អន្តរជាតិ
កងទ័ពហ្វីលីពីនរង់ចាំបញ្ជាពី Duterte ដើម្បីចាប់ប៉ូលិសពុករលួយ
× ប្រធានាធិបតីហ្វីលីពីន Rodrigo Duterte នៅថ្ងៃទី៣១ ខែមករា បាននិយាយថា លោកនឹងបញ្ជាឲ្យកងកម្លាំងយោធាហ្វីលីពីន ធ្វើប្រតិបត្តិការចាប់ខ្លួនមន្ត្រីប៉ូលិសពុករលួយក្នុងពេលឆាប់ៗនេះ។ ការបញ្ចូលកងទ័ពមកក្នុងប្រតិបត្តិការបោសសម្អាតអំពើពុករលួយ គឺជាផ្នែកមួយនៃយុទ្ធនាការរដ្ឋបាលលោក Duterte ក្នុងការកែទម្រង់ស្ថាប័នប៉ូលិស។ នៅពេលនេះ រដ្ឋមន្ត្រីការពារជាតិបញ្ជាក់ថា កងទ័ពកំពុងរង់ចាំបញ្ជាជាលាយលក្ខណ៍អក្សរ ដើម្បីអនុវត្តបញ្ជាលោក Duterte ។
នៅថ្ងៃទី១ ខែកុម្ភះ រដ្ឋមន្ត្រីការពារជាតិ Delfin Lorenzana ក៏បានស្នើឲ្យវិមានប្រធានាធិបតី Malacañang សរសេរលិខិតបញ្ជាផ្លូវការ ដើម្បីឲ្យកងទ័ពធ្វើជាលិខិតូបករណ៍ផ្លូវច្បាប់ក្នុងការអនុវត្តការណែនាំរបស់លោកប្រធានាធិបតី Duterte ។ តាមរយៈសេចក្ដីប្រកាសថ្ងៃទី១ នេះ លោក Lorenzana បញ្ជាក់ថា៖ «ក្រសួងការពារជាតិ បានស្នើការិយាល័យរដ្ឋមន្ត្រីទទួលបន្ទុកគណៈរដ្ឋមន្ត្រី ឲ្យចេញបញ្ជាផ្លូវការទាក់ទងនឹងបទបញ្ជារបស់លោក Duterte ដើម្បីកងទ័ពអនុវត្តតាម។»
រដ្ឋមន្ត្រីការពារជាតិហ្វីលីពីន ស្នើដូចនេះ បន្ទាប់ពីលោក Duterte ត្រៀមកោះហៅយោធាឲ្យចូលរួមក្នុងការសម្អាតអំពើពុករលួយរបស់ប៉ូលិស។ ទំនុកចិត្តរបស់ប្រធានាធិបតី Rodrigo Duterte លើអង្គភាពប៉ូលិសកាន់ថយចុះទៅហើយ ក្រោយការចាប់ជំរិត និងសម្លាប់អ្នកជំនួញកូរ៉េខាងត្បូងរួចមក។ លោកប្រធានាធិបតី Duterte បានបញ្ជាឲ្យរំលាយអង្គភាពប្រឆាំងគ្រឿងញៀនរបស់ប៉ូលិស និងងាកមកបោសសម្អាតអំពើពុករលួយស៊ីរូងផ្ទៃក្នុងស្ថាប័ននេះវិញម្ដង។
ថ្លែងនៅក្នុងពិធីស្បថចូលកាន់តំណែងរបស់មន្ត្រីយោធាជាច្រើននាក់នៅថ្ងៃទី៣១ ខែមករា ប្រធានាធិបតីរូបនេះបញ្ជាក់ថា លោកនឹងរៀបចំកងកម្លាំងប៉ូលិសឡើងវិញ។ ក្នុងពេលនេះ នឹងមានមន្ត្រីប៉ូលិសជាច្រើន ត្រូវបានចាប់ខ្លួន ហើយលោកនឹងបញ្ជាឲ្យកងទ័ពចាប់ខ្លួនពួកគេតែម្ដង។ លោក Duterte ប្រហែលជាខកចិត្តខ្លាំងលើអង្គភាពប៉ូលិស ដែលកំពុងរួមរឹតដោយរឿងអាស្រូវ បើទោះជាប៉ូលិសដើរតួសំខាន់ក្នុងយុទ្ធនាការបង្ក្រាបគ្រឿងញៀនក៏ដោយ។
សារព័ត៌មាន Rappler ផ្សាយថា ទាក់ទងនឹងការហៅយោធាឲ្យចាប់ខ្លួនប៉ូលិស លោកប្រធានាធិបតី Duterte សង្កត់ធ្ងន់ថា ប្រសិនបើលោកមិនឲ្យកងទ័ពចូលមកពាក់ព័ន្ធរឿងនេះទេ លោកនឹងស្លាប់ ព្រោះគ្មាននរណាត្រួតពិនិត្យប៉ូលិសខិលខូចបានឡើយ។
ជាប្រពៃណី កងទ័ពហ្វីលីពីន មិនមានតួនាទីអ្វីក្នុងការចាប់ខ្លួនឧក្រិដ្ឋជនគ្រឿងញៀនឡើយ ហើយភារកិច្ចនេះ ជាបន្ទុកររបស់ប៉ូលិសជាតិប៉ុណ្ណោះ។ ប៉ុន្តែក្រោយការចាប់ជំរិត និងធ្វើឃាតពាណិជ្ជករកូរ៉េខាងត្បូង លោក Duterte ហាក់អស់ជំនឿចិត្តលើស្ថាប័ននេះយ៉ាងខ្លាំង។ ទាក់ទងរឿងនេះដែរ ទីប្រឹក្សាសន្តិសុខជាតិ Hermogenes Esperon Jr បញ្ជាក់ដែរថា វាមានលទ្ធភាពច្រើនដែលអង្គភាពទ័ពចូលរួមក្នុងប្រតិបត្តិការបង្ក្រាបគ្រឿងញៀនក្រោមការដឹកនាំរបស់ទីភ្នាក់ងារប្រឆាំងគ្រឿងញៀន៕
Tag:
Rodrigo Duterte
អំពើពុករលួយ
© រក្សាសិទ្ធិដោយ thmeythmey.com