ពីនេះ ពីនោះ
វចនានុក្រម៖ ពាក្យថា«រួមរក្ស» មិនមែនមានន័យថា រួមភេទ នោះទេ!
× ភ្នំពេញ៖ បទចម្រៀងទាំងបុរាណ និងសម័យជាច្រើនបទ តែងតែបញ្ចូលពាក្យថា «រួមរក្ស» ទៅក្នុងសំណេររបស់ខ្លួន ដែលធ្វើឲ្យមហាជន តែងតែយល់ថា ពាក្យនេះ ស្មើនឹងពាក្យថា«រួមភេទ»។ ប៉ុន្តែ តាមពិត ពាក្យថា«រួមរក្ស» មិនមានន័យដូច្នោះឡើយ។
វចនានុក្រម សម្តេចសង្ឃរាជ ជួន ណាត បានពន្យល់ថា៖
ពាក្យថា«រួមរក្ស» ឬ «រក្សា ឬ រួមគ្នារក្សា ឬ ជួយរក្សាគ្នា» មានន័យថា រួមសុខទុក្ខ រួមចិត្តគំនិតទទួលសុខទុក្ខផងគ្នា។ ឧទាហរណ៍៖ បទ៖«លាហើយកម្ពុជា» ដែលជាព្រះរាជនិពន្ធរបស់សម្តេច នរោត្តម សីហនុ អតីតព្រះមហាក្សត្រខ្មែរ។ លាហើយ កម្ពុជាអើយ សូមលាដោយអាឡោះអាល័យ។ ចិត្តខ្ញុំ រៀងរាបរាល់ថ្ងៃ សូមភ្ជាប់និស្ស័យ និងអ្នកដរាប។ ពេលមុន យើងធ្លាប់រួមរស់ រួមទុក្ខ រួមសុខ ជាមួយគ្នា។ ឥឡូវ ទោះបីជាយ៉ាងណា ខ្ញុំសូមសច្ចា ស្មោះត្រង់និងអ្នក។ នៅឆ្ងាយ ខ្ញុំគ្មានណាយ ចំពោះខ្លួនអ្នកសោះឡើយ។ ស្នេហា ខ្ញុំគ្មានស្បើយ ព្រោះអ្នកជាមាតុភូមិខ្ញុំ។ លុះត្រា ខ្ញុំក្ស័ណជីវ៉ា ខ្ញុំសូមបម្រើការពារអ្នក បម្រើដ៏សែនស្មោះស្ម័គ្រ រួមរក្សនិងអ្នក លុះអវសាន[…]។
ចំណែកពាក្យមួយទៀត ក៏មានសូរដូចគ្នានឹងពាក្យខាងលើដែរ ប៉ុន្តែ វាមានន័យខុសគ្នា។
ពាក្យថា «រួមរ័ក» មានន័យថា រួមស្រឡាញ់ ដែលចង់សំដៅចំពោះការរួមស្នេហា រវាង បុរសនិងស្ត្រី។ ពាក្យ រួមរ័ក គេប្រើភាគច្រើន គឺសំដៅលើការរួមភេទ៕
© រក្សាសិទ្ធិដោយ thmeythmey.com