អន្តរជាតិ
នយោបាយអន្តរជាតិ
ចូលកាន់តំណែងភ្លាម ត្រាំ ផ្តើមសង្គ្រាមជាមួយប្រព័ន្ធផ្សព្វផ្សាយ
×
អ្នកនាំពាក្យលោក ដូណាល់ ត្រាំ Sean Spicer បានបញ្ជាក់ប្រាប់អ្នកសារព័ត៌មានថា ប្រធានាធិបតី ត្រាំ មិនត្រូវការសារព័ត៌មានឡើយ ហើយសារព័ត៌មានទាំងអស់ត្រូវទទួលខុសត្រូវរាល់ការផ្សព្វផ្សាយរបស់ខ្លួន។ មន្ត្រីជាន់ខ្ពស់រូបនេះបានទិតៀនប្រព័ន្ធផ្សព្វផ្សាយនិងអ្នកសារព័ត៌មានចាស់ដៃ ។ ដូណាល់ ត្រាំ ខ្លួនឯងបានប្រកាសនៅការិយាល័យ CIA ថា ខ្លួនកំពុងធ្វើសង្គ្រាមប្រឆាំងប្រព័ន្ធផ្សព្វផ្សាយ នៅថ្ងៃដំបូងដែលខ្លួនចូលធ្វើការ។
ក្នុងសន្និសីទសារព័ត៌មានលើកដំបូង អ្នកនាំពាក្យប្រធានាធិបតី ដូណាល់ ត្រាំ លោកSean Spicer និយាយទាំងខឹងសម្បារចំពោះប្រព័ន្ធផ្សព្វផ្សាយ ដោយលោកអះអាងថាប្រព័ន្ធផ្សព្វផ្សាយនេះចែកចាយព័ត៌មានខុសពាក់ព័ន្ធចំនួនអ្នកចូលរួមក្នុងពិធីស្បថចូលកាន់តំណែងរបស់លោក ត្រាំ និងការតុបតែងការិយាល័យពងក្រពើ (Oval Office) ។
អ្នកនាំពាក្យរូបនេះបានបន្ទោសថា អ្នកសារព័ត៌មានដែលបង្ហោះរូបភាពដែលបន្ថយចំនួនអ្នកចូលរួមសារទរថ្ងៃស្បថចូលកាន់តំណែងរបស់លោក ដូណាល់ ត្រាំ ដែលវាជាការបន្តុះបង្អាប់មួយ។ ហើយលោកសន្យាចាត់វិធានការប្រឆាំងរាល់ប្រព័ន្ធផ្សព្វផ្សាយដែលមានចេតនាមិនល្អដូចគ្នា។ ចំណែកប្រធានាធិបតី ដូណាល់ ត្រាំ ដែលអញ្ជើញទៅទស្សនកិច្ចទីស្នាក់ការកណ្តាលទីភ្នាក់ងារចារកម្មមជ្ឈិម CIA នាថ្ងៃសៅរ៍ដែរនោះ បានប្រកាសជាសាធារណៈថា លោកកំពុងធ្វើសង្គ្រាមជាមួយប្រព័ន្ធផ្សព្វផ្សាយ។
ត្រឡប់មកវិញ លោក Spicer បានចាត់ទុកថា អ្នកសារព័ត៌មានមានចេតនាធ្វើឲ្យខូចរូបភាពថ្ងៃលោក ដូណាល់ ត្រាំ ស្បថចូលកាន់តំណែង។ លោកបានប្រាប់អ្នកសារព័ត៌មានដូច្នេះថា៖ នៅថ្ងៃម្សិលមិញ (២០មករា) អាមេរិកនិងពិភពលោកទាំងមូលមើលឃើញច្បាស់ពីការផ្ទេរអំណាចដោយសន្តិវិធី ហើយដូចដែលប្រធានាធិបតីបាននិយាយហើយថា វាជាការផ្ទេរអំណាចនិងជាតុល្យភាពអំណាចបានមកពីប្រជាជន។ ប៉ុន្តែប្រព័ន្ធផ្សព្វផ្សាយខ្លះមានចេតនាផ្សព្វផ្សាយខុសពីការពិត»។
មួយទៀត Spicer បានរិះគន់សារព័ត៌មានដែលផ្សព្វផ្សាយមិនត្រឹមត្រូវពីការដករូបសំណាកវីរៈជនសិទ្ធិមនុស្សលោក Martin Luther King ចេញពីការិយាល័យប្រធានាធិបតីធ្វើការ (Oval office) ។ ទស្សនាវដ្តី Time ជាអ្នកចុះផ្សាយរឿងនេះ ហើយក្រោយមកអ្នកសារព័ត៌មានដែលបានសរសេររឿងដករូបសំណាកនេះចេញបានចេញមុខសុំអភ័យទោសផងដែរ។
បន្ទាប់ពីព្រលះអ្នកសារព័ត៌មានរឿងផ្សព្វផ្សាយមិនត្រឹមត្រូវ លោក Sean Spicer បានព្រមានចាត់វិធានការប្រឆាំងប្រព័ន្ធផ្សព្វផ្សាយណាដែលផ្សព្វផ្សាយមិនត្រឹមត្រូវដូចគ្នា។
លោកបានលើកឡើងដូច្នេះ៖ «ចរិកមិនស្មោះត្រង់របស់ប្រព័ន្ធផ្សព្វផ្សាយ ជារឿងដែលធ្វើឲ្យការព្យាយាមបង្រួបបង្រួមជាតិយើងកាន់តែលំបាកឡើង។ វាមានការជជែកវែកញែកច្រើននៅតាមប្រព័ន្ធផ្សព្វផ្សាយពីការទទួលខុសត្រូវរបស់លោក ដូណាល់ ត្រាំ។ ខ្ញុំនៅទីនេះផ្ទាល់ចង់ប្រាប់អ្នកទាំងអស់គ្នាថា វាមានផ្លូវពីរទៅវិញទៅមក។ យើងក៏នឹងឲ្យសារព័ត៌មានទទួលខុសត្រូវចំពោះសកម្មភាពពួកគេដូចគ្នា»។
ក្រោយពេលលោក ថ្លែងចប់ អ្នកនាំពាក្យប្រចាំសេតវិមានអាមេរិករូបនេះ ដើរចេញពីបន្ទប់ភ្លាម ដោយមិនផ្តល់ឱកាសឲ្យអ្នកសារព័ត៌មានសួរឡើយ។ សកម្មភាពនេះ បង្ហាញឲ្យឃើញច្បាស់ថា ទំនាក់ទំនងរវាងរដ្ឋបាលថ្មី និងសារព័ត៌មាននៅស្ថិតលើផ្លូវរលាក់ ហើយគេក៏មិនរំពឹងថា ទំនាក់ទំនងនេះនឹងប្រសើរឡើងដែរ៕
© រក្សាសិទ្ធិដោយ thmeythmey.com