កញ្ញា សម្បត្តិស្រីសួគ៌៖ «នយោបាយអន្តរជាតិ ជះឥទ្ធិពលដល់ជីវិតយើង… »

ជាតិ

កញ្ញា សម្បត្តិស្រីសួគ៌៖ «នយោបាយអន្តរជាតិ ជះឥទ្ធិពលដល់ជីវិតយើង… »

24, Feb 2017 , 2:10 pm

រូបភាព

ដោយ:

កញ្ញា សម្បត្តិស្រីសួគ៌ គឺជាយុវនារីជំនាន់ក្រោយម្នាក់ដែលបានផ្សារភ្ជាប់ខ្លួនយ៉ាងសកម្មទៅក្នុងកិច្ចការអន្តរជាតិតាមរយៈការសិក្សានយោបាយអន្តរជាតិ និងបានក្លាយជាគ្រូបង្រៀនមុខវិជ្ជានេះនៅវិទ្យាស្ថានភាសាបរទេសទៀតផង។ អ្នកគ្រូវ័យក្មេងលើកទឹកចិត្តឲ្យពលរដ្ឋខ្មែរសង្វាតយល់ដឹងពីកិច្ចការអន្តរជាតិ ដ្បិតកិច្ចការអាចធ្វើឲ្យប្រែប្រួលនយោបាយផ្ទៃក្នុងរបស់ប្រទេសមួយបានដែរ។

ឈ្មោះដ៏ពិរោះថា សំអាត សម្បត្តិស្រីសួគ៌ បានទាញការចាប់អារម្មណ៍ពីមនុស្សទូទៅរួចទៅហើយ។ ប៉ុន្តែបើសិនជាគេបានឃើញអ្នកគ្រូវ័យ២៤ឆ្នាំរូបនេះឈរបង្រៀននិស្សិតថ្នាក់បរិញ្ញាបត្រផ្នែកសិក្សាអន្តរជាតិដោយនិយាយជាភាសាអង់គ្លេសទៀតនោះ គេមិនអាចមិនស្ងើចអ្នកគ្រូបានឡើយ។ ក្លាយជាគ្រូបង្រៀនផ្នែកសិក្សាអន្តរជាតិនៅមហាវិទ្យាល័យនៅពេលនេះ បានកើតចេញពីចម្ងល់មួយចំនួនរបស់អ្នកគ្រូកាលពី៨ឆ្នាំមុន។ កាលណោះ នៅថ្នាក់មធ្យមសិក្សាទុតិយភូមិ ក្នុងមុខវិជ្ជាសិក្សាសង្គមដែលរៀនអំពីស្ថាប័នអង្គការសហប្រជាជាតិ យុវសិស្ស ស្រីសួគ៌ បានដាក់សញ្ញាសួរជាច្រើន លើតួនាទីស្ថាប័នពិភពលោកមួយនេះ រួមទាំងតួនាទីរបស់អគ្គលេខាធិការនៃស្ថាប័ននេះផង។ ដើម្បីទទួលបានចម្លើយទាំងនេះ ក្រោយពីប្រឡងជាប់សញ្ញាបត្រកម្រិតទុតិយភូមិក្នុងឆ្នាំ២០០៨ សម្បត្តិស្រីសួគ៌ បានចុះឈ្មោះចូលសិក្សាថ្នាក់បរិញ្ញាបត្រផ្នែកសិក្សាអន្តរជាតិតែម្តង នៅវិទ្យាស្ថានភាសាបរទេស (IFL) ទន្ទឹមគ្នានឹងថ្នាក់បរិញ្ញាបត្រភាសាអង់គ្លេស ដែលកញ្ញាបានសិក្សាក្នុងនាមជានិស្សិតអាហារូបករណ៍នៅ IFL ដូចគ្នា។

ការជ្រើសរើសយកជំនាញដ៏ត្រឹមត្រូវតាមចិត្តដែលខ្លួនស្រឡាញ់នោះ មិនបានធ្វើឲ្យនិស្សិតនារីម្នាក់នេះធុញទ្រាន់ក្នុងការសិក្សាឡើយ ប៉ុន្តែបានជំរុញទឹកចិត្តឲ្យគាត់ ខិតខំរហូតដល់ក្លាយជានិស្សិតឆ្នើមទៀតផង ក្នុងដំណាក់កាលនៃការបញ្ចប់ការសិក្សាថ្នាក់បរិញ្ញាបត្រក្នុងឆ្នាំ២០១៣។ កញ្ញា សំអាត សម្បត្តិស្រីសួគ៌ ផ្តល់តម្លៃយ៉ាងខ្លាំងទៅលើជំនាញរបស់ខ្លួន ដោយបានអះអាងយ៉ាងដូច្នេះ៖«ពលរដ្ឋត្រូវយល់ដឹងអំពីនយោបាយអន្តរជាតិ។ ធម្មតា នយោបាយក្នុងស្រុក និងនយោបាយអន្តរជាតិ មានភាពពាក់ព័ន្ធគ្នា។ នយោបាយអន្តរជាតិ ក៏ជះឥទ្ធិពលដល់ការរស់នៅរបស់ពួកគេដែរ»។

ដោយសារតែជានិស្សិតឆ្នើម សម្បត្តិស្រីសួគ៌ ក៏បានក្លាយជាគ្រូបង្រៀននៅសាលាដែលបានបណ្តុះកញ្ញានោះភ្លាមដែរក្នុងឆ្នាំ២០១៣ មុននឹងកញ្ញាបន្តយកសញ្ញាបត្រថ្នាក់អនុបណ្ឌិតផ្នែកនយោបាយអន្តរជាតិ នៅប្រទេសអង់គ្លេសក្នុងឆ្នាំ២០១៥ ក្រោមក្របខណ្ឌអាហារូបករណ៍ Chevening ដែលកញ្ញាបានប្រឡងជាប់។ ក្រោយពីបានបញ្ចប់ថ្នាក់អនុបណ្ឌិតក្នុងឆ្នាំ២០១៦កន្លងទៅ អ្នកគ្រូ សំអាត សម្បត្តិស្រីសួគ៌ បានបន្តការបង្រៀននៅ IFL ដដែលក្នុងពេលបច្ចុប្បន្ននេះ។

ជាអ្នកជំនាញផ្នែកនយោបាយអន្តរជាតិ អ្នកគ្រូមិនបានចំណាយពេលសម្រាប់តែត្រៀមមេរៀនបង្រៀនសិស្សតែមួយមុខនោះទេ។ ការវិវត្តនៃនយោបាយនៅក្នុងប្រទេសមួយចំនួនដែលមានឥទ្ធិពលនៅក្នុងពិភពលោក ដែលត្រូវផ្សាយតាមបណ្តាញព័ត៌មានធំៗដូចជា CNN, BBC, The diplomat magazine ជាដើម បានរង់ចាំអ្នកគ្រូរាល់ថ្ងៃ ដើម្បីអ្នកគ្រូអាចតាមដានទាន់ពេលវេលានូវសភាពការណ៍នយោបាយរបស់ពិភពលោក និងដើម្បីអ្នកគ្រូទទួលបានទុនក្នុងការវិភាគទៀតផង។

អង្គុយផ្តល់សម្ភាសនៅក្នុងការិយាល័យសិក្សា នៃផ្នែកសិក្សាអន្តរជាតិនៅក្នុងអគារសិក្សាភាសាអង់គ្លេសនៃវិទ្យាស្ថានភាសាបរទេស អ្នកគ្រូ សម្បត្តិស្រីសួគ៌ ពន្យល់ថានយោបាយការបរទេស អាចនាំឲ្យប្រទេសមួយរីកចម្រើន ទាំងលើវិស័យទេសចរណ៍ សេដ្ឋកិច្ច អប់រំ និងសង្គមជាដើម។ សម្រាប់អ្នកគ្រូ ពលរដ្ឋត្រូវយល់ដឹងអំពីនយោបាយការបរទេស យ៉ាងហោចណាស់ឲ្យល្មមគ្រប់គ្រាន់ ក្នុងការតាមដានការសម្រេចចិត្តរបស់ថ្នាក់ដឹកនាំ។ អ្នកគ្រូបញ្ជាក់ដូច្នេះថា៖«ក្នុងនាមយើងជាពលរដ្ឋដែលរស់នៅក្នុងប្រទេសមួយ យើងត្រូវយល់អំពីការធ្វើសេចក្តីសម្រេចចិត្ត របស់ថ្នាក់ដឹកនាំនៅក្នុងការងារជាអន្តរជាតិ។ ឧទាហរណ៍ តើការសម្រេចចិត្តមួយ អាចប៉ះពាល់កត្តាក្នុងស្រុកអ្វីខ្លះ? ឬប៉ះពាល់ដល់ប្រជាជនយ៉ាងណាខ្លះ»?

អ្នកគ្រូ សំអាត សម្បត្តិស្រីសួគ៌ ដែលមានគំនិតបើកចំហច្រើន បានជំរុញឲ្យយុវនារីខ្មែរ ចាប់អារម្មណ៍លើជំនាញការសិក្សាអន្តរជាតិនេះ ដោយពួកគេមិនត្រូវគិតថា កិច្ចការនយោបាយជាការងាររបស់មនុស្សប្រុសនោះឡើយ។ សម្រាប់អ្នកគ្រូ ការចូលរួមរបស់ស្ត្រីនៅក្នុងកិច្ចការអ្វីក៏ដោយ វាគឺជាការបន្ថែមគំនិត ដែលនឹងធ្វើឲ្យសេចក្តីសម្រេចមួយកាន់តែល្អប្រសើរ។

ក្នុងសម័យសកលភាវូបនីយកម្ម គ្មានប្រទេសណារស់នៅតែឯងទៀតឡើយ។ ក្រៅពីអាចក្លាយជាអ្នកជំនាញអំពីតំបន់នានានៅលើពិភពលោក កម្ពុជាក៏ត្រូវតែមានអ្នកជំនាញអាស៊ាន និងអាស៊ីប៉ាហ្វិក ដូចអ្នកគ្រូ សំអាត សម្បត្តិស្រីសួគ៌ ឲ្យបានច្រើន ខណៈកម្ពុជា បានធ្វើសមាហរណកម្មចូលទៅក្នុងតំបន់ និងពិភពលោកដែរនោះ៕