អន្តរជាតិ
នយោបាយអន្តរជាតិ
អាមេរិក-ជប៉ុន-កូរ៉េខាងត្បូងស្នើក្រុមប្រឹក្សាសន្តិសុខប្រជុំបន្ទាន់ ក្រោយព្យុងយ៉ាងបាញ់មីស៊ីលផ្គើនសហគមន៍អន្តរជាតិ
×
ភ្លាមៗបន្ទាប់ពីកូរ៉េខាងជើងបាញ់មីស៊ីលនៅថ្ងៃទី១២ ខែកុម្ភៈ អាមេរិក និងសម្ព័ន្ធមិត្តពីរទៀត គឺជប៉ុន និងកូរ៉េខាងត្បូង បានស្នើកោះប្រជុំកិច្ចបន្ទាន់ក្រុមប្រឹក្សាសន្តិសុខ ដើម្បីចេញចំណាត់ការលើរដ្ឋកុម្មុយនីស្តមួយនេះ។ ការបាញ់មីស៊ីលនៅថ្ងៃទី១២ គឺជាសកម្មភាពបំពានលើកទី១ របស់កូរ៉េខាងជើងក្នុងឆ្នាំ២០១៧ ដែលទំនងជាការសាកល្បងលើចំណាត់ការរបស់រដ្ឋបាលអាមេរិកថ្មីរបស់ប្រធានាធិបតី ដូណាល់ ត្រាំ ។
ការបាញ់សាកល្បងមីស៊ីលចុងក្រោយពីសំណាក់កូរ៉េខាងជើង បានរងការរិះគន់យ៉ាងខ្លាំងពីជប៉ុន និងកូរ៉េខាងត្បូង ដែលនៅក្បែរខាងគ្នា។ មិនយូរប៉ុន្មានក្រោយការបាញ់នេះ ជប៉ុន, កូរ៉េខាងត្បូង និងអាមេរិក ក៏បានស្នើឲ្យក្រុមប្រឹក្សាសន្តិសុខអង្គការសហប្រជាជាតិ កោះប្រជុំបន្ទាន់មួយនៅថ្ងៃទី១៣ ខែកុម្ភៈ បន្ទាប់ពីកូរ៉េខាងជើងនិយាយថា ខ្លួនបានទទួលជោគជ័យក្នុងការបាញ់សាកល្បងមីស៊ីលរយៈចម្ងាយមធ្យមនេះ។
យោងតាមទីភ្នាក់ងារព័ត៌មាន AFP អ្នកនាំពាក្យបេសកកម្មអាមេរិកប្រចាំអង្គការសហប្រជាជាតិនិយាយថា អាមេរិក ព្រមគ្នាជាមួយជប៉ុន និងកូរ៉េខាងត្បូង បានស្នើបើកកិច្ចប្រជុំពិភាក្សាបន្ទាន់នេះ។ គេរំពឹងថា កូរ៉េខាងជើង នឹងរងការដាក់ថ្កោលទោសខ្លាំងពីសហគមន៍អន្តរជាតិ ចំពោះទង្វើព្រហើនបែបនេះ។ ហើយទណ្ឌកម្មថ្មីៗទៀត ទំនងជាត្រូវបានដាក់លើរដ្ឋឯកោមួយនេះ បន្ថែមពីលើទណ្ឌកម្មដែលមានស្រាប់ហើយនោះ។
ការស្នើនេះ ធ្វើឡើងក្រោយក្រុងព្យុងយ៉ាង នៅថ្ងៃទី១៣ ខែកុម្ភៈ បញ្ជាក់ថា ការសាកល្បងមីស៊ីលដែលដឹកនាំបញ្ជាផ្ទាល់ដោយមេដឹកនាំកំពូល គីម ជុងអ៊ុន គឺជោគជ័យ។ សារព័ត៌មានរដ្ឋកូរ៉េខាងជើង KCNA ផ្សាយថា មីស៊ីលដែលបាញ់នេះជាប្រភេទមីស៊ីលចម្ងាយមធ្យមស៊េរីថ្មី Pukguksong-2 ដែលអាចបំពាក់ក្បាលគ្រាប់នុយក្លេអ៊ែរបាន។ មីស៊ីលនេះ ត្រូវបានអភិវឌ្ឍចេញពីមីស៊ីលបាលីស្ទិកបាញ់ពីនាវាមុជទឹក ដែលធ្លាប់ជោគជ័យក្នុងការសាកល្បងកាលពីខែសីហា ឆ្នាំ២០១៦ ។
នេះ ជាលើកទីមួយសម្រាប់ឆ្នាំ២០១៧ ដែលកូរ៉េខាងជើងបាញ់មីស៊ីល ហើយបាញ់ចំពេលដែលប្រធានាធិបតី ដូណាល់ ត្រាំ កំពុងជួបជាមួយនាយករដ្ឋមន្ត្រីជប៉ុន ស៊ីនហ្សូ អាបេ ដែរ។ ជាការពិត នេះអាចជាការសាកល្បងប្រតិកម្មប្រធានាធិបតី ដូណាល់ ត្រាំ ដែលទើបចូលកាន់តំណែង។ ពីរដ្ឋ Florida លោក ត្រាំ និងនាយករដ្ឋមន្ត្រី អាបេ ក៏បានចេញថ្លែងការណ៍ភ្លាមៗ ដើម្បីឆ្លើយតបសកម្មភាពបង្ករឿងរបស់កូរ៉េខាងជើង។
ប្រធានាធិបតីអាមេរិក បានសន្យាចំពោះមុខមេដឹកនាំជប៉ុនថា អាមេរិកនឹងឈរជាមួយជប៉ុន ១០០ភាគរយ ដើម្បីទប់ទល់នឹងការគំរាមកំហែងទាំងឡាយ។ លើសពីនេះ លោក ត្រាំ ក៏ទំនងជាពិចារណាលើការដាក់ទណ្ឌកម្មថ្មីទៀត រួមទាំងការរឹតបន្តឹងហិរញ្ញវត្ថុ, បង្កើនវត្តមានយោធាទាំងផ្លូវអាកាសនិងផ្លូវគោក នៅតំបន់ក្បែរឧបទ្វីបកូរ៉េ ព្រមទាំងពង្រាយប្រព័ន្ធការពារមីស៊ីលផងដែរ៕
Tag:
អាមេរិក
ជប៉ុន
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com