អន្តរជាតិ
រុស្ស៊ីលក់អាវុធកាន់តែដាច់នៅទីផ្សាអន្តរជាតិ ក្រោយអន្តរាគមន៍ក្នុងសង្គ្រាមប្រឆាំងភេរវកម្មស៊ីរី
× អាវុធរុស្ស៊ីកាន់តែមានតម្រូវការច្រើននៅក្នុងបរិបទទីផ្សារអន្តរជាតិ ក្រោយពេលដែលមហាអំណាចនេះបង្អួតសព្វាវុធខ្លួនច្រើនប្រភេទក្នុងសង្គ្រាមប្រឆាំងភេរវកម្មនៅស៊ីរី។ រុស្ស៊ីចាប់ពីប្រតិបត្តិការប្រឆាំងភេរវកម្មនៅក្នុងទឹកដីស៊ីរីចាប់ពីចុងឆ្នាំ ២០១៥ ហើយសព្វាវុធច្រើនប្រភេទ រួមទាំងនាវាដឹកយន្តហោះផងត្រូវបានបញ្ជូនទៅចូលរួមក្នុងប្រតិបត្តិការនេះ។
ក្រៅពីកសាងកតិ្តនាមនិងពង្រឹងឥទ្ធិពលដែលជិតសាបរលាបនៅមជ្ឈិមបូព៌ា រុស្ស៊ីបានអួតអាងថាការចូលប្រឡូកក្នុងសង្គ្រាមប្រឆាំងភេរវកម្មនៅស៊ីរី ជួយឲ្យខ្លួនលក់អាវុធកាន់តែដាច់នៅលើទីផ្សារអន្តរជាតិ។
សូមស្តាប់សំឡេង៖
យោងតាមសារព័ត៌មានរដ្ឋរុស្ស៊ី Sputnik នាយកប្រតិបត្តិក្រុមហ៊ុនអាវុធរដ្ឋរុស្ស៊ី Rostec លោក Sergey Chemezov បានបញ្ជាក់ថា សព្វាវុធរុស្ស៊ីកាន់តែត្រូវប៉ាន់ ដោយប្រទេសជាច្រើនបន្តបញ្ជាទិញ ក្រោយពេលដែលរុស្ស៊ីបង្អួតសព្វាវុធនៅក្នុងសង្គ្រាមស៊ីរី។ អ្វីដែលគួរឲ្យកត់សម្គាល់នោះ មន្ត្រីរូបនេះ ប្រដូចការអន្តរាគមន៍នេះទៅនឹងការផ្សព្វផ្សាយពាណិជ្ជកម្មមួយដែលមិនគិតថ្លៃផងដែរ។
«សកម្មភាពរបស់យើងប្រឆាំងក្រុមភេរវជនរដ្ឋឥស្លាមនៅស៊ីរី បានបង្ហាញឲ្យឃើញពីសមត្ថភា និងអំណាចនៃបច្ចេកវិទ្យាយោធាយើង។ កងកម្លាំងទ័ពអាកាស,នាវាចម្បាំងនិង ក្រុមកងកម្លាំងមីស៊ីលរបស់យើងបានបង្ហាញឲ្យគ្រប់គ្នាឃើញពីប្រសិទ្ធភាពនៃសព្វាវុធរុស្ស៊ី។ ដូច្នេះហើយសកម្មភាពយោធាយើងមានឥទ្ធិពលលើការលក់សព្វាវុធចេញ ហើយវាជាការផ្សាយពាណិជ្ជកម្មមួយដែលយើងមិនចំណាយសូម្បីតែមួយរៀល»។
រុស្ស៊ីបានចូលអន្តរាគមន៍នៅក្នុងសង្គ្រាមស៊ីរីដោយយកលេសថា ធ្វើសង្គ្រាមប្រឆាំងភេរវកម្មកាលពីចុងឆ្នាំ ២០១៥ កន្លងទៅ។ គេឃើញវត្តមានសព្វាវុធរុស្ស៊ីច្រើនប្រភេទឈរជើងនៅក្នុងទឹកដីស៊ីរី មានទាំងយន្តហោះចម្បាំង, នាវាចម្បាំង និងកងទ័ពថែមទៀត។មិនត្រឹមតែប៉ុណ្ណោះ រុស្ស៊ីមានប្រព័ន្ធការពារអាកាសស៊េរីទំនើប S-400 នៅក្នុងទឹកដីស៊ីរីដើម្បីការពារយន្តហោះចម្បាំងដែលកំពុងបំពេញប្រតិបត្តិការកម្ចាត់ភេរវជនផងដែរ។
ជារួម រុស្ស៊ីបានចំណាយធនធាននិងកងទ័ពច្រើនសន្ធឹកដើម្បីប្រឆាំងក្រុមរដ្ឋឥស្លាមផង ឆ្លៀតសំពងក្រុមប្រឆាំងរបប បាសា អាល់អាសាដ ផង និងជួយពង្រឹងរដ្ឋាភិបាលនេះឲ្យរឹងមាំឡើងវិញ។ អ្វីដែលគួរឲ្យកត់សម្គាល់ រុស្ស៊ីបានជួយរដ្ឋាភិបាលស៊ីរីឲ្យមានប្រៀបលើក្រុមប្រឆាំងនិងដណ្តើមបានទីក្រុង Aleppo ដែលជាសមរភូមិសំខាន់និងប្រទាញប្រទង់បំផុតមួយកាលពីចុងឆ្នាំ ២០១៦ កន្លងទៅផងដែរ៕
Tag:
Sergey Chemezov
ស៊ីរី
រុស្ស៊ី
ក្រុមភេរវជនរដ្ឋឥស្លាម
Rostec
© រក្សាសិទ្ធិដោយ thmeythmey.com