួញរាដោយលោក បានលើកពីបទពិសោធផ្ទាល់ខ្លួនក្នុងការសម្លាប់ឈ្មួញគ្រឿងញៀនតែម្នាក់ផងនោះ។ ក្នុងវេទិកាជាមួយនឹងអ្នកជំនួញដដែលនោះ លោក បានលើកឡើងយ៉ាងដូច្នេះថា៖«...កាលនៅក្នុងក្រុងដាវ៉ាវ ខ្ញុំ បានសម្លាប់ជនល្មើសដោយផ្ទាល់។ ហើយនេះ ក៏ដើម្បីតែបង្ហាញប៉ូលិសថា ប្រសិនខ្ញុំ អាចធ្វើបាន ហេតុអ្វីអ្នក(ប៉ូលិស) ធ្វើមិនបាន»។
លោក បានសង្កត់ធ្ងន់ថា៖« ខ្ញុំ បានធ្វើដំណើរជុំវិញក្រុងដាវ៉ាវតាមរយៈម៉ូតូ ហើយ ខ្ញុំ ក៏ឆ្លៀតល្បាតតាមដងផ្លូវ និងព្យាយាមស្វែងរកកន្លែងដែលមានបញ្ហា។ ពេលនោះ ខ្ញុំ ចង់ស្វែងរកអ្នកចង់តដៃដើម្បីសម្លាប់ណាស់។»
ឈ្មោះក្រៅជា«អ្នកទណ្ឌកម្ម» ដែលមានវ័យ៧១ឆ្នាំរូបនេះ គឺជាអតីតនិស្សិតច្បាប់នៃពីមហាវិទ្យាល័យ San Beda ហើយលោក ជាអតីតនិស្សិតវិទ្យាសាស្ត្រនយោបាយនៃសាកលវិទ្យាល័យហ្វីលីពីននៅឆ្នាំ១៩៦៨ផងដែរ។ លោក ឌើទើតេ បានប្រលូកខ្លួនក្នុងកិច្ចការជាអ្នកច្បាប់ បន្ទាប់ពីរូបលោក បានប្រលងជាប់ក្នុងគណៈមេធាវីហ្វីលីពីនក្នុងឆ្នាំ១៩៧៣។ បន្ថែមពីនេះ លោក ធ្លាប់ធ្វើជាជំនួយការរដ្ឋអាជ្ញាក្រុងផងដែរ។
លោក ឌើទើតេ បានចូលរួមប្រជែងក្នុងការបោះឆ្នោតជាតិលើកដំបូង និងត្រូវបានជ្រើសរើសជាអភិបាលក្រុងដាវ៉ាវ (Davao) នៅក្នុងឆ្នាំ១៩៨៨។ ហើយលោក បានកាន់កាប់តំណែងនេះរហូតមក ពោលគឺរហូតដល់លោក ត្រូវបានជ្រើសរើសជាប្រធានាធិបតីហ្វីលីពីនតាមរយៈការបោះឆ្នោតថ្ងៃទី០៩ ខែឧសភា ឆ្នាំ២០១៦កន្លងទៅ។
ដូចបានបញ្ជាក់ លោក ឌើទើតេ បានកាន់តំណែងជាអភិបាលក្រុងនៅឆ្នាំ១៩៨៨ ដែលពេលនោះ ក៏ពេលដែលរបបដឹកនាំបែបផ្តាច់ការរបស់អតីតប្រធានាធិបតី ម៉ាកូស ក៏ទើបតែត្រូវបានបញ្ចប់ផងដែរ។ វា ក៏មានន័យថាដែរ វា ក៏ជាពេលដែលហ្វីលីពីន ស្ថិតនៅក្នុងដំណាក់កាលនៃការរៀបចំប្រទេសជាថ្មី ដែលមិនទាន់មានសណ្តាប់សង្គមនៅឡើយនោះទេ។ ជាពិសេសនោះ ទាំងបញ្ហាជួញដូរគ្រឿងញៀន និងការគំរាមកំហែងពីឧទ្ទាម ក៏បានកើតមានខ្លាំង និងច្រើនផងដែរ។
យ៉ាងណាក៏ដោយ ក្នុងអំឡុងពេលនៃការដឹកនាំក្រុងដាវ៉ាវរយៈពេលជាងពីរទសវត្សរ៍ លោក ឌើទើតេ បានប្រែក្លាយទីក្រុងមួយនេះឲ្យក្លាយជាទីក្រុងដែលមានការអភិវឌ្ឍ និងមានសន្តិភាពបំផុតនៃប្រទេសហ្វីលីពីន។ ការណ៍ដែលអាចប្រែក្លាយឲ្យទៅជាបែបនេះ ក៏ព្រោះតែលោក បានអនុវត្តគោលនយោបាយទាក់ទាញអ្នកវិនិយោគតាមរយៈការបោសសម្អាតបទល្មើសដែលជាគោលនយោបាយដែលលោក បាននិងកំពុងតែយកមកអនុវត្តក្នុងនាមជាប្រធានាធិបតីនោះឯង។
មានរឿងដែលនឹកស្មានមិនដល់ជាច្រើន ក្នុងអំឡុងពេលនៃការដឹកនាំរបស់លោក ឌើទើតេ ជាអភិបាលក្រុង។ តែអ្វីដែលគួរកត់សម្គាល់ពីអត្តចរិតរបស់លោកនោះ លោក ឌើទើតេ មិនមែនជាប្រភេទមេដឹកនាំដែលចូលចិត្តការសរសើរពីអ្នកណាឡើយ។ ជាក់ស្តែងនោះ នៅឆ្នាំ២០១៤ លោក បានច្រានចោលការផ្តល់ពានរង្វាន់«អភិបាលក្រុងល្អបំផុតពិភពលោក » ដោយមូលនិធិ The City Mayors ដោយលោកឆ្លើយតបថា «លោក មិនមែនធ្វើការដើម្បីជោគជ័យខ្លួនឯងឡើយ ប៉ុន្តែ ក៏ព្រោះតែ នោះគឺជាអ្វីដែលប្រជាជនចង់ឲ្យលោកធ្វើនោះទេ»៕
ឯកសារពិគ្រោះ៖