ជាតិ
សង្គមជាតិ
សម្តេច ហ៊ុន សែន រម្លឹកអាជ្ញាធរខេត្តព្រៃវែងហាមពលរដ្ឋជួលដីតាមព្រំដែន រូបថតទំព័រហ្វេសប៊ុកសម្តេច ហ៊ុន សែន
×
ភ្នំពេញ៖ ថ្លែងក្នុងពិធីសំណេះសំណាលមន្ត្រីរាជការខេត្តព្រៃវែងនៅថ្ងៃទី១០ ខែកុម្ភៈនេះ សម្តេចនាយករដ្ឋមន្ត្រី ហ៊ុន សែន បានឆ្លៀតរម្លឹកអាជ្ញាធរខេត្តព្រៃវែង មិនត្រូវអនុញ្ញាតឲ្យពលរដ្ឋជួលដីនៅតាមព្រំដែនឡើយ។
«មន្ត្រីអាជ្ញាធរខេត្ត ត្រូវមានទំនាក់ទំនង និងកិច្ចសហប្រតិបត្តិការល្អជាមួយអាជ្ញាធរវៀតណាម ដើម្បីបង្កលក្ខណៈអោយប្រជាពលរដ្ឋងាយស្រួលក្នុងការរកស៊ីជាមួយគ្នា ព្រោះថាខេត្តព្រៃវែង គឺជាខេត្តដែលមានព្រំប្រទល់ជាប់ប្រទេសវៀតណាម ហើយលើសពីនេះមិនត្រូវអនុញ្ញាតអោយបងប្អូនប្រជាពលរដ្ឋខ្មែរជួលដីនៅតាមព្រំដែនឡើយ»។ នេះបើតាមការសរសេរលើទំព័រហ្វេសប៊ុកសម្តេច ហ៊ុន សែន។
ក្រៅពីរម្លឹកអាជ្ញាធរខេត្តព្រៃវែង ហាមឃាត់ការជួលដីនៅតាមព្រំដែន សម្តេច ហ៊ុន សែនបានប្រាប់អាជ្ញាធរមូលដ្ឋាន ត្រូវយកចិត្តទុកដាក់ថែរក្សាសន្តិសុខ សណ្តាប់ធ្នាប់សង្គម ដូចជា ការបង្ក្រាបបទល្មើសផ្សេងៗ ជាពិសេសបទល្មើសគ្រឿងញៀន និងអំពើចោរកម្ម។ល។ បន្ថែមលើសពីនោះ សម្តេចបានបន្តប្រាប់មន្ត្រីទាំងនោះ ត្រូវយកចិត្តទុកដាក់លើការបម្រើសេវាសាធារណជូនប្រជាពលរដ្ឋ ដោះស្រាយជម្លោះដីធ្លី លុបបំបាត់នូវភាពអសកម្មនានា ដែលប៉ះពាល់អារម្មណ៍របស់ពលរដ្ឋ រួមទាំងត្រូវសហការគាំទ្រគយ និងពន្ធដារ ក្នុងការប្រមូលពន្ធឲ្យមានប្រសិទ្ធិភាព ដើម្បីពង្រឹងចំណូលជាតិ។
«អាជ្ញាធរខេត្តត្រូវធ្វើការផ្សព្វផ្សាយអោយបានទូលំទូលាយនូវសារាចរនាំអំពីផ្សាលក់ដូរនិងសារាចរ ស្ដីពីការ លុបការបង់ថ្លៃការលក់តាម កញ្ច្រែង កញ្ចើ ល្អី»។ ទំព័រហ្វេសប៊ុកផ្សាយពីជំនួបរវាងសម្តេច ហ៊ុន សែន និងអាជ្ញាធរខេត្តព្រៃវែង បន្ថែម នៅថ្ងៃនេះ៕
Tag:
ហ៊ុន សែន
ដីធ្លី
ព្រៃវែង
វៀតណាម
© រក្សាសិទ្ធិដោយ thmeythmey.com