ជាតិ
សេដ្ឋកិច្ច
កម្ពុជាទទួលបានឥណទានសម្បទានជាង ៤០០លានដុល្លារបន្ថែមពីកូរ៉េខាងត្បូង
× ភ្នំពេញ៖ រដ្ឋាភិបាលកូរ៉េខាងត្បូងបន្តផ្ដល់កម្ចីសម្បទានជាង ៤០០លានដុល្លារបន្ថែមទៀតដល់កម្ពុជា ដើម្បីប្រើប្រាស់លើគម្រោងអភិវឌ្ឍសេដ្ឋកិច្ច សង្គម និងធ្វើឲ្យប្រសើរឡើងដល់សុខមាលភាពប្រជាជន។ នេះបើតាមសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី៣១ខែមករា។
ឯកសារផ្ដល់ឥណទានសម្បទានចំនួនពីរ ត្រូវបានចុះហត្ថលេខាដោយលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក គីម វ៉នជីន ឯកអគ្គរដ្ឋទូតសាធារណកូរ៉េប្រចាំកម្ពុជា នៅថ្ងៃទី៣១ខែមករា។ ឯកសារទី១ និយាយពីកិច្ចសម្រួលក្របខណ្ឌផ្ដល់ឥណទានសម្បទាននៃមូលនិធិសហប្រតិបត្តិការអភិវឌ្ឍន៍សេដ្ឋកិច្ចឆ្នាំ២០១៦ ដល់ឆ្នាំ២០១៨ ដែលមានទឹកប្រាក់ចំនួន ៣៥០លានដុល្លារ។ និងឯកសាទី២ លើកឡើងពីកិច្ចសម្រួលផ្ដល់ឥណទានសម្បទានសម្រាប់គម្រោងលើកកម្ពស់គុណភាពផ្លូវជាតិលេខ៤៨ នៃខេត្តកោះកុង ដែលមានទំហំទឹកប្រាក់ជាង ៦៧លានដុល្លារ។
លោក ប្រាក់ សុខុន បានថ្លែងនៅក្នុងពីធីចុះហត្ថលេខាខាងលើនោះថា មូលនិធិកិច្ចសម្រួលក្របខណ្ឌនេះ នឹងត្រូវប្រើប្រាស់សម្រាប់ផ្គត់ផ្គង់ហិរញ្ញវត្ថុដល់គម្រោងអាទិភាពនានា លើផ្នែកហេដ្ឋារចនាសម្ព័ន្ធ ប្រព័ន្ធធារាសាស្ត្រ សុខភាព ផ្លូវជនបទ និងប្រព័ន្ធលូបង្ហូរទឹក។ លោកបន្ថែមថា កិច្ចសម្រួលក្របខណ្ឌនេះ ស្របគ្នាយ៉ាងល្អនឹងវិស័យអាទិភាពនានារបស់រដ្ឋាភិបាលនៅក្នុងយុទ្ធសាស្ត្រចតុកោណដំណាក់កាលទី៣ ។
ប្រាក់កម្ចីរបស់រដ្ឋាភិបាលកូរ៉េដល់កម្ពុជា សម្រាប់ឆ្នាំ២០១៦ ដល់ឆ្នាំ២០១៨ នេះមានកំណើនលើសពីរដងពីកម្ចីលើកមុន ឆ្នាំ២០១៣ ដល់ឆ្នាំ២០១៦ ដែលមានចំនួន២០០លានដុល្លារ។ នេះបើតាម លោក ប្រាក់ សុខុន ដែលបញ្ជាក់ទៀតថា ចាប់ពីឆ្នាំ២០០១ ដល់ឆ្នាំ២០១៦ សាធារដ្ឋកូរ៉េបានផ្ដល់ប្រាក់កម្ចីពីមូលនិធិសហប្រតិបត្តិការសេដ្ឋកិច្ចដល់កម្ពុជាមានចំនួនប្រហែល ៥៣៥លានដុល្លារ សម្រាប់អនុវត្តគម្រោងអភិវឌ្ឍន៍ចំនួន ១៧ ៕
Tag:
ប្រាក់ សុខុន
កូរ៉េ
ឥណទានសម្បទាន
© រក្សាសិទ្ធិដោយ thmeythmey.com