ទំនាស់ដីខេត្តកំពត៖ លោក ខឹម វាសនា ជឿថា សម្ដេច ហ៊ុន សែន នឹងយល់ពីសន្ដានចិត្តស្មោះត្រង់ខ្លួន

ជាតិ

ទំនាស់ដីខេត្តកំពត៖ លោក ខឹម វាសនា ជឿថា សម្ដេច ហ៊ុន សែន នឹងយល់ពីសន្ដានចិត្តស្មោះត្រង់ខ្លួន

07, Feb 2017 , 2:26 pm

រូបភាព

ក្រុមអ្នកគាំទ្រគណបក្ស LDP នាំគ្នាទាមទារឲ្យអាជ្ធាធរខេត្តកំពតដោះលែងសកម្មជន១៣នាក់របស់ខ្លួន។ រូបថត Ldp Photos

ដោយ: ធឿន បញ្ញាឬទិ្ធ

ភ្នំពេញ៖ ប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា យល់ឃើញថា បញ្ហាទំនាស់ដីធ្លីរបស់សកម្មជនខ្លួន នៅខេត្តកំពតនោះ មិនមែនជាប់ពាក់ព័ន្ធនឹងរឿងនយោបាយនោះទេ ពោលគឺអាជ្ញាធរខេត្តកំពត ចង់រំលោភយកដីសកម្មជនខ្លួននេះតែម្ដង។ លោក ខឹម វាសនា ថា បញ្ហាទំនាស់ដីធ្លីនេះមានតែសម្ដេចនាយករដ្ឋមន្ត្រី ហ៊ុន សែន ទេ ដែលអាចជួយដោះស្រាយបាន ព្រោះសម្ដេចនឹងយល់ពីសន្ដានចិត្តដ៏ស្មោះត្រង់របស់ខ្លួន។

សមត្ថកិច្ចខេត្តកំពត បានចាប់ខ្លួនសមាជិកគណបក្សសម្ព័ន្ធដើម្បីប្រជាធិបតេយ្យចំនួន១៣នាក់ ក្រោមហេតុផលថា ពួកគេបានឈូសឆាយដីធ្លី និងបំផ្លាញដំណាំលើដីសម្បទានសង្គមកិច្ចពលរដ្ឋដទៃទៀត ដោយសារមានការញុះញ៉ងនៅពីក្រោយរបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ។ ហេតុផលសមត្ថកិច្ចនេះ លោក ខឹម វាសនា មិនអាចទទួលយកបានឡើយ។ លោក ថា ករណីទំនាស់ដែលបានកើតឡើងនេះ គឺដោយសារមានការឃុបឃិតបង្កើតរឿងបន្ថែមពីសំណាក់អាជ្ញាធរខេត្តកំពត ដើម្បីប៉ុនប៉ងយកដីលោក លី គឹមហុង ដែលជាសកម្មជនគណបក្សខ្លួន ទុកសម្រាប់លក់ឲ្យឈ្មួញ។

ត្រង់ចំណុចនេះលោក ខឹម វាសនា ចាត់ទុកបញ្ហាទំនាស់ដែលកើតឡើងនេះ លុះត្រាតែមានការអន្តរាគមន៍ពីសម្ដេចនាយករដ្ឋមន្ត្រី ហ៊ុន សែន ព្រោះមានតែសម្ដេចទេ ដែលយល់ពីសន្តានចិត្តដ៏ស្មោះត្រង់របស់លោក។ ថ្លែងក្នុងសន្និសីទកាសែត នៅទីស្នាក់ការបក្សកាលពីថ្ងៃទី០៦ កុម្ភៈ ប្រធានគណបក្សសម្ព័ន្ធដើម្បីប្រជាធិបតេយ្យរូបនេះ បានបញ្ជាក់ដូច្នេះថា៖«ខ្ញុំថានេះមិនមែនជារឿងនយោបាយទេ សម្ដេចតេជោគាត់អត់ដឹងទេ បើភូមិគាត់ទុកចិត្តក៏អ៊ីចឹង បើឃុំគាត់ទុកចិត្តក៏អ៊ីចឹង …។ ដូច្នេះសម្ដេចគាត់មិនមានព័ត៌មានមកពីណាយកទៅធ្វើការវិនិច្ឆ័យពិត។ អ៊ីចឹងបានសេចក្ដីសង្ឃឹមចុងក្រោយរបស់ខ្ញុំ ខ្ញុំចេះតែចង់បើកបង្ហាញសម្ដេចនាយកគាត់ដឹង ។ ជាពិសេសខ្ញុំជឿថា មិនមែនតែប្រជាពលរដ្ឋទេ សម្ដេចនាយកក៏គាត់យល់អំពីស្ថានភាពផ្លូវចិត្តរបស់ខ្ញុំ ចរិកលក្ខណៈសន្តានរបស់ខ្ញុំថា ខ្ញុំជាមនុស្សដែលស្មោះត្រង់។ បើរឿងនេះមិនពិត បើរឿងនេះមិនត្រឹមត្រូវ គឺខ្ញុំមិនធ្វើទេ(លូកដៃចូលបញ្ហានេះ) នេះជាតម្លៃរបស់ខ្ញុំ»។

សូមស្តាប់សំឡេង

បន្ថែមពីលើនេះលោក ខឹម វាសនា ស្នើឲ្យរដ្ឋាភិបាលបង្កើតគណៈកម្មការត្រឹមត្រូវមួយ ក្នុងការជួយអន្តរាគមន៍ដោះស្រាយបញ្ហាទំនាស់ដីធ្លីរបស់សកម្មជនខ្លួន និងដោះលែងអ្នកទាំង១៣នាក់ ដែលត្រូវបានសមត្ថកិច្ចចាប់ខ្លួននោះផងដែរ។អ្នកទាំង១៣នាក់នេះ ត្រូវបានបញ្ជូនមកតុលាការខេត្តកំពតនៅថ្ងៃទី០៧ កុម្ភៈនេះ។

តំបន់ដីសម្បទានសង្គមកិច្ចនៅតំបន់តេជោអភិវឌ្ឍន៍មានទំហំជាង១២០០ហិកតា ដែលគ្របដណ្ដប់ទៅលើភូមិតេជោក្បាលដំរី និងភូមិតេជោអន្លង់ក្មេងលេង។ បើតាមអាជ្ញាធរខេត្តកំពត ពលរដ្ឋនៅភូមិតេជោក្បាលដំរី ត្រូវបានបែងចែកជាពីរក្រុម គឺអ្នករស់នៅក្នុង និងក្រៅដីសម្បទានសង្គមកិច្ច។ ពលរដ្ឋរស់នៅក្រៅដីសម្បទានសង្គមកិច្ចជិត១ពាន់គ្រួសារ ទទួលបានបណ្ណកម្មសិទ្ធិរួចរាល់ហើយ។ ចំណែក អ្នករស់នៅក្នុងដីសម្បទានសង្គមកិច្ច២០០គ្រួសារទៀត មិនទាន់ទទួលបណ្ណកម្មសិទ្ធិនៅឡើយទេ ដោយអាជ្ញាធរកំពុងដោះស្រាយបញ្ហានេះជូនពួកគេ។ ដោយឡែកដីលោក លី គឹមហុង សកម្មជនគណបក្សសម្ព័ន្ធដើម្បីប្រជាធិបតេយ្យ កំពុងមានវិវាទនេះ មានទំហំ២០ហិកតា នៅតំបន់តេជោក្បាលដំរី ឃុំតេជោអភិវឌ្ឍន៍ ស្រុកឈូក ខេត្តកំពត ៕