អន្តរជាតិ
អាមេរិករារាំងការតែងតាំងអតីតនាយករដ្ឋមន្ត្រីប៉ាឡេស្ទីនក្នុងការដឹកនាំបេសកកម្មរបស់អ.ស.ប
×![]()
ដោយ: VOA
សហរដ្ឋអាមេរិកបានរារាំងការតែងតាំងអតីតនាយករដ្ឋមន្ត្រីប៉ាឡេស្ទីនក្នុងការដឹកនាំបេសកកម្មនយោបាយរបស់អង្គការសហប្រជាជាតិនៅក្នុងប្រទេសលីប៊ី។
អគ្គលេខាធិការអង្គការសហប្រជាជាតិលោក Antonio Guterres បានប្រកាសប្រាប់ក្រុមប្រឹក្សាសន្តិសុខជាតិរបស់អង្គការសហប្រជាជាតិនៅក្នុងលិខិតមួយកាលពីថ្ងៃព្រហស្បតិ៍ថា លោកគ្រោងនឹងដាក់ឲ្យលោកសេដ្ឋវិទូ Salam Fayyad ដែលទទួលបានការអប់រំនៅបស្ចិមប្រទេសរូបនោះឲ្យកាន់តួនាទីមួយនេះ។ លោក Fayyad ដែលត្រូវបានអន្តរជាតិគោរពនោះមានអាយុ៦៤ឆ្នាំ។ លោកកាន់តំណែងជានាយករដ្ឋមន្ត្រីរបស់អាជ្ញាធរប៉ាឡេស្ទីន ពីឆ្នាំ២០០៧ ដល់ឆ្នាំ២០១៣ ហើយលោកក៏ធ្លាប់ជារដ្ឋមន្ត្រីក្រសួងហិរញ្ញវត្ថុមួយរូបផងដែរ។
ប៉ុន្តែឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិលោកស្រី Nikki Haley បានចេញសេចក្តីថ្លែងការណ៍មួយកាលពីល្ងាចថ្ងៃសុក្រថា អាមេរិកមានការខកចិត្តចំពោះជម្រើសមួយនេះ។
លោកស្រី Haley បានថ្លែងនៅក្នុងសេចក្តីថ្លែងការណ៍របស់លោកស្រីថា៖ «ជាយូរមកហើយដែលអង្គការសហប្រជាជាតិមានភាពលំអៀងទៅរកអាជ្ញាធរប៉ាឡេស្ទីនដែលធ្វើបាបសម្ព័ន្ធមិត្តអ៊ីស្រាអ៊ែលរបស់យើង»។ លោកស្រីថ្លែងបន្ថែមថា៖ «តទៅមុខទៀត អាមេរិកនឹងបញ្ចេញនូវសកម្មភាព មិនត្រឹមតែនិយាយនោះទេ ដើម្បីគាំទ្រដល់សម្ព័ន្ធមិត្តរបស់យើង»។
សហរដ្ឋអាមេរិកស្ថិតក្នុងចំណោមក្រុមសមាជិកភាគតិចដែលមិនទទួលស្គាល់ប៉ាឡេស្ទីនថាជារដ្ឋឯករាជ្យមួយ ហើយថាប៉ាឡេស្ទីនមានឋានៈត្រឹមជាអ្នកអង្កេតការណ៍តែប៉ុណ្ណោះ មិនមែនជាសមាជិកនៅក្នុងអង្គភាពពិភពលោកមួយនេះនោះទេ៕
© រក្សាសិទ្ធិដោយ thmeythmey.com
