ពីនេះ ពីនោះ
ព័ត៍មានសុខភាព
មូលហេតុអត់កូនមួយនេះ ពលរដ្ឋខ្មែរយើង កម្រមានអ្នកដឹងណាស់
× អាការៈអត់កូន នឹងមិនអាចដឹងឡើយ លុះត្រាតែអ្នកព្យាយាម យកកូនច្រើនដងហើយ តែមិនជោគជ័យ។ នេះគឺជាហេតុផលមួយ ដែលអ្នកត្រូវសិក្សាអំពីជីវិត នៃលទ្ធភាពមានកូនរបស់អ្នកសម្រាប់អាយុខ្ទង់ ៣០ ឆ្នាំ។ បើសិនជាអ្នកកំពុងតែព្យាយាម យកកូនរយៈពេលយូរជាង មួយឆ្នាំ តែមិនមានលទ្ធផលនោះ វាអាចដោយសារតែមូលហេតុជាច្រើន ប៉ុន្តែ មូលហេតុដែលពលរដ្ឋខ្មែរយើង កម្រយល់ដឹងនោះគឺ ការកង្វះអ័រម៉ូនទីរ៉ូអ៊ីតក្នុងឈាម។
ស្ត្រីដែលខ្វះអ័រម៉ូនទីរ៉ូអ៊ីតក្នុងឈាម មានន័យថា ក្រពេញទីរ៉ូអ៊ីតរបស់គាត់ មិនអាចផលិតអ័រម៉ូនទីរ៉ូអ៊ីតគ្រប់គ្រាន់ ដូច្នេះ វានឹងប៉ះពាល់យ៉ាងខ្លាំង ដល់រាងកាយរបស់គាត់ ដោយរួមទាំងប្រព័ន្ធប្រដាប់បន្តពូជផងដែរ ជាពិសេស ពិបាកនឹងមានផ្ទៃពោះតែម្តង។ មានផ្ទៃពោះបាន លុះត្រាតែក្រពេញអូវ៉ែជ្រុះអូវុល ហើយបើសិនជាអ្នក មានជំងឺកង្វះអ័រម៉ូនទីរ៉ូអ៊ីតក្នុងឈាម អ្នកប្រហែលជាមិនអាច ជ្រុះអូវ៉ុលចេញពីក្រពេញអូវ៉ែបាន ឬជ្រុះមិនទៀងទាត់ ដូចស្ត្រីធម្មតាឡើយ។ ដោយសារតែអ័រម៉ូនទីរ៉ូអ៊ីត ដើរតួនាទីដ៏សំខាន់ ក្នុងការសម្របសម្រួល មុខងារកោសិកា ដូច្នេះ ភាពមិនធម្មតារបស់អ័រម៉ូននេះ នឹងប៉ះពាល់ដល់ការជ្រុះអូវុល និងលទ្ធភាពនៃការមានកូនដែរ មានន័យថា កាលណាចំនួនរបស់វាតិច វានឹងរំខានដល់មុខងារ របស់ក្រពេញអូវ៉ែ និងធ្វើឲ្យក្រពេញនេះ បញ្ចេញអ័រម៉ូនប្រូហ្សេស្តេរ៉ូន សម្រាប់មករដូវនោះ កាន់តែតិច។
បុរសដែលខ្វះអ័រម៉ូនទីរ៉ូអ៊ីតក្នុងឈាមវិញ មិនសូវកើតមានឡើយ តែបើសិនជាកើតនោះ វាក៏ប៉ះពាល់ដល់ លទ្ធភាពនៃការមានកូនរបស់គេដែរ។ បុរសដែលមានជំងឺនេះ ប្រហែលជាមានចំនួនមេជីវិតឈ្មោលតិច និងខ្សោយចំណង់ផ្លូវភេទផង។ ក្រៅពីនេះ ជំងឺកង្វះអ័រម៉ូនទីរ៉ូអ៊ីត អាចបណ្តាលឲ្យមនុស្សប្រុសស្រីអស់កម្លាំង តែអាការៈរបស់វាមានលក្ខណៈខុសៗគ្នា ពីមនុស្សម្នាក់ទៅមនុស្សម្នាក់ទៀត។ អ្នកខ្លះមិនមានរោគសញ្ញា និងខ្លះទៀតអាចមានអាការៈធ្ងន់ធ្ងរ។ ចំពោះអាការៈទូទៅរបស់វាវិញ មានដូចជា ឡើងទម្ងន់ អស់កម្លាំង ទល់លាមក ឈឺសន្លាក់ និងសាច់ដុំ ចាញ់អាកាសធាតុត្រជាក់ រដូវមកមិនធម្មតា ឬមិនទៀងទាត់ អស់កម្លាំង និងគេងមិនលក់។ ចំពោះស្បែកអាចប្រែទៅជាស្ងួត និងក្រាស់។ សក់ទៅជាជ្រុះ ឬស្តើងទៅៗ។ ដូច្នេះ បើសិនជាអ្នកកំពុងតែមានអាការៈ ជំងឺកង្វះអ័រម៉ូនទីរ៉ូអ៊ីតនេះ យកល្អ អ្នកគួរតែពិគ្រោះជាមួយគ្រូពេទ្យ ដើម្បីធ្វើតេស្តទៅ។ បើសិនជាអ្នក កំពុងតែចាប់ផ្តើម មានគម្រោងយកកូននោះ អ្នកគួរតែពិនិត្យទៅលើ ស្ថានភាពក្រពេញទីរ៉ូអ៊ីតនេះផង៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com