ពីនេះ ពីនោះ
ភិក្ខុ គូ សុភាព៖ អ្នករៀនមានឧបសគ្គ៨យ៉ាង
× ភ្នំពេញ៖ មនុស្សម្នាក់សុទ្ធតែមានបញ្ហារៀងៗខ្លួន តែត្រូវព្យាយាមជម្នះឧបសគ្គទាំងអស់នេះ ឲ្យទាល់តែបាន ទើបទទួលបានជោគជ័យ។ ចំណែក អ្នកសិក្សា ក៏មានឧបសគ្គច្រើនផងដែរ។ សាស្ត្រាចារ្យសាកលវិទ្យាល័យបញ្ញាសាស្ត្រកម្ពុជា ភិក្ខុ គូ សុភាព បានបង្ហាញថា អ្នកសិក្សា មានឧបសគ្គ៨យ៉ាងដូចខាងក្រោមនេះ៖
១) ខ្ជិល៖ ទោះមានគ្រូពីឋានព្រះឥន្ទ្រក៏ដោយ បើខ្ជិលនោះ រៀនអ្វីក៏មិនទៅមុខដែរ។
២) ចង់សប្បាយពេក៖ មិត្តភក្តិ ផឹកស៊ី ដើរលេងច្រើន ចុងក្រោយគ្មានអ្វីក្រៅពីបាតដៃទទេ។
៣) សេពគប់មិត្តខុស៖ ការរាប់អានមិត្តភក្តិខុស គឺអាចនាំយើងទៅរកផ្លូវអាក្រក់។
៤) ឆាប់បោះបង់៖ មិនតស៊ូ ខ្វះការអត់ធ្មត់ចំពោះការលំបាកទាំងឡាយដូចជា ខ្វះលុយ ខោអាវមិនស្អាតដូចគេ គ្មានរបស់ល្អប្រើដូចគេជាដើម។
៥) រវើរវាយ៖ ចាប់នេះ ចាប់នោះ មិនឆ្ពោះត្រង់ណា មិនច្បាស់លាស់ គ្មានគោលជំហពិតប្រាកដ។
៦) ឆេវឆាវ៖ ម៉ែស្តីឲ្យ គ្រួបន្ទោសតិចតួច តាំងខឹងច្រឡោត លែងចង់រៀនសូត្រ។
៧) ឈឺច្រើន៖ គួរបង្ការមុន កុំឲ្យឈឺច្រើនពេក។ ការហាត់ប្រាណ មានអនាម័យ ហូបអាហារល្អ គេងគ្រប់គ្រាន់ នាំឲ្យមានសុខភាពល្អ ដូច្នេះការសិក្សាក៏ល្អតាមនោះដែរ។
៨) ខ្វះថវិកា៖ អាចជាឧបសគ្គដែរ តែបើមានតស៊ូប្រឹងប្រែង គង់មានផ្លូវដោះស្រាយ
បញ្ជាក់៖ ដែកកាន់តែដុត កាន់តែរឹង ជួបឧបសគ្គកាន់តែច្រើន កាន់តែមានបទពិសោធ
ប្រភព៖ សៀវភៅ«ខ្ញុំឆ្លាត រូបមន្តរៀនពូកែ»រៀបរៀងដោយ ភិក្ខុ គូ សុភាព
© រក្សាសិទ្ធិដោយ thmeythmey.com