ជាតិ
ថៃផ្តល់អាហារូបករណ៍ថ្នាក់បណ្ឌិត និងបរិញ្ញាបត្រជាន់ខ្ពស់ដល់កម្ពុជា ឡាវ និងមីយ៉ាន់ម៉ា
× ភ្នំពេញ៖ ក្រសួងអប់រំ យុវជន និងកីឡា បានចេញសេចក្ដីជូនដំណឹងស្ដីពីអាហារូបករណ៍ថ្នាក់បណ្ឌិត ថ្នាក់បរិញ្ញាបត្រជាន់ខ្ពស់ ទៅសិក្សានៅប្រទេសថៃ។ អាហារូបករណ៍នេះ ផ្ដល់ដល់និស្សិត និងសាស្ត្រាចារ្យមហាវិទ្យាល័យ។ នេះបើយោងតាមទំព័រហ្វេសប៊ុកផ្លូវការរបស់ក្រសួងអប់រំ យុវជន និងកីឡា។
ក្រសួងអប់រំ បានប្រកាសជ្រើសរើសនិស្សិតអាហារូបករណ៍ថ្នាក់បណ្ឌិត និងថ្នាក់បរិញ្ញាបត្រជាន់ខ្ពស់ ទៅសិក្សានៅប្រទេសថៃ សម្រាប់ឆ្នាំ២០១៧នេះ។ អាហារូបករណ៍នេះ ក្រោមកិច្ចសហប្រតិបត្តិការរវាងគណៈកម្មការឧត្តមសិក្សានៃក្រសួងអប់រំថៃ និងបណ្ដាញសាកលវិទ្យាល័យអាស៊ាន អឺរ៉ុប (ASEAN European Acaddemic University Network (ASEAN-UNINET) នឹងផ្ដល់អាហារូបករណ៍ចំនួន ២២កន្លែងដល់និស្សិត និងសាស្ត្រាចារ្យមហាវិទ្យាល័យ មកពីប្រទេសកម្ពុជា ឡាវ មីយ៉ាន់ម៉ា។
អាហារូបករណ៍នេះ ផ្ដល់ដល់និស្សិត និងសាស្ត្រាចារ្យ ដើម្បីបន្តការសិក្សាថ្នាក់បណ្ឌិត (PhD) និងបរិញ្ញាបត្រជាន់ខ្ពស់លើមុខជំនាញ វិទ្យាសាស្ត្រ វិស្វកម្ម កសិកម្ម និងសេដ្ឋកិច្ច នៅតាមសាកលវិទ្យាល័យនានានៅក្នុងប្រទេសថៃ ក្នុងកម្មវិធី Thailand Scholarship។
លក្ខខណ្ឌនៃការចុះឈ្មោះ បេក្ខជនទាំងពីរភេទ ត្រូវមានសញ្ជាតិខ្មែរ មានសញ្ញាបត្របរិញ្ញាបត្រជាន់ខ្ពស់ (សម្រាប់ថ្នាក់បណ្ឌិត) និងមានសញ្ញាបត្របរិញ្ញាបត្រ (សម្រាប់ថ្នាក់បរិញ្ញាបត្រជាន់ខ្ពស់)។ បន្ថែមលើនេះ បេក្ខជនទាំងពីរភេទ ត្រូវមានអាយុ៣៥ឆ្នាំ សម្រាប់ថ្នាក់បណ្ឌិត និងអាយុ២៧ឆ្នាំសម្រាប់ថ្នាក់បរិញ្ញាបត្រជាន់ខ្ពស់ (ដោយគិតដល់ថ្ងៃទី០១ ខែតុលា ឆ្នាំ២០១៧)។ ជាមួយគ្នានេះ បេក្ខជន ត្រូវមានចំណេះដឹងអង់គ្លេសជ្រៅជ្រះ និងមានសុខភាពល្អ។
បេក្ខជនដែលមានបំណងចូលរួមកម្មវិធីអាហារូបករណ៍នេះ អាចរកពាក្យសុំអាហារូបករណ៍នៅស្ថានទូតថៃប្រចាំកម្ពុជា ឬទាញយកពីគេហទំព័រ http: //www.inte.mua.go.th រួចផ្ញើទៅស្ថានទូតថៃប្រចាំកម្ពុជាឲ្យបានមុនថ្ងៃទី ២៨ ខែកុម្ភៈ ឆ្នាំ២០១៧។ អាហារូបករណ៍នេះ ត្រូវបានភាគីផ្ដល់អាហារូបករណ៍ផ្ដល់ប្រាក់អាហារូបករណ៍ និងថ្លៃផ្គត់ផ្គង់អាហារ ការស្នាក់នៅ រ៉ាប់រងថ្លៃសេវាសុខភាព និងសំបុត្រយន្តហោះទៅមក។ ព័ត៌មានលម្អិតទាក់ទងទៅការិយាល័យគណៈកម្មការឧត្តមសិក្សាថៃ Mr.Teeratorn Likhitphorngsathorn Tel: +៦៦ ២៦១០ ៥៤៦៥, Fax: +៦៦ ២៣៥៤ ៥៥៧០ Email: [email protected]៕
© រក្សាសិទ្ធិដោយ thmeythmey.com