ជាតិ
ក្រុងសំរោង ខេត្តឧត្តរមានជ័យ ជាប់ជ័យលាភីបដិសណ្ឋារកិច្ចផ្នែកសេវាសាធារណៈល្អជាងគេ
× ភ្នំពេញ៖ ក្រុងសំរោងស្ថិតនៅខេត្តឧត្តរមានជ័យ បានទទួលជ័យលាភីបដិសណ្ឋារកិច្ចផ្នែកសេវាសាធារណៈល្អជាងគេ ក្នុងចំណោមក្រុង៣នៃខេត្ត/រាជធានីផ្សេងគ្នា ក្រុងសំរោងទទួលបានពិន្ទុខ្ពស់ជាងគេ ដែលមានបដិសណ្ឋាកិច្ចផ្នែកសេវាសាធារណៈល្អកម្រិតស្នាមញញឹម៣។ នេះបើយោងតាមរបាយការណ៍វាយតម្លៃរបស់ក្រសួងទេសចរណ៍។
របាយការណ៍វាយតម្លៃរបស់ក្រសួងទេសចរណ៍ បានរកឃើញថា ក្រុងសំរោងខេត្តឧត្តរមានជ័យមានជ័យ ទទួលបានពិន្ទុខ្ពស់ជាងគេ ផ្នែកផ្តល់សេវាសាធារណៈប្រកបដោយភាពកក់ក្តៅកម្រិតខ្ពស់។
របាយការណ៍ខាងលើ បានចាត់ចំណាត់ថ្នាក់ក្រុងនីមួយដោយឈរលើមូលដ្ឋាន«ធ្វើឲ្យបាន ធ្វើឲ្យលឿន ធ្វើឲ្យមានតម្លាភាព» ដោយក្នុងនោះ ក្រសួងបានបែងចែកជ័យលាភីជា៣កម្រិត គឺស្នាមញញឹម៣ មានន័យថា ផ្តល់សេវាសាធារណៈប្រកបដោយភាពកក់ក្តៅជូនប្រជាពលរដ្ឋកម្រិតខ្ពស់។ ឯស្នាមញញឹម២ មានន័យថា បង្គួរ ខណៈស្នាមញញឹម១ មានន័យថា មធ្យម។
ក្រុងចំនួន៣ ដែលជាប់ចំណាត់ថ្នាក់ស្នាមញញឹម៣ ក្នុងនោះរួមមាន៖ ក្រុងសំរោងខេត្តឧត្តរមានជ័យទទួលបានពិន្ទ៨២,៨ ក្រុងច្បារមនខេត្តកំពង់ស្ពឺ ទទួលបានពិន្ទុ៨១,៤១ ខ័ណ្ឌពោធិ៍សែនជ័យ រាជធានីភ្នំពេញ ទទួលបានពិន្ទុ៨១,២៤។
ចំណែកឯក្រុងទទួលបានចំណាត់ថ្នាក់ស្នាមញញឹម២ មានចំនួន២៧ក្រុង/ខណ្ឌ ដូចជា៖ ក្រុងស្វាយរៀងខេត្តស្វាយរៀង ក្រុងក្រចេះ ខេត្តក្រចេះ ខណ្ឌ៧មករា រាជធានីភ្នំពេញ…។ រីឯក្រុង/ខ័ណ្ឌដែលទទួលបានចំណាត់ថ្នាក់ស្នាមញញឹម១ គឺមាន៨ក្រុង/ខណ្ឌ ដូចជា៖ ក្រុងប៉ោយប៉ែតខេត្តបន្ទាយមានជ័យ ខណ្ឌទួលគោករាជធានីភ្នំពេញ…។
ចំណែក ជ័យលាភីបដិសណ្ឋាកិច្ចល្អរបស់ច្រកទ្វារអន្តរជាតិវិញ អាកាយានដ្ឋានអន្តរជាតិសៀមរាបខេត្តសៀមរាប និងអាកាសយានដ្ឋានអន្តរជាតិភ្នំពេញ ទទួលបានចំណាត់ថ្នាក់ស្នាមញញឹម៣ ខណៈច្រកទ្វារព្រំដែនអន្តរជាតបាវិតខេត្តស្វាយរៀង ទទួលបានចំណាត់ថ្នាក់ស្នាមញញឹម១៕
© រក្សាសិទ្ធិដោយ thmeythmey.com