មេធាវីការពារក្តីសម្ដេច ហ៊ុន សែន បានដាក់ពាក្យប្ដឹងលោក គឹម សុខ ទៅតុលាការហើយ

ជាតិ

មេធាវីការពារក្តីសម្ដេច ហ៊ុន សែន បានដាក់ពាក្យប្ដឹងលោក គឹម សុខ ទៅតុលាការហើយ

13, Feb 2017 , 11:50 am

រូបភាព

ដោយ: ថ្មីៗ

ភ្នំពេញ៖ លោក គី តិច មេធាវីការពារក្តីសម្ដេច ហ៊ុន សែន បានដាក់ពាក្យប្ដឹងលោក គឹម សុខ អ្នកឃ្លាំមើលបញ្ហាសង្គម និងនយោបាយ ទៅតុលាការហើយ នៅព្រឹកថ្ងៃទី១៣ កុម្ភៈនេះ។ ក្នុងពាក្យបណ្ដឹងនោះ សម្ដេច ហ៊ុន សែន បានទាមទារសំណងជំងឺចិត្តពីលោក គឹម សុខ ចំនួន២ពាន់លានរៀល ស្មើនឹង៥០ម៉ឺនដុល្លារអាមេរិក។

សម្ដេច ហ៊ុន សែន ប្ដឹងលោក គឹម សុខ ដែលបានបកស្រាយនៅក្នុងវិទ្យុអាស៊ីសេរី ដោយចោទគណបក្សប្រជាជនកម្ពុជា ជាអ្នកសម្លាប់លោក កែម ឡី។ នៅក្នុងពាក្យបណ្តឹងបានសរសេរដូច្នេះថា៖ «វេទិកាដែលរៀបចំឡើងដោយវិទ្យុអាស៊ីសេរីខាងលើនេះ ត្រូវបានធ្វើការផ្សព្វផ្សាយជាសាធារណៈ។ ឆ្លៀតក្នុងឱកាសនេះ វាគ្មិនឈ្មោះ គឹម សុខ ពិតជាបានប្រព្រឹត្តអំពើដោយចេតនានេះឡើង ក្នុងគោលបំណងចោទប្រកាន់ មួលបង្កាច់ និងទម្លាក់កំហុសយ៉ាងងងឹតងងុល ទៅលើ គណបក្សប្រជាជនកម្ពុជា ថា ជាអ្នកសម្លាប់លោកបណ្ឌិត កែម ឡី។ អំពើនេះ ពិតជាធ្វើឲ្យប៉ះពាល់យ៉ាងធ្ងន់ធ្ងរ ដល់កិត្តិយស កិត្តិស័ព្ទ និងភាពស្អាតស្អំរបស់គណបក្សប្រជាជនកម្ពុជា ហើយក៏បានបញ្ជាក់អំពីចេតនាទុច្ចរិត បង្កជាការញុះញង់ បំផុសបំផុល បញ្ឆេះកំហឹងដល់មហាជន ដែលអាចឲ្យកើតមានចលាចលធ្ងន់ធ្ងរក្នុងសង្គមទាំងមូល»។

ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការ ស្ពានមិត្តភាពកម្ពុជា-ចិន កោះធំ នៅព្រឹកនេះ នាយរដ្ឋមន្ត្រី ហ៊ុន បានផ្ដាំលោក គឹម សុខ ថា កុំឲ្យរត់ចោលស្រុកផងដែរ ព្រោះពេលនេះសម្ដេច បានបញ្ជាឲ្យកងកម្លាំងតាមឃ្លាំមើលហើយ។

តែយ៉ាងណាលោក គឹម សុខ បានសរសេរលើហ្វេសប៊ុកខ្លួនដូច្នេះថា៖« ខ្ញុំនឹងទទួលខុសត្រូវនូវអ្វីដែលខ្ញុំបាននិយាយ ប្រសិនបើការអត្ថាធិប្បាយរបស់ខ្ញុំពិតជាមានចំណុចជាប់ទោសតាមច្បាប់យុត្តិធម៌មិនបំភ្លៃមែន…»៕