ពីនេះ ពីនោះ
អំពើហិង្សានឹងបញ្ចប់បើយើងឈប់ស្អប់និងខឹងគ្នា!
× កំណាព្យបទ ព្រះចន្ទ្របាំងឆ័ត្រ
និពន្ធដោយ ប៉ាកកាខ្មៅ!
-កំហឹងខ្លាំង ខ្លាំងថែមស្អប់ ខ្ចប់កំហឹង
គ្រប់គ្នាដឹង ដឹងមិនល្អ តគ្រប់គ្នា
ចងជាធ្នាក់ ធ្នាក់ទាក់ក កចងជា
វេរាជាប់ ជាប់ហិង្សា ថាវេរា។
-ហិង្សាកើត កើតព្រោះចិត្ត ដិតហិង្សា
គ្រប់គ្នាថា ថាព្រោះគេ គេគ្រប់គ្នា
ចិត្តជាហេតុ ហេតុកើតផល ដល់ចិត្តជា
រឿងឈ្លោះគ្នា គ្នាលែងរាប់ ភ្ជាប់រឿងឈ្លោះ។
-មេត្តាចិត្ត ចិត្តប្រពៃ លៃមេត្តា
រឿងគ្រោះស្តារ ស្តារជាលាភ រាបរឿងគ្រោះ
កេរ្តិ៍ឈ្មោះថ្កើង ថ្កើងរាសី ល្បីកេរ្តិ៍ឈ្មោះ
ជួបជុំរស់ រស់សុខសាន្ត បានជួបជុំ។
© រក្សាសិទ្ធិដោយ thmeythmey.com