រឿង សោភ័ណ្ឌ អន់ចិត្តចំពោះលទ្ធផលដែលអាជ្ញាកណ្តាលកាត់ក្តីឲ្យចាញ់កីឡាករឡាវ

កីឡាជាតិ

ជាតិ

រឿង សោភ័ណ្ឌ អន់ចិត្តចំពោះលទ្ធផលដែលអាជ្ញាកណ្តាលកាត់ក្តីឲ្យចាញ់កីឡាករឡាវ

25, Feb 2017 , 10:35 pm

រូបភាព

ដោយ:

កីឡាករចិត្តសឿង រឿង សោភ័ណ្ឌ បានសម្តែងការមិនពេញចិត្តចំពោះលទ្ធផលដែលអាជ្ញាកណ្តាលកាត់ក្តីឲ្យខ្លួនចាញ់កីឡាករឡាវ ថាវ អ៊ូឡាន ក្នុងលទ្ធផលជាឯកច្ឆន្ទ ៥-០ នាការប្រកួតដណ្តើមខ្សែក្រវាត់ខារ៉ាបៅទម្ងន់៦៩គីឡូក្រាមនៅលើសង្វៀនអាស៊ីអាគ្នេយ៍កាលពីល្ងាចមិញ។ ការបរាជ័យនេះធ្វើឲ្យ សោភ័ណ្ឌ បាត់បង់ឱកាសឡើងទៅកាន់វគ្គផ្តាច់ព្រ័ត្រ។

អ្នកលេងគុនខ្មែរជូរមុខរបស់កម្ពុជា រឿង សោភ័ណ្ឌ បានសម្តែងអាកប្បកិរិយាអន់ចិត្តយ៉ាងខ្លាំងក្រោយអាជ្ញាកណ្តាលកាត់ក្តីឲ្យកីឡាករឡាវ ថាវ អ៊ូឡាន ឈ្នះជាឯកច្ឆន្ទក្នុងលទ្ធផល ៥-០។ មិនត្រឹមតែប៉ុណ្ណោះរូបគេបានចាត់ទុកការកាត់ក្តីនេះថា ជាលទ្ធផលដែលមិនអាចទទួលយកបាន។ តែយ៉ាងណា សោភ័ណ្ឌ ប្រកាន់គោលជំហរមិនធ្វើការតវ៉ានោះឡើយ។

ក្នុងបទសម្ភាសន៍ជាមួយសារព័ត៌មានថ្មីៗកីឡាករ រឿង សោភ័ណ្ឌ បានបញ្ជាក់យ៉ាងដូច្នេះថា៖«ខ្ញុំអន់ចិត្តមែនទែនបង នៅពេលដែលអាជ្ញាកណ្តាលកាត់ក្តីឲ្យខ្ញុំចាញ់កីឡាករឡាវរហូតដល់ ៥-០ បែបនេះ។ ខ្ញុំឈឺចិត្តមែនទែននៅពេលខ្ញុំលឺលទ្ធផលបែបនេះ កាត់ក្តីឲ្យចាញ់ក៏ចាញ់ចុះ តែឲ្យសមរម្យ បើកាត់ក្តីឲ្យចាញ់ត្រឹម ៣-២ វាសមរម្យ»។

ឆ្លងកាត់ការប្រកួត៥ទឹកពេញនៅលើសង្វៀនកីឡាករ រឿង សោភ័ណ្ឌ អះអាងថា កីឡាករឡាវដែលអាជ្ញាកណ្តាលកាត់ក្តីឲ្យឈ្នះ ៥-០ រូបនេះ មិនសូវបានវាយចូលមកលើខ្លូនប៉ុន្មានប៉ុណ្ណោះទេ ផ្ទុយទៅវិញកីឡាកររូបនេះត្រូវបានរូបគេវាយបកយ៉ាងចាស់ដៃ និងបន្សល់នូវស្នាមបែកលើផ្ទៃមុខទៀតផង។

អ្នកលេងគុនខ្មែរមកពីក្លិបម្កុដរាជសីហ៍នៃសមាគមក្រសួងមហាផ្ទៃរូបនេះអះអាងថា ករណីកាត់ក្តីឲ្យឈ្នះបែបមិនសមរម្យនេះបានកើតឡើងលើរូបគេជាច្រើនលើកមកហើយនៅលើសង្វៀនអាស៊ីអាគ្នេយ៍មួយនេះ។ មិនត្រឹមតែប៉ុណ្ណោះរូបគេក៏ធ្លាប់ធ្វើការតវ៉ាផងដែរចំពោះភាពមិនប្រក្រតីនេះ តែយ៉ាងណាលើកនេះខ្លួនមិនតវ៉ានោះទេ។ ប៉ុន្តែកីឡាកររូបនេះ គ្រាន់តែបញ្ជាក់ថា ប្រហែលជាមិនអាចឡើងប្រកួតនៅលើសង្វៀននេះទៀតទេ។

ក្រោយអាជ្ញាកណ្តាលកាត់ក្តីឲ្យចាញ់កីឡាករឡាវធ្វើឲ្យកីឡាករ រឿង សោភ័ណ្ឌ បាត់ឱកាសក្នុងការឡើងទៅកាន់វគ្គផ្តាច់ព្រ័ត្រ។ ចំណែកកីឡាករឡាវ ថាវ អ៊ូឡាន ត្រូវប្រជែងជាមួយកីឡាករ ឡុង សុវណ្ណឌឿន ក្នុងវគ្គផ្តាច់ព្រ័ត្រដើម្បីដណ្តើមខ្សែក្រវ៉ាត់ខារ៉ាបៅទម្ងន់៦៩គីឡូក្រាមរបស់សង្វៀនអាស៊ីគ្នេយ៍៕