ព័ត៍មានសុខភាព
កត្តា ៣យ៉ាងដែលធ្វើឲ្យមនុស្សយើងកើតជំងឺដំបៅក្រពះពោះវៀនមិនចេះដាច់សោះ
× ជំងឺដំបៅក្រពះពោះវៀនមានពីរប្រភេទ ដែលមួយប្រភេទគឺជាការកើតដំបៅនៅពោះវៀនតូចត្រង់ផ្នែកខាងលើគេ និងមួយទៀតគឺដំបៅនៅក្រពះតែម្តង ដែលស្ថិតនៅខាងលើគេដែរ។ ទោះបីជាយ៉ាងណាក៏ដោយ ជំងឺដំបៅក្រពះពោះវៀន តែងតែកើតមានជាញឹកញាប់លើប្រជាជនខ្មែរយើង ហើយក៏ព្យាបាលមិនងាយជាដែរ ព្រោះតែពួកគេកំពុងតែមានកត្តាប្រឈមមុខទាំងបីនេះជាប់ខ្លួន៖
ញ៉ាំថ្នាំបំបាត់ការឈឺចាប់ជាប្រចាំ
ថ្នាំប្រភេទអាស្ពីរីន, Nonsteroidal Anti-inflammatory Drugs និងថ្នាំគ្មានវេជ្ជបញ្ជា អាចបណ្តាលឲ្យភ្នាសរបស់ក្រពះទៅជារលាក ជាពិសេសនៅពេលលេបជាប្រចាំ។ សម្រាប់អ្នកដែលងាយនឹងមានជំងឺដំបៅក្រពះពោះវៀន គឺជាមនុស្សវ័យចំណាស់ដែលកំពុងតែប្រើថ្នាំលេបជាញឹកញាប់។
បាក់តេរី
បាក់តេរី H. pylori ក៏អាចជាដើមហេតុដ៏ចំបងមួយនៅពេលនិយាយដល់ជំងឺដំបៅក្រពះពោះវៀនដែរ។ ថ្វីបើរឿងនេះនៅតែមិនទាន់មានការយល់ច្បាស់ពីរបៀបដែលបាក់តេរីនេះចូលក្នុងខ្លួនយើងក៏ដោយតែវាអាចបណ្តាលឲ្យមានការរលាកក្នុងភ្នាសក្រពះ រហូតដល់កើតជាដំបៅបាន។
គ្រឿងស្រវឹង
សម្រាប់អ្នកចូលចិត្តញ៉ាំគ្រឿងស្រវឹងក៏ជាកត្តាមួយផ្សេងទៀតធ្វើឲ្យកើតជាដំបៅក្នុងក្រពះពោះវៀនដែរ។ បើសិនជាអ្នកជាមនុស្សញ៉ាំគ្រឿងស្រវឹងជាប្រចាំ អ្នកពិតជាកំពុងតែដាក់ខ្លួនឯងចូលទៅក្នុងការប្រឈមមុខខ្ពស់នឹងបំផ្លាក្រពះហើយ។
ជំងឺដំបៅក្រពះពោះវៀន អាចបណ្តាលឲ្យមានការឈឺចាប់ និងមិនមានផាសុកភាពក្នុងពោះជាពិសេសនៅពេលវាទៅជាធ្ងន់ធ្ងរ ឬនៅពេលចាប់ផ្តើមហូរឈាម។ តាមរយៈការកាត់បន្ថយការជក់បារី និងទម្លាប់ញ៉ាំគ្រឿងស្រវឹង ព្រមទាំងមានរបៀបរស់នៅប្រកបដោយសុខភាពទៀតនោះ វាពិតជាអាចជួយបង្ការកុំឲ្យដំបៅកើតមានក្នុងក្រពះពោះវៀនបាន៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com