កីឡាអន្តរជាតិ
អន្តរជាតិ
World Cup៖ ទ្វីបអាស៊ីកើន៤កៅអីបន្ថែម ក្រោយ FIFA បង្កើន ១៦ក្រុមបន្ថែមទៀត
×![]()
ដោយ: ទេព ពិទូរ្យ
ទ្វីបអាស៊ីនឹងកើនដល់៨កៅអីកន្លះក្នុងការប្រកួតពានរង្វាន់បាល់ទាត់ពិភពលោក World Cup លើសកូតាចាស់ដែលមានត្រឹម៤កៅអីកន្លះប៉ុណ្ណោះ បន្ទាប់ពីសហព័ន្ធកីឡាបាល់ទាត់ពិភពលោក FIFA ដែលមានលោក Gianni Infantinoជាប្រធាន សម្រេចបន្ថែមក្រុមប្រកួតដល់ទៅ ៤៨ក្រុម ចាប់ពីឆ្នាំ២០២៦តទៅ។
ក្រោយពីសហព័ន្ធកីឡាបាល់ទាត់ពិភពលោក FIFA សម្រេចបង្កើនក្រុមប្រកួតដល់ទៅ១៦ក្រុមបន្ថែមទៀតទៅក្នុងពានរង្វាន់ពិភពលោក World Cupនោះ ទ្វីបអាស៊ីដែលមានកៅអីត្រឹម៤កន្លះ ត្រូវបានបង្កើនរហូតដល់៨កៅអីកន្លះឯណោះ។ ការកើន៤កៅអីបន្ថែមនេះ នឹងធ្វើឲ្យប្រទេសមួយចំនួនក្នុងទ្វីបអាស៊ី ដែលមិនធ្លាប់ស្គាល់រសជាតិ អាចមានឱកាសច្រើនដើម្បីមានវត្តមាននៅក្នុងការប្រកួតនៃពានរង្វាន់យក្សរបស់ពិភពលោកមួយនេះ។
ការសម្រេចបង្កើនក្រុមខាងលើនេះ ធ្វើឡើងក្នុងកិច្ចប្រជុំរបស់សហព័ន្ធកីឡាបាល់ទាត់ពិភពលោក FIFA នៅទីស្នាក់ការក្នុងក្រុង Zurich ប្រទេសស្វ៊ីស។ ទន្ទឹមនឹងការបង្កើនចំនួនក្រុមនោះ ការប្រកួតសម្រាប់ក្រុមនិមួយៗក៏មានការប្រែប្រួលរូបមន្តផងដែរ។ រូបមន្តថ្មី នឹងបែងចែកក្រុមទាំង៤៨ ទៅជា១៦ពូល ដោយពូលនីមួយៗមានក្រុមជម្រើសជាតិចំនួន៣ និងត្រូវប្រជែងយកពីរក្រុម ដើម្បីឈានទៅវគ្គ ៣២ក្រុមចុងក្រោយ។ ពោល គឺខុសគ្នាពីរូបមន្តចាស់ ដែលមានចំនួន៨ពូល ដោយមួយពូលមាន៤ក្រុម។
ជាមួយនឹងការបង្កើនចំនួនក្រុមនេះ ការប្រកួតទាំងអស់នៃពានរង្វាន់ពិភពលោកនេះ ក៏មានការកើនឡើងដែរ គឺកើនឡើងពី៦៤ប្រកួត ទៅដល់៨០ប្រកួត។ ប៉ុន្តែរូបមន្តប្រកួតចាប់ពីវគ្គ៣២ក្រុមចុងក្រោយ ត្រូវប្រកួតវគ្គខ្វែងជម្រុះចាញ់ធ្លាក់រហូតដល់វគ្គផ្តាច់ព្រ័ត្រតែម្តង។
សូមបញ្ជាក់ថា ក្រៅពីទ្វីបអាស៊ីដែលកើនបាន៤កៅអី ក៏មានទ្វីបដ៏ទៃទៀតបានកើនកៅអីផងដែរ រួមមាន ទ្វីបអឺរ៉ុបកើនពី១៤ទៅ១៦កៅអី ទ្វីបអាហ្វ្រិក កើនពី៥ទៅ៩កៅអី ទ្វីបអាមេរិកខាងត្បូង កើនពី៤ កន្លះទៅ៦កៅអីកន្លះ ទ្វីបអាមេរិកខាងកើត កើនពី៣កៅអីកន្លះទៅ៦កៅអីកន្លះ និងទ្វីបអូសេអានី កើនពីកន្លះកៅអីទៅ១កៅអីកន្លះ។ ហើយការបង្កើនចំនួនក្រុមនេះ គឺស្របតាមបំណងរបស់ប្រធាន FIFA ថ្មី លោក Gianni Infantino ដែលទើបឡើងកាន់តំណែងនេះជំនួសលោក Sepp Blatter កាលពីឆ្នាំមុន៕
Tag:
World Cup
© រក្សាសិទ្ធិដោយ thmeythmey.com
