ជាតិ
អ្នកទិញអាចទទួលបណ្ណសម្គាល់យានយន្ត និងស្លាកលេខនៅហាងដែលខ្លួនចូលទិញតែម្ដង
× ភ្នំពេញ៖ ចាប់ពីពេលនេះតទៅ ហាងលក់ទោចក្រយានយន្ត (ម៉ូតូ) និងរថយន្ត នឹងជួយរៀបចំបែបបទឲ្យអតិថិជនរបស់ខ្លួនទទួលបានបណ្ណសម្គាល់យានយន្ត និងស្លាកលេខ នៅនឹងហាងរបស់ខ្លួនតែម្ដង។
ក្រសួងសាធារណការ និងដឹកជញ្ជូន នៅថ្ងៃទី៣០ខែមករា បានដាក់ឲ្យប្រើប្រាស់ជាផ្លូវការនូវប្រព័ន្ធចុះបញ្ជីយានយន្តតាមអនឡាញ ដើម្បីបង្ករភាពងាយស្រួលដល់ម្ចាស់យានយន្ត។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ប្រព័ន្ធស្វ័យប្រវត្តិកម្មនេះ ត្រូវបានតភ្ជាប់ទៅហាងលក់ម៉ូតូ និងរថយន្ត ដើម្បីអាចចេញបណ្ណសម្គាល់ និងស្លាកលេខយានយន្ត ជូនអ្នកទិញភ្លាមៗនឹងនៅហាងតែម្ដង។ លោកបានថ្លែងនៅក្នុងពិធីសម្ពោធប្រព័ន្ធស្វ័យប្រវត្តិកម្មលើសេវាសាធារណៈរបស់ក្រសួងសាធារណការយ៉ាងដូច្នេះថា៖«ក្នុងមួយឆ្នាំមានម៉ូតូចុះបញ្ជីជិតកន្លះលាន បើយើងធ្វើប្រព័ន្ធដែលធ្វើដោយដៃ យើងមិនអាចធ្វើបានលឿនទេ។ យើងធ្វើប្រព័ន្ធនេះ (ប្រព័ន្ធស្វ័យប្រវត្តិកម្ម) ហើយ យើងតភ្ជាប់ប្រព័ន្ធថ្មីនេះទៅនឹងហាងលក់ម៉ូតូ រថយន្ត ហើយហាងនោះទៅជាភ្នាក់ងាររបស់យើងអាចផ្ដល់សេវានេះទាន់ពេលវេលា ផ្ដល់បណ្ណសម្គាល់យានជំនិះ និងស្លាកលេខម៉ូតូផង ដូច្នេះលឿនណាស់ មិនបាច់រង់ចាំរាប់ថ្ងៃ រាប់ខែនោះទេ»។
កាលពីខែធ្នូឆ្នាំ២០១៦ កន្លងទៅ លោក ស៊ុន ចាន់ថុល បានលើកឡើងពីគម្រោងផ្ដល់បណ្ណសម្គាល់យានយន្ត និងស្លាកលេខ នៅនឹងហាងលក់ម៉ូតូ និងរថយន្តទូទាំងប្រទេសនេះ។ លោកបានឲ្យដឹងថា ហាងលក់ម៉ូតូត្រូវបញ្ជូនព័ត៌មានរបស់អ្នកទិញម៉ូតូតាមប្រព័ន្ធអនឡាញទៅក្រសួងសាធារណការ រួចក្រសួង បន្ទាប់ពីពិនិត្យថាត្រឹមត្រូវហើយ នឹងបញ្ជូនលេខកូដសម្ងាត់ QR កូដ ទៅហាងលក់ម៉ូតូវិញ ទើបហាងអាចបោះបណ្ណសម្គាល់យានយន្ត និងចាប់ស្លាកលេខជូនអតិថិជន។
អ្នកទិញយានជំនិះ ត្រូវបង់ថ្លៃសេវាសាធារណៈចំពោះបណ្ណសម្គាល់យានយន្ត និងស្លាកលេខទាំងនោះ។ លោក ស៊ុន ចាន់ថុល បានលើកឡើងបែបនេះ នៅក្នុងសន្និបាតបូកសរុបការងារឆ្នាំ២០១៦ និងទិសដៅការងារឆ្នាំ២០១៧ របស់ក្រសួងសាធារណការ និងដឹកជញ្ជូន៕
Tag:
ស៊ុន ចាន់ថុល
ស្លាកលេខ
បណ្ណសម្គាល់យានយន្ត
© រក្សាសិទ្ធិដោយ thmeythmey.com