ជាតិ
កម្ពុជារកចំណូលបានពីភ្ញៀវទេសចរអន្តរជាតិ ចំនួន ៣៤០០លានដុល្លារ ក្នុងឆ្នាំ២០១៦
× ភ្នំពេញ៖ កម្ពុជា ទទួលបានភ្ញៀវទេសចរអន្តរជាតិចំនួន ៥លាននាក់ ដែលមានថវិកាសរុបជាង៣ពាន់លានដុល្លារ ចាក់បញ្ចូលក្នុងសេដ្ឋកិច្ចជាតិ នៅក្នុងឆ្នាំ២០១៦។ នេះបើតាមការប្រកាសរបស់រដ្ឋាភិបាល។
សម្ដេចនាយករដ្ឋមន្ត្រី ហ៊ុន សែន ចាត់ទុកវិស័យទេសចរនេះ គឺជា«មាសបៃតង» ដែលចូលរួមទ្រទ្រង់កំណើនសេដ្ឋកិច្ចសង្គម , បង្កើតការងារ និងកាត់បន្ថយភាពក្រីក្ររបស់ប្រជាជន ជាការនាំចេញនៅនឹងកន្លែង ព្រមទាំងដើរតួនាទីយ៉ាងសំខាន់ក្នុងការថែរក្សាអភិរក្សបរិស្ថាន ឆ្លើយតបនឹងបំរែបំរួលអាកាសធាតុប្រកបដោយប្រសិទ្ធភាពខ្ពស់។ តាមរយៈការរីកចម្រើននៃវិស័យទេសចរនេះ កម្ពុជាទទួលបានកំណើនក្នុងអត្រា ចំនួន៥ភាគរយ នៃភ្ញៀវទេសចរអន្តរជាតិ ចំនួន៥លាននាក់ និងនាំប្រាក់ចំណូល៣៤០០លានដុល្លារ ។
តាមការព្យាករណ៍រដ្ឋាភិបាលនៅឆ្នាំ២០១៧នេះ ភ្ញៀវទេសចរអន្តរជាតិនឹងមានការកើនឡើង ប្រមាណ៥លាន ៤សែននាក់ ហើយរំពឹងថា ឆ្នាំ២០២០ ភ្ញៀវទេសចរអន្តរជាតិនឹងអាចកើនឡើង៧លាននាក់ និងនាំមកនូវចំណូលសរុបប្រមាណ៥ពាន់លានដុល្លារ ហើយអាចបង្កើតការងារសម្រាប់ប្រជាពលរដ្ឋ១លាននាក់។
សម្ដេច ហ៊ុន សែន យល់ឃើញថា ដើម្បីអាចសម្រេចគោលដៅទាក់ទាញភ្ញៀវទេសចរ៧លាននាក់ នៅក្នុងឆ្នាំ២០២០នោះ កម្ពុជាត្រូវការរៀបចំធ្វើយ៉ាងណាឲ្យក្លាយជាតំបន់ទេសចរណ៍ស្អាត និងបៃតង តាមរយៈការដាក់ផែនការយុទ្ធសាស្ត្រឲ្យមានការប្រកួតប្រជែងយករង្វាន់ប្រចាំឆ្នាំ នៅក្នុងតំបន់ទេសចរនានា ក្នុងប្រទេសកម្ពុជា។
ក្រៅពីនេះកម្ពុជា ក៏ត្រូវការអភិវឌ្ឍន៍វិស័យទេសចរបៃតង តាមរយៈការចងក្រងបណ្ដាញធុរកិច្ចបៃតងក្នុងវិស័យទេសចរ ដើម្បីផ្លាស់ប្ដូរចែករំលែកបទពិសោធន៍ល្អ រវាងប្រតិបត្តិករទេសចរណ៍។ បន្ថែមពីនេះប្រមុខរដ្ឋាភិបាល ក៏បានស្នើឲ្យក្រសួងកសិកម្ម និងក្រសួងទេសចរ សហការរៀបចំយុទ្ធសាស្ត្រ «ខ្សែក្រវ៉ាត់ខៀវ» ដែលមានន័យថា ការផលិតនិងដាំបន្លែ ,ចិញ្ចឹមសត្វឲ្យបានច្រើនបន្ថែម ដើម្បីផ្គត់ផ្គង់តម្រូវការក្នុងស្រុក និងនៅតាមបណ្ដាតំបន់ទេសចរនានា ក្នុងគោលដៅកាត់បន្ថយការនាំចូលពីបរទេសផងដែរ។
តាមរយៈការរៀបចំឲ្យមានការប្រកួតប្រជែងទីក្រុងស្អាត ធុរកិច្ចបៃតងក្នុងវិស័យទេសចរ និងការធ្វើបដិសណ្ឋារកិច្ចល្អក្នុងសេវាសាធារណៈក្រុង/ខណ្ឌ ក្នុងឆ្នាំ២០១៧ នេះ រដ្ឋាភិបាល រំពឹងថា វាអាចជាមូលដ្ឋានសម្រាប់កម្ពុជាក្នុងការត្រៀមខ្លួនចូលរួមអនុវត្តនូវស្ដង់ដារទីក្រុងទេសចរណ៍ស្អាតអាស៊ាន ដែលនឹងត្រូវប្រគល់ជ័យលាភីលេខមួយ នៅឆ្នាំ២០១៨ខាងមុខ នៅក្នុងប្រទេសថៃ ស្របពេលដែលកម្ពុជា បានសម្រេចក្រុងចំនួន៧ចូលរួមប្រកួតផងដែរ។ ទីក្រុងចំនួន៧ ដែលនឹងត្រូវចូលរួមប្រកូតចលនាប្រឡងប្រណាំងទីក្រុងទេសចរណ៍ស្អាតអាស៊ានលើកទី១នេះ រួមមានទីក្រុងភ្នំពេញ សៀមរាប បាត់ដំបង កែប កំពត ក្រុងព្រះសីហនុ និងកំពង់ចាម៕
Tag:
ភ្ញៀវទេសចរ
កម្ពុជា
ទេសចរណ៍
© រក្សាសិទ្ធិដោយ thmeythmey.com