ក្រសួងអប់រំ បង្កើតប្រព័ន្ធពង្រឹងសមត្ថភាពសម្រាប់សិស្សថ្នាក់ទី១២ តាមប្រព័ន្ធអនឡាញ

ជាតិ

ក្រសួងអប់រំ បង្កើតប្រព័ន្ធពង្រឹងសមត្ថភាពសម្រាប់សិស្សថ្នាក់ទី១២ តាមប្រព័ន្ធអនឡាញ

13, Feb 2017 , 8:59 am

រូបភាព

ដោយ: ថ្មីៗ

ក្រសួងអប់រំ យុវជន និងកីឡា នឹងដាក់ឲ្យដំណើរការប្រព័ន្ធពង្រឹងសមត្ថភាព និងតេស្ដសមត្ថភាពដោយខ្លួនឯងសម្រាប់សិស្សថ្នាក់ទី១២ លើប្រព័ន្ធអ៊ឺនធើណិត។ តេស្ដសមត្ថភាពនេះ ផ្ដោតទៅលើមុខវិជ្ជា គណិតវិទ្យា រូបវិទ្យា គីមីវិទ្យា ជីវវិទ្យា និងប្រវត្តិវិទ្យា។ នេះបើតាមទំព័រហ្វេសប៊ុកផ្លូវការរបស់ក្រសួងអប់រំ។

ក្រសួងអប់រំ បានបង្កើតប្រព័ន្ធសិក្សាពីចម្ងាយ (E-Learning Management System) ដែលផ្ដល់ឲ្យសិស្សានុសិស្សថ្នាក់ទី១២ សម្រាប់ប្រើប្រាស់ក្នុងពេលទំនេរពីការសិក្សានៅក្នុងថ្នាក់។ ប្រព័ន្ធពង្រឹងសមត្ថភាព និងតេស្ដសមត្ថភាពនេះ ដើម្បីឲ្យសិស្សឆ្លើយសំណួរ ឬធ្វើលំហាត់លើមុខវិជ្ជា គណិតវិទ្យា រូបវិទ្យា គីមីវិទ្យា ជីវវិទ្យា និងប្រវត្តិវិទ្យា តាមប្រព័ន្ធអនឡាញ។ កម្មវិធី E-Learning Management System នេះ អាចប្រើប្រាស់ ទូរសព្ទស្មាតហ្វូន Tablet ឬកុំព្យូទ័រ។

ក្រសួងអប់រំ បានបញ្ជាក់ថា ប្រព័ន្ធនេះ អាចជួយពង្រឹងសមត្ថភាពសិស្សានុសិស្សមួយកម្រិតបន្ថែមទៀត លើចំណេះដឹងដែលទទួលបានពីការសិក្សានៅសាលាជាលោកគ្រូ អ្នកគ្រូ។ គួរបញ្ជាក់ថា ប្រព័ន្ធនេះ ក្រសួងអប់រំ នឹងប្រកាសដាក់ឲ្យប្រើប្រាស់ជាផ្លូវការនៅថ្ងៃទី១៣ ខែកុម្ភៈ ឆ្នាំ២០១៧ នៅទីស្ដីការក្រសួងអប់រំ យុវជន និងកីឡា។ ជាមួយគ្នានេះ បន្ទាប់ពីដំណើរការប្រព័ន្ធនេះ សិស្សានុសិស្សទាំងអស់ អាចធ្វើតេស្ដសមត្ថភាព និងពង្រឹងសមត្ថភាព តាមរយៈគេហទំព័រក្រសួងអប់រំ bacii.moeys.gov.kh៕