កីឡាជាតិ
លោក ទេព ឡុងរចនា៖ ការប្រកួតមិត្តភាពជួយពង្រឹងសមត្ថភាពកីឡាករ តែពេលខ្លះជួបបញ្ហារបួស
×
គ្រូបង្វឹកក្រុមក្រសួងការពារជាតិ និងក្រុម Cambodia All Stars ទេព ឡុងរចនា បានបញ្ជាក់ថា ការប្រកួតលក្ខណមិត្តភាពជាតិ និងអន្តរជាតិច្រើនមានគុណសម្បតិ្ត និងគុណវិបត្តិចំពោះក្លិបនីមួយៗ។ ប៉ុន្តែបើសិនកីឡាករមានការប្រុងប្រយ័ត្ន និងអធ្យាស្រ័យគ្នានោះគុណវិបត្តិមិនកើតឡើងនោះឡើយ។
គ្រូបង្វឹកក្រុមជើងឯករងពានរង្វាន់លីកកំពូលកម្ពុជាឆ្នាំ២០១៦ ទេព ឡុងរចនា កាលពីថ្ងៃទី៤ ខែមករា បានលើកឡើងពីគុណសម្បត្តិ និងគុណវិបត្តិនៃការប្រកួតមិត្តភាពច្រើន។ ដោយលោកបានបញ្ជាក់ថា ការប្រកួតមិត្តភាពច្រើនវាអាចជួយឲ្យកីឡាករទទួលបានបទពិសោធន៍ និងបច្ចេកទេសថ្មីៗក្នុងការអភិវឌ្ឍន៍សមត្ថភាពកីឡាករឲ្យកាន់តែរីកចម្រើន។
ម្យ៉ាងវិញទៀត ការប្រកួតញឹកញាប់ក៏អាចបណ្តាលឲ្យកីឡាករមានរបួស និងថមថយកម្លាំងផងដែរ ដែលជាហេតុអាចធ្វើឲ្យមានការប៉ះពាល់ដល់ការប្រជែងដណ្តើមពានរង្វាន់ផ្សេងៗ។ ក៏ប៉ុន្តែគ្រូបង្វឹកក្រុមទ័ពរូបនេះបានបញ្ជាក់ថា ប្រសិនបើកីឡាករលេងដោយប្រុងប្រយ័ត្ន និងអធ្យាស្រ័យ គុណវិបត្តិទាំងនោះមិនកើតមាននោះឡើយ។
ការលើកពីគុណសម្បត្តិ និងគុណវិបត្តិនៃការប្រកួតមិត្តភាពនេះ ធ្វើឡើងស្របពេលដែលក្រុមក្រសួងការពារជាតិត្រូវជួបប្រកួតមិត្តភាពអន្តរជាតិជាមួយក្រុមខ្លាំងនៅអាស៊ានរហូតដល់ទៅ៤ដងក្នុងខែមករា នេះ។ ទោះបីជាយ៉ាងនេះក្តី ទាំងលោក ទេព ឡុងរចនា និងលោក ខូវ ឆាយ អ្នកចាត់ការទូទៅក្លិបក្រសួងការពារជាតិ សុទ្ធតែចាត់ទុកការប្រកួតមិត្តភាពជាកត្តាមួយដ៏ល្អក្នុងការពង្រឹងនិងអភិវឌ្ឍន៍ក្លិបឲ្យកាន់តែរីកចម្រើន។
ថ្លែងនៅក្នុងសនិ្នសីទសារព័ត៌មានកាលពីថ្ងៃទី៤ ខែមករា លោក ខូវ ឆាយ បញ្ជាក់យ៉ាងដូច្នេះថា៖«ការប្រកួតលក្ខណមិត្តភាពច្រើន ដោយសារយើងចង់ឲ្យកីឡាករត្រៀមខ្លួនរួចរាល់ក្នុងការប្រកួតលក្ខណៈអន្តរជាតិ ព្រោះទិសដៅរបស់យើងក្នុងឆ្នាំ២០១៧ គឺធ្វើយ៉ាងណាឲ្យឈានទៅរកប្រកួតនៅក្នុងតំបន់។ អ៊ីចឹងប្រសិនបើយើងអាចលើកពាន ឬលេខ២ក្នុងលីក យើងនឹងអាចប្រជែងជាមួយក្រុមនៅក្នុងតំបន់ ជាពិសេស AFC Cup»៕
Tag:
បាល់ទាត់
ទេព ឡុងរចនា
© រក្សាសិទ្ធិដោយ thmeythmey.com