ក្រសួងពាណិជ្ជកម្មទុកពេល២០ថ្ងៃទៀត ដល់អ្នកចង់នាំចេញអង្ករ និងថ្នាំជក់រួចពន្ធ ទៅវៀតណាម

ជាតិ

សេដ្ឋកិច្ច

ក្រសួងពាណិជ្ជកម្មទុកពេល២០ថ្ងៃទៀត ដល់អ្នកចង់នាំចេញអង្ករ និងថ្នាំជក់រួចពន្ធ ទៅវៀតណាម

01, Feb 2017 , 10:39 pm

រូបភាព

រូបសន្លឹកថ្នាំជក់ ពីវេបសាយក្រសួងពាណិជ្ជកម្ម

ដោយ: ថ្មីៗ

ភ្នំពេញ៖ ក្រសួងពាណិជ្ជកម្មប្រកាសពន្យាពេលចំពោះការដាក់ពាក្យសុំនាំចេញអង្ករ និងសន្លឹកថ្នាំជក់ស្ងួតទៅប្រទេសវៀតណាម ដល់ថ្ងៃទី២០ខែកុម្ភៈឆ្នាំ២០១៧ ។ នេះបើតាមសេចក្ដីជូនដំណឹងរបស់ក្រសួង នៅថ្ងៃទី១ខែកុម្ភៈ។

នៅក្នុងសេចក្ដីជូនដំណឹងរបស់ខ្លួន ក្រសួងពាណិជ្ជកម្មបានអំពាវនាវដល់ផលិតករ និងអ្នកនាំចេញ ដែលប្រកបអាជីវកម្មលើមុខទំនិញសន្លឹកថ្នាំជក់ និងអង្ករ ត្រូវរួសរាន់មកដាក់ពាក្យស្នើសុំអាជ្ញាបណ្ណនាំចេញមុខទំនិញខាងលើ នៅក្រសួងពាណិជ្ជកម្ម (នាយកដ្ឋាននាំចេញ-ចូល) ។

ការនាំចេញមុខទំនិញទាំងនេះ គឺស្ថិតក្រោមក្របខណ្ឌកិច្ចសម្របសម្រួលពាណិជ្ជកម្មរវាងរដ្ឋាភិបាលកម្ពុជា និងរដ្ឋាភិបាលវៀតណាម ដែលភាគីទាំងពីរបានចុះកិច្ចព្រមព្រៀង កាលពីខែតុលាឆ្នាំ២០១៦ កន្លងទៅ។ តាមរយៈកិច្ចព្រមព្រៀងនេះ ភាគីកម្ពុជាព្រមផ្ដល់ការអនុគ្រោះពន្ធដល់ភាគីវៀតណាមលើមុខទំនិញ ២៩បន្ទាត់ពន្ធ ឯភាគីវៀតណាមផ្ដល់ការអនុគ្រោះពន្ធលើមុខទំនិញ ៣៩បន្ទាត់ពន្ធដល់កម្ពុជា។ ជាមួយគ្នានោះភាគីវៀតណាមអនុញ្ញាតឲ្យនាំចូលអង្ករពីកម្ពុជាក្នុងបរិមាណ ៣០ម៉ឺនតោន និងសន្លឹកថ្នាំជក់ស្ងួតចំនួន ៣០០០តោន ក្នុងអត្រាពន្ធសូន្យនៅក្នុងឆ្នាំ២០១៧ ៕