អន្តរជាតិ
ប្រជាជនម៉ិកស៊ិកបាតុកម្ម ទាមទាររកការគោរពពីប្រធានាធិបតី ដូណាល់ ត្រាំ
×![]()
ដោយ: ថ្មីៗ
ប្រជាជនម៉ិកស៊ិកនាំគ្នាបាតុកម្មប្រឆាំងគោលនយោបាយប្រឆាំងជនអន្តោប្រវេសន៍របស់ប្រធានាធិបតីដូណាល់ ត្រាំ នៅចុងសប្តាហ៍នេះ។ចលនាបាតុកម្មដែលត្រូវបានគេចាត់ទុកថាមិនមែនជាចលនានយោបាយនោះ បានទាមទារឲ្យរដ្ឋបាលលោក ដូណាល់ ត្រាំ គោរពប្រជាជនម៉ិកស៊ិកនិងជនអន្តោប្រវេសន៍ម៉ិកផងដែរ។
ប្រជាជនម៉ិកស៊ិកប្រហែល ២ម៉ឺននាក់បានប្រមូលផ្តុំគ្នានៅកណ្តាលរដ្ឋធានីម៉ិកស៊ិកដើម្បីបាតុកម្មប្រឆាំងលោក ដូណាល់ ត្រាំ និងគោលនយោបាយជនអន្តោប្រវេសន៍ដែលបណ្តេញប្រជាជនចេញនិងសង់ជញ្ជាំងតាមព្រំដែនជាដើម។ ប្រជាជនម៉ិកស៊ិកទាំងនោះបានទាមទារឲ្យរដ្ឋបាលអាមេរិក គោរពប្រទេសម៉ិកស៊ិកនិងប្រជាជនជាជនអន្តោប្រវេសន៍។
យោងតាមសារព័ត៌មានអាមេរិក Politico អ្នកចូលរួមបាតុកម្មនោះស្លៀកសម្លៀកបំពាក់ពណ៌ស និងមានកាន់បដាដែលមានសរសេរប្រឆាំងដូណាល់ ត្រាំ ច្រើនផងដែរ។ ហើយពួកគេបានបញ្ជាក់ប្រាប់ថា ចលនាបាតុកម្មនេះមិនពាក់ព័ន្ធរឿងនយោបាយឡើយ។ ក្រៅពីរិះគន់ដូណាល់ ត្រាំ ពួកគេក៏រិះគន់ប្រធានាធិបតីម៉ិកស៊ិក Enrique Pena Nieto ខ្លាំងៗផងដែរ ដែលមិនហ៊ានតតាំងជាមួយលោកប្រធានាធិបតី ដូណាល់ ត្រាំ។
ក្នុងចំណោមបដាទាំងនោះ មានបដាមួយសរសេរថា៖« អគុណលោក ត្រាំ ដែលធ្វើឲ្យម៉ិកស៊ិករួបរួមសាមគ្គីគ្នា»។ បដាផ្សេងទៀតបញ្ជាក់ថា៖«យើងស្រឡាញ់អាមេរិក តែយើងស្អប់ការរើសអើងពូជសាសន៍។ យើងបាតុកម្មដើម្បីទាមទារភាពថ្លៃថ្នូរ»។
គេដឹងច្បាស់ថា ចលនាបាតុកម្មរបស់ប្រជាជនម៉ិកស៊ិកគឺដើម្បីប្រឆាំងតវ៉ាគម្រោងសង់ជញ្ជាំងនៅតាមព្រំដែនអាមេរិក-ម៉ិកស៊ិក និងបង្កើនសកម្មភាពបណ្តេញប្រជាជនម៉ិកស៊ិកដែលជាជនអន្តោប្រវេសន៍ខុសច្បាប់ចេញពីអាមេរិក។ ម្យ៉ាងប្រធានាធិបតីអាមេរិករូបនះបានព្យាយាមដាក់សម្ពាធលើបណ្តាក្រុមហ៊ុននានាឲ្យបើកក្រុមហ៊ុននិងជួលប្រជាជនអាមេរិកមិនមែននៅ ម៉ិកស៊ិកឡើយ។
ពាក់ព័ន្ធការធ្វើបាតុកម្មនេះ ប្រជាជនម៉ិកស៊ិកដែលចូលរួមបាតុកម្មបានបង្ហាញការយល់ឃើញថា វាជាសារទៅកាន់ប្រធានាធិបតីអាមេរិក និងបង្ហាញពីការសាមគ្គីគ្នារវាងប្រជាជនម៉ិកស៊ិកក្នុងការគាំទ្រជនអន្តោប្រវេសន៍ដែលរស់នៅអាមេរិក។
សិស្សសាកលវិទ្យាល័យមួយ Ana Fernanda Isla បានអះអាងដូច្នេះថា៖«យើងរួបរួមគ្នាបាតុកម្មក៏ព្រោះតែយើងចង់បង្ហាញទៅកាន់ប្រជាជនដែលរងគ្រោះដោយសារការរើសអើងនៅអាមេរិកថា យើងនឹងនៅជាមួយពួកគេ»៕
© រក្សាសិទ្ធិដោយ thmeythmey.com
