ជាតិ
សេដ្ឋកិច្ច
CSX នឹងដាក់ឲ្យដំណើរការជួញដូរភាគហ៊ុនតាមអនឡាញ នៅខែកក្កដាខាងមុខ
× ភ្នំពេញ៖ ក្រុមហ៊ុនផ្សារមូលបត្រកម្ពុជា (CSX) នឹងដាក់ឲ្យដំណើរការជួញដូរភាគហ៊ុនតាមអនឡាញ នៅខែកក្កដាខាងមុខនេះ ដើម្បីផ្ដល់ភាពងាយស្រួលដល់អ្នកវិនិយោគិន ក្នុងការជួញដូរដោយផ្ទាល់នៅលើទីផ្សារ និងបង្កើនវិសាលភាពនៃការផ្សព្វផ្សាយព័ត៌មានទាន់ពេលវេលា។
អគ្គនាយកនៃក្រុមហ៊ុនផ្សារមូលបត្រកម្ពុជា លោក ហុង សុហួរ បានថ្លែងថា ផ្សារមូលបត្រកម្ពុជានឹងរៀបចំឲ្យមានវិធីសាស្ត្រ ជួញដូរដោយផ្ទាល់ប្រភេទបញ្ជរទីផ្សារ និងការដំឡើងដែនកំណត់ថ្លៃពី៥ភាគរយទៅ១០ភាគរយ ដែលយន្តការទាំងនេះនឹងអាចជួយបង្កើនទំហំជួញដូរ និងអាចឲ្យវិនិយោគិនទទួលបានការចំណេញពីការឡើងចុះនៃថ្លៃជួញដូរបានច្រើនជាងមុន រួមទាំងបង្កើនសន្ទនីយភាពទីផ្សារជាដើម។
លោក ហុង សុហួរ បានបញ្ជាក់ដូច្នេះថា៖«ប្រសិនបើរាជរដ្ឋាភិបាល ជាពិសេសគណៈកម្មការ មូលបត្រអនុញ្ញាតនោះវិនិយោគិនបរទេសអាច ទិញលក់ភាគហ៊ុនកម្ពុជាដោយ ប្រើគណនីដែលយើងមានស្រាប់ផងដែរ ។ ជាពិសេសផ្សារមូលបត្រ កម្ពុជាកំពុង សិក្សាលទ្ធភាព ដើម្បីអនុញ្ញាតឱ្យក្រុមហ៊ុនដែលចុះបញ្ជីនៅផ្សារមូលបត្រកម្ពុជា អាចទៅចុះបញ្ជីនៅផ្សារផ្សេងទៀតបាន ហើយក្រុមហ៊ុនដែលចុះបញ្ជីនៅផ្សារផ្សេងនោះ អាចមកចុះបញ្ជីនៅផ្សារមូលបត្រកម្ពុជាបាន»។
បើតាមលោក ហុង សុហួរ ទីផ្សារមូលបត្រកម្ពុជាកំពុងសិក្សាអំពីលទ្ធភាពនៃការតភ្ជាប់ និងការជួញដូរ ជាមួយផ្សារហ៊ុននៅប្រទេសជិតខាង ដូចជាប្រទេសថៃជាដើម។
គួរបញ្ជាក់ផងដែរថា ក្រុមហ៊ុន ដែលបានឡើងផ្សារហ៊ុននៅកម្ពុជាបច្ចុប្បន្ន មានក្រុមហ៊ុនចុះបញ្ជីលក់ ភាគហ៊ុនជាសាធារណៈចំនួន៤គឺ៖ រដ្ឋាករទឹកស្វយ័តក្រុងភ្នំពេញ, ក្រុមហ៊ុនហ្គ្រេនធ្វីន , កំពង់ផែស្វយ័តភ្នំពេញ និងភ្នំពេញអេសអ៊ីហ្សិត ភីអិលស៊ី ។ ជាមួយគ្នានេះកំពង់ផែស្វយ័តក្រុងព្រះសីហនុនឹងក្លាយជាក្រុមហ៊ុនទី៥ ដែលគ្រោងនឹងចុះបញ្ជីលក់ ភាគហ៊ុនរបស់ខ្លួននៅគណកម្មការមូលបត្រកម្ពុជា នាចុងខែមីនាខាងមុខនេះ៕
ប្រភពពី៖ AKP
© រក្សាសិទ្ធិដោយ thmeythmey.com