គ្រឹះស្ថានហិរញ្ញវត្ថុ ដែលមាននិមិត្តសញ្ញាស្រដៀងគ្នាទៅនឹងស្ថាប័នរដ្ឋ ត្រូវប្ដូរចេញ

ជាតិ

សេដ្ឋកិច្ច

គ្រឹះស្ថានហិរញ្ញវត្ថុ ដែលមាននិមិត្តសញ្ញាស្រដៀងគ្នាទៅនឹងស្ថាប័នរដ្ឋ ត្រូវប្ដូរចេញ

23, Feb 2017 , 8:19 pm

រូបភាព

លោក ជា ចាន់តូ ទេសាភិបាល ធនាគារជាតិនៃកម្ពុជា

ដោយ:

ភ្នំពេញ៖ ធនាគារជាតិនៃកម្ពុជា (NBC) បានស្នើឲ្យធនាគារនិងគ្រឹះស្ថានហិរញ្ញវត្ថុ និងប្រតិបត្តិករមីក្រូហិរញ្ញវត្ថដែលប្រើនិមិត្តសញ្ញា (ឡូហ្គោ) ស្រដៀងនឹងនិមិត្តសញ្ញារបស់ស្ថាប័នរដ្ឋណាមួយ ឬអាចឲ្យភាន់ច្រឡំថាជាគ្រឹះស្ថានរបស់រដ្ឋ ត្រូវផ្លាស់ប្ដូរនិមិត្តសញ្ញារបស់ខ្លួន។

សេចក្ដីណែនាំរបស់ NBC នៅថ្ងៃទី២១ខែកុម្ភៈបានឲ្យដឹងថា ការប្រើប្រាស់និមិត្តសញ្ញារបស់គ្រឹះស្ថានមួយចំនួនមានលក្ខណៈស្រដៀងគ្នានឹងនិមិត្តសញ្ញារបស់ក្រសួង-ស្ថាប័នរដ្ឋ ដែលកំពុងប្រើប្រាស់ ដូចជាអក្សរ «៛» ឬ រូបសិង្ហ ជាដើម កំពុងឲ្យមានការភាន់ច្រឡំច្រើនពីសំណាក់សាធារណជនលើគ្រឹះស្ថាននោះថា គឺជាគ្រឹះស្ថានរបស់រដ្ឋ។

លិខិតនេះបន្តថា ៖«ការភាន់ច្រឡំនេះអាចជះឥទ្ធិពលមិនល្អចំពោះគ្រឹះស្ថាន ដោយសារសាធារណជន ពិសេសអ្នកទទួលឥណទានពីគ្រឹះស្ថានយល់ថា បើគាត់មិនទូទាត់សងត្រឡប់ ក៏មិនមានបញ្ហាអ្វីដែរ ព្រោះជាគ្រឹះស្ថានរបស់រដ្ឋ ដែលអាចឲ្យគ្រឹះស្ថានរងនូវការខាតបង់ ឬ បណ្ដាលឲ្យមានហានិភ័យជាប្រព័ន្ធដល់គ្រឹះស្ថានផ្សេងៗទៀត»។

ប្រមុខរដ្ឋាភិបាល សម្តេច ហ៊ុន សែន នៅថ្ងៃទី២២ខែកុម្ភៈ បានបង្គាប់ឲ្យគ្រឹះស្ថានមីក្រូហិរញ្ញវត្ថុ ប្រាសាក់ ផ្លាស់ប្ដូរនិមិត្តសញ្ញា «៛៛៛» ហើយកាលពីសប្ដាហ៍មុននៅក្នុងកិច្ចប្រជុំគណៈរដ្ឋមន្ត្រី សម្តេច បានបញ្ជាឲ្យធនាគារអេស៊ីលីដា ផ្លាស់ប្ដូរនិមិត្តសញ្ញា ដែលមានរូបហង្ស ផងដែរ។ ជាការឆ្លើយតប គ្រឹះស្ថានទាំងពីរនេះ កំពុងតែធ្វើសកម្មភាពផ្លាស់ប្តូរនិមិត្តសញ្ញារបស់ខ្លួនឲ្យបានក្នុងពេលឆាប់ៗខាងមុខ។

ការតម្រូវឲ្យផ្លាស់ប្ដូរនិមិត្តសញ្ញារបស់គ្រឹះស្ថានហិរញ្ញវត្ថុជាបន្តបន្ទាប់នេះ គឺស្របនឹងសកម្មភាពរបស់រដ្ឋាភិបាល ដែលនៅរយៈពេលថ្មីៗនេះ ព្យាយាមផ្សព្វផ្សាយដល់សាធារណជន និងចេញសេចក្ដីណែនាំដល់គ្រឹះស្ថានហិរញ្ញវត្ថុជាហូរហែ គឺធ្វើយ៉ាងណាកុំឲ្យពលរដ្ឋយល់ច្រឡំថា គ្រឹះស្ថានធនាគារ មីក្រូហិរញ្ញវត្ថុ និងប្រតិបត្តិករឥណទានជនបទ ថាជាគ្រឹះស្ថានរបស់រដ្ឋ៕