ពីនេះ ពីនោះ
ព័ត៍មានសុខភាព
រន្ធញើសលើមុខចេះតែរីកធំមែនទេ? ម៉េចមិនធ្វើតាមរូបមន្តទាំងនេះសិនទៅ!!!
× រន្ធញើសលើស្បែកគឺជាច្រកចេញមួយសម្រាប់ការបញ្ចេញជាតិប្រេងសេប៉ូមដើម្បីឲ្យស្បែកមានភាពរលោង។ ប្រេងនេះដែរមានសារៈសំខាន់ជួយឲ្យស្បែកមានសុខភាពល្អ និងការពារភាពស្ងួត។ ប៉ុន្តែ ការដែលរន្ធញើសរីកធំពេកអាចជារឿងមិនល្អទៅវិញសម្រាប់រូបរាងខាងក្រៅ ហើយក៏មិនមាននរណាចង់ឲ្យវាកើតឡើងអញ្ចឹងដែរ។
ចំពោះទំហំរន្ធញើស ជាទូទៅត្រូវបានកំណត់ដោយកត្តាហ្សែន ប៉ុន្តែវាក៏មានកត្តាផ្សេងៗទៀតចូលរួមដែរដូចជា៖
• អាយុកាន់តែច្រើន
• ប្រភេទស្បែកដែលមានជាតិប្រេងច្រើន
• ការញ៉ាំគ្រឿងស្រវឹងច្រើនៗ
មានទម្លាប់តិចតួចមួយចំនួនដែលអ្នកអាចធ្វើបានដើម្បីជួយឲ្យស្បែកមានស្ថានភាពល្អឡើងវិញមានដូចជា៖
1. លាងសម្អាតស្បែកថ្នមៗដើម្បីកំចាត់ធូលីដី និងប្រេងដែលស្ទះក្នុងរន្ធញើស
2. ចូរជ្រើសរើសផលិតផលសម្អាងដោយប្រុងប្រយ័ត្ន និងលាងជម្រះវាជានិច្ចមុនពេលចូលគេង
3. ប្រើវិធីជម្រះកោសិកាស្បែកងាប់ៗមួយសប្តាហ៍ម្តង។
វិធីធម្មជាតិដែលអាចជួយពង្រឹងដល់ស្ថានភាពស្បែកផង និងឲ្យរន្ធញើសរួមតូចវិញនោះមានដូចជា៖
ទឹកដោះគោយ៉ាអួ
យ៉ាអួមានសារធាតុ Lactic Acid ដែលអាចកំចាត់កោសិកាស្បែកងាប់ៗ និងបន្តឹងរន្ធញើសបានផង។ ចូរយកទឹកដោះគោមួយនេះលាបពីលើមុខហើយទុកចោល ២០នាទីចាំលាងជម្រះចេញ ព្រោះវានឹងជួយផ្តល់សំណើមដល់ស្បែកកាន់តែល្អ។ ក្រៅពីនេះ សារធាតុប្រឆាំងនឹងការរលាករបស់វាអាចកាត់បន្ថយជំងឺមុន ដែលបណ្តាលមកពីការស្ទះរន្ធញើសបានទៀត។
ទឹកខ្មេះផ្លែប៉ោម
ជាតិអាស៊ីតក្នុងទឹកខ្មេះផ្លែប៉ោមអាចជួយបង្រួមរន្ធញើសដែលរីកធំបាន។ អ្នកគ្រាន់តែលាយទឹកខ្មេះនេះពីរបីដំណក់ជាមួយនឹងក្រែមផ្តល់សំណើមរបស់អ្នកដែលប្រើរាល់ថ្ងៃ ហើយលាបលើស្បែកមុខ នោះនឹងធ្វើឲ្យស្បែកមើលទៅកាន់តែរលោងថែមទៀត។ ដោយសារតែជាតិអាស៊ីតរបស់ទឹកខ្មេះផ្លែប៉ោមខ្ពស់ ដូច្នេះចូរប្រាកដថា អ្នកបានលាយវារួចហើយមុននឹងលាបលើផ្ទៃមុខ។
ទឹកក្រូចឆ្មា
ទឹកក្រូចឆ្មាពោរពេញទៅដោយសារធាតុ Alpha Hydroxy Acids ដែលអាចជួយកំចាត់កោសិកាស្បែកងាប់ៗបាន។ ដើម្បីបង្រួមរន្ធញើសដែលរីកធំ ចូរលាយទឹកក្រូចឆ្មាជាមួយទឹកធម្មតា រួចលាងលើមុខ។
ប៉េងប៉ោះ
ប៉េងប៉ោះច្រើនតែត្រូវបានគេប្រើប្រាស់ដើម្បីដោះស្រាយបញ្ហារន្ធញើសរីកធំ។ វាផ្ទុកទៅដោយសារធាតុ Lycopene វីតាមីន A និង C ព្រមទាំងអង់ទីអុកស៊ីដង់ខ្ពស់ ដែលសុទ្ធសឹងតែអាចជួយកាត់បន្ថយជំងឺមុន និងកំចាត់ការស្ទះក្នុងរន្ធញើសបានទាំងអស់។ អ្នកគ្រាន់តែយកចំណិតផ្លែប៉េងប៉ោះធំមួយមកបិទពីលើផ្ទៃមុខហើយទុកចោលប្រមាណ ៣០នាទីប៉ុណ្ណោះ ចាំលាងជម្រះវិញ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com