ភាពតានតឹងនយោបាយ ឆ្នាំ២០១៦ រារាំងការងារគណៈកម្មការទី១ រដ្ឋសភា

ជាតិ

នយោបាយជាតិ

ភាពតានតឹងនយោបាយ ឆ្នាំ២០១៦ រារាំងការងារគណៈកម្មការទី១ រដ្ឋសភា

31, Dec 2016 , 8:19 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ប្រធានគណៈកម្មការ សិទ្ធិមនុស្សទទួលពាក្យបណ្ដឹងអង្កេតនិងទំនាក់ទំនងរដ្ឋសភាព្រឹទ្ធសភា និយាយថា ស្ថានភាពនយោបាយឆ្នាំ២០១៦នេះ មិនអំណោយផលសម្រាប់លោក និងតំណាងរាស្ត្រគណបក្សប្រឆាំង ក្នុងការបំពេញតួនាទីដោះស្រាយបញ្ហាពលរដ្ឋឡើយ។អ្វីដែលលោក អេង ឆៃអ៊ាង បានធ្វើនោះ គឺបានត្រឹមតែ ការកោះហៅរដ្ឋមន្ត្រីក្រសួងយុត្តិធម៌ និងចុះសួរសុខទុក្ខប្រជាពលរដ្ឋប៉ុណ្ណោះ។

បញ្ហានយោបាយពេញមួយឆ្នាំ២០១៦នេះមានភាពល្អក់កករច្រើនដែលរាំងខ្ទប់ការងាររបស់លោក អេង ឆៃអ៊ាង ក្នុងការរកដំណោះស្រាយបញ្ហាជូនប្រជាពលរដ្ឋ។ក្នុងតួនាទីជាតំណាងរាស្ត្រនិងជាប្រធានគណៈកម្មការទី១ លោក អេង ឆៃអ៊ាង អះអាងថាលោកបានចុះទៅសួរនាំពីទុក្ខលំបាកពលរដ្ឋតាមមូលដ្ឋាននិងទទួលពាក្យបណ្ដឹងរបស់ពលរដ្ឋជាដើម។ ជាពិសេសគឺកោះហៅរដ្ឋមន្ត្រីរដ្ឋាភិបាលមកសួរនាំពីការអនុវត្តការងាររបស់ពួកគេ ដែលត្រូវបម្រើផលប្រយោជន៍ជូនពលរដ្ឋ ។ ប៉ុន្តែកិច្ចការងារទាំងនេះ មិនមែនជាសម្មិទ្ធផលល្អដែលអាចធ្វើឲ្យលោក ឆៃអ៊ាង មានមោទនភាពឡើយ។

មន្ត្រីជាន់ខ្ពស់គណបក្សសង្គ្រោះជាតិរូបនេះបានរៀបរាប់ពីសកម្មភាពបំពេញតួនាទីខ្លួនក្នុងឆ្នាំ២០១៦ដូច្នេះថា៖ យើងបានចុះជួបប្រជាពលរដ្ឋ ដើម្បីស្ដាប់មតិនិងផ្ដល់ព័ត៌មានផ្សេងៗជូនពលរដ្ឋក្នុងនាមក្របខណ្ឌជាតំណាង។ ហើយយើងបានចូលរួមឃ្លាំមើលសកម្មភាពនីតិប្រតិបត្តិដែរ ក្នុងនាមខ្ញុំជាប្រធានគណៈកម្មការសិទ្ធិមនុស្ស ទទួលពាក្យបណ្ដឹងហ្នឹង គឺយើងបានកោះអញ្ជើញរដ្ឋមន្ត្រីក្រសួងយុត្តិធម៌ មកសួរពាក់ព័ន្ធសំណុំរឿងមួយចំនួន ជាពិសេសសំណុំរឿងនៃការរំលោភសិទ្ធិអនិតិជន កុមារ ការរំលោភសិទ្ធិមនុស្ស ដោយសារការប្រើប្រាស់យន្តការរំលោភដីធ្លីមិនត្រឹមត្រូវជាដើម។ ហើយខ្ញុំក៏បានចូលរួមជាមួយគណៈកម្មការផ្សេងទៀត សួរនាំចំពោះរដ្ឋមន្ត្រីពាក់ព័ន្ធ តំណាងរដ្ឋាភិបាលដែរ។ តែស្ថានភាពនយោបាយមិនល្អសម្រាប់យើងបំពេញការងារសោះ»។

តាមពិតទៅសកម្មភាពទាំងអម្បាលម៉ាននេះវាមិនទាន់អាចធ្វើឲ្យលោកអេងឆៃអ៊ាងស្ងប់ចិត្តឡើយ។ អ្វីដែលគាត់មិនទាន់ស្ងប់ចិត្តនោះ ព្រោះគម្រោងមិនបានសម្រេចក្នុងការកោះហៅរដ្ឋមន្ត្រីនីតិប្រតិបត្តិមួយចំនួនទៀតមកសួរនាំហើយត្រូវដោះស្រាយបញ្ហាជាមួយរដ្ឋាភិបាលច្រើនទៀត។ការខកខាននោះដោយសារតែស្ថានភាពនយោបាយមិនអំណោយផលក្រោយពីការចាប់ខ្លួនលោក អ៊ុំ សំអាន កាលពីខែមេសា ដែលនាំឲ្យលោកឆៃអ៊ាង និងតំណាងរាស្ត្របក្សប្រឆាំងដទៃទៀត ធ្វើពហិការមិនបំពេញការងារក្នុងរដ្ឋសភា។ ហើយនៅពេលធ្វើពហិការនេះ លោក អេង ឆៃអ៊ាង បាត់បង់ឱកាសសួរដេញដោលលើមន្ត្រីរដ្ឋាភិបាល និងគ្មានសិទ្ធិគ្រប់គ្រាន់ក្នុងការជួយដោះស្រាយទុក្ខលំបាកពលរដ្ឋដែរ។

មន្ត្រីជាន់ខ្ពស់គណបក្សសង្គ្រោះជាតិរូបនេះបានបញ្ជាក់ដូច្នេះថា៖«ក្របខណ្ឌតំណាងរាស្ត្រដែលយើងបានធ្វើនោះ គឺការចូលរួមការធ្វើច្បាប់ និងអនុម័ត្តច្បាប់មួយចំនួន។ ប៉ុន្តែដោយសារវាមានបញ្ហានយោបាយនោះ គឺមានច្បាប់មួយចំនួន យើងមិនបានចូលរួមក្នុងការជជែកនិងអនុម័ត្តទេ។ហើយយើងនៅសល់ការងារជាច្រើនទៀត ដែលយើងមិនបានធ្វើដោយសារតែភាពតានតឹងនយោបាយនេះ។ ការងារដែលយើងចង់ធ្វើនោះសុទ្ធតែជារឿងរសើបរបស់រដ្ឋាភិបាល ប៉ុន្តែដោយសារតែយើងមិនចង់ឲ្យមានបរិយាកាសនយោបាយកាន់តែអាប់អូល មើលមុខគ្នាមិនចំរវាងអ្នកនយោបាយនោះ ទើបយើងចេះតែគេចខ្លះទៅ… យើងមិនអាចធ្វើតាមអារម្មណ៍ទេ។ យើងត្រូវធ្វើតាមការគិតរបស់យើង បើធ្វើតាមអារម្មណ៍នោះវានឹងហិចហោចអស់ហើយ…ព្រោះគេគិតសន្តិសុខជាតិខ្លាំងណាស់(សើច) បើយើងនិយាយស្តីគេប្រកាន់គេចាប់ដាក់គុកដាក់ច្រវ៉ាក់ដូចនេះយើងត្រូវគិតគូរដែររឿងនេះ»។

តែយ៉ាងណាក្រោយពីមានការលើកលែងទោសឲ្យឯកឧត្តមកឹមសុខាប្រធានស្តីទីគណបក្សសង្គ្រោះជាតិមកស្ថានភាពនយោបាយរយៈពេលចុងក្រោយនេះក៏ចាប់ផ្ដើមធូរស្រាលបន្តិចហើយដែរ។ដោយសារតែស្ថានភាពនយោបាយកំពុងវិលមករកសភាពប្រក្រតីវិញនេះលោកអេងឆៃអ៊ាងដែលទទួលបន្ទុកជាប្រធានគណៈកម្មការទី១រដ្ឋសភាក៏មានគម្រោងយកការងារនៅសេសសល់កាលពីឆ្នាំ២០១៦នោះ បំពេញក្នុងឆ្នាំ២០១៧នេះ ដោយកោះហៅរដ្ឋមន្ត្រីក្នុងនីតិប្រតិបត្តិមួយចំនួនមកបំភ្លឺចំពោះមុខគណៈកម្មការលោកដើម្បីសួរនាំពីការអនុវត្តរបស់ក្រសួងសាមីក្នុងបម្រើផលប្រយោជន៍ជូនពលរដ្ឋ។ប្រធានគណៈកម្មការទី១គ្រោងកោះហៅរដ្ឋមន្ត្រីក្រសួងយុត្តិធម៌លោកអង្គវង្សវឌ្ឍនាមកសួរនាំព័ត៌មានបន្ថែមជុំវិញករណីឃាតកម្មលើលោកកែមឡីនៅដើមឆ្នាំ២០១៧នេះ៕