ជាតិ
សេដ្ឋកិច្ច
NBC ដាក់ឲ្យដេញថ្លៃប្រាក់ ៤០ ពាន់លានរៀលលើកទី ៥
× ធនាគារជាតិនៃកម្ពុជា (NBC) ប្រកាសឲ្យគ្រឹះស្ថានធនាគារ និងមីក្រូហិរញ្ញវត្ថុ ដែលខ្វះប្រាក់រៀលបង្វិលក្នុងប្រតិបត្តិការផ្ដល់កម្ចីរបស់ខ្លួន មកចូលរួមដេញថ្លៃយកសាច់ប្រាក់រៀល ក្នុងទំហំណាមួយនៃប្រាក់ ៤០ ពាន់លានរៀល (ជិត ១០លានដុល្លារ) នៅថ្ងៃទី២១ខែកុម្ភៈ។ នេះបើតាមសេចក្ដីជូនដំណឹងរបស់ NBC នៅថ្ងៃទី១៤ខែកុម្ភៈ។
ការដេញថ្លៃប្រចាំខែនេះ គឺជាលើកទី៥ហើយ នៃប្រតិបត្តិការផ្ដល់សន្ទនីយភាពដោយមានការធានា (LPCO) ដែល NBC បានដាក់ឲ្យអនុវត្តចាប់ពីចុងឆ្នាំ២០១៦ ។ តាមរយៈប្រតិបត្តិការនេះ NBC ផ្ដល់កម្ចីជាប្រាក់រៀលដល់គ្រឹះស្ថានហិរញ្ញវត្ថុ ដែលចូលរួមដេញថ្លៃ ជាមួយអត្រាការប្រាក់ក្នុងកម្រិតណាមួយ ដោយគ្រឹះស្ថានទាំងនោះត្រូវដាក់ឧបករណ៍អាចជួយដូរបាន (NCD) ជាវត្ថុធានាបំណុល។
NBC ដាក់ឲ្យអនុវត្តប្រតិបត្តិការ LPCO ក្នុងបំណងបញ្ចេញប្រាក់រៀលនៅលើទីផ្សារឲ្យបានកាន់តែច្រើន ដើម្បីលើកកម្ពស់ការប្រើប្រាស់រូបិយវត្ថុជាតិ និងជំរុញការផ្ដល់កម្ចីជាប្រាក់រៀលរបស់គ្រឹះស្ថានហិរញ្ញវត្ថុ ជាមួយអត្រាការប្រាក់សមរម្យ៕
© រក្សាសិទ្ធិដោយ thmeythmey.com