អន្តរជាតិ
មេទ័ពអ៊ីរ៉ង់ព្រមានអាមេរិកថា «កុំព្រហើន ប្រយ័ត្នត្រូវកំផ្លៀង» លោកឧត្តមសេនីយ៍ Mohammad Pakpour មេបញ្ជាការទ័ពរបស់កងឆ្នាំបដិវត្តន៍អ៊ីរ៉ង់ (រូបថត៖ Tasnim News)
× មេបញ្ជាការកងកម្លាំងជើងគោកនៃកងឆ្មាំបដិវត្តន៍អ៊ីរ៉ង់ Mohammad Pakpour បានផ្ញើសារព្រមានទៅកាន់អាមេរិក ដែលប្រុងចាត់វិធានការគ្រប់យ៉ាងមកលើអ៊ីរ៉ង់នោះ ក្រោយការបាញ់មីស៊ីលពេលថ្មីៗនេះ។ លោកឧត្តមសេនីយ៍ Pakpour គំរាមថា អាមេរិកនឹងទទួលបានមួយកំភ្លៀងដ៏ខ្លាំង បើហ៊ានមើលស្រាលសមត្ថភាពការពាររបស់កងកម្លាំងអ៊ីរ៉ង់។ លោកឧត្តមសេនីយ៍គំរាមបែបនេះ ខណៈកងទ័ពអ៊ីរ៉ង់បិទបញ្ចប់សមយុទ្ធដ៏ធំមួយនៅថ្ងៃទី២២ ខែកុម្ភៈ។
«សត្រូវរបស់យើង មិនគួរមានកំហុសក្នុងការវាយតម្លៃសមត្ថភាពរបស់យើងឡើយ ហើយពួកគេនឹងទទួលមួយកំផ្លៀងយ៉ាងខ្លាំង បើពួកគេមើលងាយសមត្ថភាពរបស់យើង»។ នេះជាការព្រមានរបស់មេទ័ពអ៊ីរ៉ង់ Mohammad Pakpour ដែលទំនងជាសំដៅដាក់ប្រធានាធិបតី ដូណាល់ ត្រាំ ដែលគំរាមចាត់វិធានការតឹងរ៉ឹងប្រឆាំងអ៊ីរ៉ង់។ មិនត្រឹមតែគំរាមឡើយ លោក ត្រាំ ក៏បាននិយាយថា អ៊ីរ៉ង់កំពុងប្រលែងជាមួយភ្លើង ព្រោះហ៊ានបាញ់មីស៊ីលល្មើសបម្រាមអន្តរជាតិ។
កងឆ្មាំបដិវត្តន៍អ៊ីរ៉ង់ដ៏មានឥទ្ធិពល បានបញ្ចប់លំហាត់យោធាដ៏ធំមួយ ដែលចូលរួមដោយកងកម្លាំងជាច្រើនប្រភេទនៅតំបន់ភាគកណ្ដាល និងខាងកើតប្រទេស។ សមយុទ្ធដែលធ្វើឡើងរយៈពេល៣ថ្ងៃ មានការបាញ់កាំភ្លើងធំ រ៉ុក្កែត ព្រមទាំងចូលរួមដោយកងរថក្រោះ និងឧទ្ធម្ភាគចក្រជាច្រើនគ្រឿង។ សមយុទ្ធយោធានេះ ធ្វើឡើងប៉ុន្មានសប្ដាហ៍ក្រោយលោក ត្រាំ ប្រកាសថា អាមេរិកដាក់អ៊ីរ៉ង់ក្រោមការត្រួតពិនិត្យមកនោះ។
បើតាមទីភ្នាក់ងារព័ត៌មាន Reuters ដែលស្រង់ប្រភពពីសារព័ត៌មានអ៊ីរ៉ង់ Tasnim លោកឧត្តមសេនីយ៍ Pakpour និយាយថា៖ «សមយុទ្ធនេះចង់ផ្ញើសារថា ប្រទេសផ្សេងកុំធ្វើអ្វីដែលឆ្កួតឡប់ឲ្យសោះ។ គ្រប់គ្នាគួរមើលឃើញអានុភាពដែលអ៊ីរ៉ង់មាននៅពេលនេះ។ » លោកបន្តទៀតថា សមយុទ្ធបីថ្ងៃនេះ ក៏មានបាញ់មីស៊ីលដ៏ទំនើប និងយន្តហោះ Drone ជាច្រើនគ្រឿងទៀតផង។
សូមរម្លឹកដែរថា កាលពីដើមខែកុម្ភៈនេះ មេដឹកនាំកំពូលអ៊ីរ៉ង់ Ayatollah Ali Khamenei បាននិយាយរិះគន់ចំៗលើលោកប្រធានាធិបតី ត្រាំ ដែលបានដាក់ទណ្ឌកម្មបន្ថែមទៀតលើអ៊ីរ៉ង់។ ក្នុងការរិះគន់ដ៏កម្រលើអាមេរិកនេះ មេដឹកនាំកំពូលអ៊ីរ៉ង់រូបនេះនិយាយថា វត្តមានរបស់លោក ត្រាំ បានបង្ហាញពីធាតុពិតរបស់អាមេរិក ដែលមិនអាចទុកចិត្តអ្វីបានឡើយ ហើយថែមទាំងដឹកនាំដោយប្រព័ន្ធពុករលួយទៀតផង។
បើទោះជាលោក ត្រាំ ធ្លាប់គំរាមដាក់គំនាបកាន់តែខ្លាំងលើអ៊ីរ៉ង់ គេក៏មិនដឹងច្បាស់ថា ក្រៅពីទណ្ឌកម្មសេដ្ឋកិច្ច លោក ត្រាំ នឹងមានវិធីសាស្ត្រអ្វីមានប្រសិទ្ធភាពគាបសង្កត់មហាអំណាច។ នរណាក៏ដឹងដែរថា អ៊ីរ៉ង់ជាប្រទេសមានសមត្ថភាពយោធាខ្លាំងក្លាប្រចាំតំបន់មជ្ឈិមបូព៌ា ជាមួយនឹងសព្វាវុធទំនើបៗ មានអានុភាពខ្លាំងទៀតផង។ ប៉ុន្តែជម្រើសនៃការប្រឈមមុខយោធា ទំនងជាមិនអាចកើតឡើងឡើយក្នុងពេលខ្លីនេះ៕
Tag:
អ៊ីរ៉ង់
អាមេរិក
ដូណាល់ ត្រាំ
Mohammad Pakpour
© រក្សាសិទ្ធិដោយ thmeythmey.com