លោក សម រង្ស៊ី ថា រដ្ឋាភិបាលចង់គេចពីការទទួលខុសត្រូវបញ្ហាហិរញ្ញវត្ថុពលរដ្ឋ

ជាតិ

សេដ្ឋកិច្ច

នយោបាយជាតិ

លោក សម រង្ស៊ី ថា រដ្ឋាភិបាលចង់គេចពីការទទួលខុសត្រូវបញ្ហាហិរញ្ញវត្ថុពលរដ្ឋ

28, Feb 2017 , 3:35 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ «មីក្រូហិរញ្ញវត្ថុជារបស់ឯកជន មិនមែនជារបស់រដ្ឋទេ»។ នេះជាសារថ្មីមួយ ដែលសម្ដេច ហ៊ុន សែន បានបញ្ជារឲ្យស្ថាប័នប្រាក់កម្ចីទាំងនោះ សរសេរពាក្យស្លោកនេះនៅគ្រប់ស្ថាប័នពួកគេ។ អតីតប្រធានគណបក្សសង្គ្រោះជាតិ លោក សម រង្ស៊ី និយាយថា មូលហេតុដែលសម្ដេច ហ៊ុន សែន បង្គាប់ឲ្យស្ថាប័នមីក្រូហិរញ្ញវត្ថុ សរសេរសារបែបនេះ ដោយសារតែរដ្ឋាភិបាលចង់គេចវេសពីការទទួលខុសត្រូវលើបញ្ហាហិរញ្ញវត្ថុរបស់ប្រជាពលរដ្ឋ ដែលកំពុងធ្លាក់ដុនដាប។

«សារដែលគេ (ហ៊ុន សែន) ផ្សព្វផ្សាយបែបនេះ គ្រាន់តែដើម្បីឲ្យរដ្ឋាភិបាលគ្រលាស់ដៃ មិនយកចិត្តទុកដាក់ ហើយមិនទទួលខុសត្រូវ ចំពោះស្ថានភាពហិរញ្ញវត្ថុដ៏ដុនដាប របស់កសិករខ្មែររាប់លាននាក់ ដែលជំពាក់លុយស្ថាប័នមីក្រូហិរញ្ញវត្ថុទាំងនោះ យ៉ាងវ័ណ្ឌក»។ នេះជាការលើកឡើងរបស់លោក សម រង្ស៊ី ដែលបានសរសេរលើហ្វេសប៊ុកខ្លួនថា រដ្ឋាភិបាលត្រូវតែទទួលខុសត្រូវ ចំពោះទុក្ខវេទនារបស់កសិកររាប់លាននាក់ ដែលធ្វើស្រែចំការដោយខាតបង់រាល់ឆ្នាំ ជាហេតុតម្រូវឲ្យកសិករទាំងនោះខ្ចីប្រាក់ពីស្ថាប័នមីក្រូហិរញ្ញវត្ថុកាន់តែច្រើនឡើងៗ ដើម្បីបំពេញកង្វះខាតរបស់ពួកគេនេះ។

ក្នុងន័យខាងលើនេះ លោក សម រង្ស៊ី ទំនងមិនចង់ឲ្យរដ្ឋាភិបាលចេញមុខដោះស្រាយបំណុលជូនកសិករនោះទេ ។ តែលោក ចង់ឲ្យរដ្ឋាភិបាលរៀបចំវិស័យកសិកម្មឲ្យបានត្រឹមត្រូវ ដើម្បីធានាដល់លទ្ធភាពប្រជាកសិករ ក្នុងការខ្ចីប្រាក់ពីស្ថាប័នហិរញ្ញវត្ថុទាំងនោះ ហើយអាចបង់សង់បំណុលត្រឡប់ទៅវិញ។អតីតប្រធានគណបក្សប្រឆាំងរូបនេះ បានសរសេរដូច្នេះថា៖«រដ្ឋាភិបាលត្រូវតែរៀបចំវិស័យកសិកម្មឡើងវិញ ដើម្បីធានាឲ្យកសិករមានដីធ្លីគ្រប់គ្រាន់ដើម្បីប្រកបអាជីវកម្ម មានទឹកគ្រប់គ្រាន់ដើម្បីស្រោចស្រពស្រែចំការ មានការទ្រទ្រង់បច្ចេកទេសគ្រប់បែបយ៉ាងដើម្បីបង្កើនផលិតភាពកសិកម្ម ។ហើយជាពិសេស ត្រូវតែរៀបចំទីផ្សារដើម្បីឲ្យកសិករអាចលក់ផលដំណាំដែលប្រមូលបាន ក្នុងតម្លៃខ្ពស់សមរម្យ ដើម្បីទ្រទ្រង់ជីវភាពរស់នៅ ដោយមិនចាំបាច់ទៅខ្ចីលុយពីគេ ឬក៏បង្ខំចិត្តចំណាកស្រុក ដូចសព្វថ្ងៃ»។

នៅពេលថ្មីៗនេះ រដ្ឋាភិបាលបានតម្រូវឲ្យគ្រឹះស្ថានធនាគារ និងហិរញ្ញវត្ថុទាំងអស់ ផ្សព្វផ្សាយ និងដាក់សម្គាល់ថាជា«គ្រឹះស្ថានឯកជន» ដើម្បីបញ្ចៀសការភាន់ច្រឡំរបស់មហាជនថាគ្រឹះស្ថានទាំងនោះជារបស់រដ្ឋ។ មូលហេតុ ដែលរដ្ឋាភិបាលកំណត់បែបនេះ ដោយសារកន្លងមកមានគ្រឹះស្ថានហិរញវត្ថុឯកជនមួយចំនួន បានរឹបអូសផ្ទះសំបែងរបស់ពលរដ្ឋ ហើយពលរដ្ឋភាន់ច្រឡំថា គ្រឹះស្ថានទាំងនោះជារបស់រដ្ឋ។ មកទល់នឹងពេលនេះ មានគ្រឹះស្ថានហិរញ្ញវត្ថុចំនួនពីរហើយ គឺធនាគារអេស៊ីលីដា និងគ្រឹះស្ថានមីក្រូហិរញ្ញវត្ថុ ប្រាសាក់ ដែលត្រូវបានរដ្ឋាភិបាលបញ្ជាឲ្យផ្លាស់ប្ដូរនិមិត្តសញ្ញារបស់ខ្លួន ក្រោមហេតុផលថា ស្ថាប័នហិរញ្ញវត្ថុទាំងពីរនេះ មាននិមិត្តសញ្ញា ដែលអាចឲ្យពលរដ្ឋភាន់ច្រឡំ ថាជារបស់ «រដ្ឋ»។

ក្រៅពីនេះសម្ដេច ហ៊ុន សែន ក៏បានដាក់បម្រាមដល់មន្ត្រីមូលដ្ឋានមិនអោយចូលរួមពាក់ព័ន្ធ និងសេវាកម្មរបស់ស្ថាប័នមីក្រូហិរញ្ញវត្ថុ ទាក់ទងនឹងការចូលរួមរៀបចំឯកសារ ឬការចូលរួមរឹបអូសដីធ្លី ផ្ទះសម្បែងរបស់ពលរដ្ឋផងដែរ ដើម្បីបញ្ចៀសការយល់ច្រឡំពីសាធារណជន។ ចំណែកបុគ្គលនយោបាយណាដែលដើរឃោសនាតាមមូលដ្ឋាន ដោយសន្យាថា ពួកគេនឹងលុបបំណុលជូនពលរដ្ឋ ដែលជំពាក់មីក្រូហិរញ្ញវត្ថុ និងធនាគារ នៅពេលដែលគណបក្សពួកគេជាប់ឆ្នោតនោះ ក៏ត្រូវរងការចាប់ខ្លួនពីសំណាក់អាជ្ញាធរនៅកន្លែងភ្លាមៗផងដែរ។ សម្ដេច ហ៊ុន សែន ចាត់ទុកការឃោសនារបស់បុគ្គលទាំងនោះ គឺជាការសន្យាបោកប្រាស់ពលរដ្ឋ ដើម្បីកេងចំណេញនយោបាយ ដែលជារឿងមិនអាចទៅរួចឡើយ៕